11/07/2026
မိုးဦး စပြီ ဆိုတာနဲ့ သွေးလွန်တုပ်ကွေးရောဂါနဲ့ ဆေးရုံတက်ရတဲ့ ကလေးများ ရှိလာနေပြီဖြစ်ပါတယ်။ အချို့ ကလေးများ ရောဂါပြင်းထန်ပြီး သွေးလန့်လို့ သွေးရည်ကြည်သွင်းရတဲ့ အဆင့်ထိ ရှိခဲ့ကြပေမဲ့ ဆေးရုံတက် ကလေးအားလုံး ပြန်လည် နေကောင်းကျန်းမာသွားကြတဲ့ အတွက် ဝမ်းသာကျေနပ်ရပါတယ်။
မိုးများတဲ့ ဒေသဖြစ်လို့ မိုးတွင်းရောက်ချိန်နဲ့ ကျောင်းဖွင့်ချိန် တွေမှာ ပိုမိုတွေ့ရှိလာရနိုင်ပါတယ်။
မိဘများ အနေဖြင့် မိမိတို့၏ ရင်သွေးငယ်လေးများ ဖျားနာခဲ့လျင်သွေးလွန်တုပ်ကွေးရောဂါ လက္ခဏာ များနဲ့ ချိန်ထိုးပြီး ဆေးရုံ/ဆေးခန်း သို့ အချိန်မှီ သွားရောက်၍ ကုသမှုခံယူခြင်းဖြင့် ရောဂါ အန္တရာယ်ကို ကောင်းစွာ ကျော်လွှားနိုင်မှာ ဖြစ်ပါတယ်။
"ကလေး အဖျားကြီးမယ်၊ မလန်းဆန်းဘဲ မှိန်းနေမယ်၊အစားသောက်ပျက်ပြီး ဘာမှ မစားဘဲဖြစ်နေမယ် ဆိုလျင် သွေးလွန်တုပ်ကွေး ဖြစ်နိုင်တယ်လို့ အကြမ်းဖျဥ်း မှတ်ယူရပါမှာဖြစ်ပါတယ်။"
ကလေး ဖျားပြီး အောက်ပါ အချက် များထဲမှ ၂ချက်ရှိလျင် သွေးလွန်တုပ်ကွေး ဖြစ်နိုင်သည်ဟု သတ်မှတ်ရမှာဖြစ်ပါတယ်။
(၁) အော့အန်ခြင်း / ကော်ဖီ အနှစ်ရောင် အန်ခြင်း
(၂) နှာခေါင်းသွေးလျှံခြင်း
(၃) သွေးပေါင်ချိန်တိုင်းစက်ဖြင့် Hess Test စမ်းသပ် ရာတွင် + ဖြစ်ခြင်း
(၄) အောက်ပါ အရေးပေါ်လက္ခဏာတစ်ခုခု ရှိခြင်း
(က) ဝမ်းဗိုက်နာခြင်း/ဗိုက်ကို ဖိလျှင် နာခြင်း
(ခ) ဆက်တိုက် အန်ခြင်း
(ဂ) အဆုတ်၊နှလုံး၊ဝမ်းဗိုက် တို့တွင် အရည်စုခြင်း
(ဃ)မှိန်းခြင်း သို့မဟုတ်ကယောင်ကတမ်း ဖြစ်ခြင်း
(င)အသည်း ၂စင်တီမီတာ အထက် ကြီးလာခြင်း
(စ)သွေးဖြူဥ ကျလာခြင်း နှင့် သွေးပြစ်နှုံး pcv တက်လာခြင်း
"အရေးပေါ် လက္ခဏာ ရှိတဲ့သူ ၊ အသက် (၁)နှစ်အောက် ကလေး ၊ အ၀လွန်သူ၊အခြားရောဂါ အခံရှိသူ၊ ဆေးရုံနှင့် သွားလာရဝေးသောသူများသည် ဆေးရုံ တက်ရောက်၍ ကုသမှုခံယူသင့်သူများ ဖြစ်ပါတယ်။"
သွေးလွန်တုပ်ကွေးရောဂါ ပြင်းထန်ချိန် ဖြစ်ပေါ်သော အောက်ပါ သွေးလန့်ခြင်းလက္ခဏာများ ကိုလည်း မိဘများ သိရှိထားနိုင်ရန် ဖော်ပြထားပါတယ်
(၁) ဆီး မသွားခြင်း
(၂)ခြေဖျား လက်ဖျားများ အလွန်အမင်းအေးစက်ခြင်း၊
(၃) ရုတ်တရက် ဗိုက်အောင့်လာခြင်း
(၄) ဂနာမငြိမ်ဖြစ်ခြင်း (သို့မဟုတ်) အရမ်းမှိန်းလာခြင်း
(၅) အစာ/ ရေမဝင်နိုင်လောက်အောင်အဆက်မပြတ်အန်ခြင်း
(၆) သွေးလန့်လျှင် မှိန်းနေပြီး တကိုယ်လုံး အေးစက်လာခြင်း၊ခန္ဓာကိုယ်အတွင်း သွေးယိုစီးသည့်အတွက်ကြောင့် ကော်ဖီမှုန့်ရောင်၊ အညိုရောင် အဖတ်အမျှင်လေးများပါသော အရည်များအန်ခြင်း၊ ဝမ်းမည်းမည်း သွားခြင်း၊ နှာခေါင်းသွေးယိုခြင်း၊ သွားဖုံးကြားသွေးထွက်ခြင်း
(၇)ခန္ဓာကိုယ်ရှိ အရေပြားပေါ်တွင် ထိခိုက်သကဲ့သို့၊ သွေးခြေဥသကဲ့သို့ အနီကွက်များပေါ်လာခြင်း
(၈) ကိုယ်အပူချိန် ရုတ်တရက်ကျဆင်းသွားခြင်း (စတင်ဖျားသည့်နေ့မှ (၃)ရက်မြောက်တွင် အဖြစ်များတတ်သည်)
(၉) သွေးပေါင်အလွန်ကျဆင်းခြင်း၊ နောက်ဆုံးတွင် တိုင်းတာ၍ မရသည့် အခြေအနေဖြစ်ခြင်း၊ အပေါ်သွေး၊ အောက်သွေးခြားနားချက်သည် 20mmHg (သို့) ထို့ထက်နည်းခြင်း တို့ဖြစ်ပါတယ်။
🚨 မိဘများ အထူးသတိပြုရန် အချက်များ 🚨
❗️ကိုယ်အပူချိန် မကျဘဲ 102'F နှင့်အထက်မှာ ရှိနေလျှင်၊ တက်လျှင်
❗️ကလေး အစား နှင့် အရည် မဝင်လျှင်၊ဗိုက်အောင့်လျှင်၊အဖျားကျ ပြီး တကိုယ်လုံးအေးစက်နေသော်လည်း မလန်းဘဲ မှိန်းနေလျှင်၊ဆီးမသွားနိုင်လျှင်၊တောက်လျှောက်အန်နေလျှင်၊
❗️နှာခေါင်းသွေးယိုလျှင် ၊သွားဖုံးသွေးယိုလျှင်၊ ကတ္တရာစီးရောင် ဝမ်းမည်းမည်းသွားလျှင်၊ဆီးထဲသွေးပါလျှင်၊ခန္ဓာကိုယ်တွင်အနီစက်များထွက်လျှင်၊အညိုအမဲကွက်များပေါ်လျှင်
နားလည်တက်ကျွမ်းသော ဆရာဝန် / ကလေးအထူးကု ဆရာဝန်နှင့် ပြသရန် ဆေးရုံ /ဆေးခန်းသို့ ချက်ချင်း သွားရောက်ရမှာဖြစ်ပါတယ်။
✅ သွေးလွန်တုပ်ကွေးရောဂါမဖြစ်အောင် ကာကွယ်ခြင်း ✅
မိမိကလေး၏ ပတ်ဝန်းကျင်တွင် သွေးလွန်တုပ်ကွေး ရောဂါပိုး သယ်ဆောင်လာမည့် ခြင် မရှိအောင် အဓိကထား ကာကွယ်ရပါမယ်။
ပိုးလောက်လန်းကင်းစင် မှသာ သွေးလွန်တုပ်ကွေးဖြစ်စေသော ခြင် ကင်းစင်မည် ဖြစ်သောကြောင့်
(၁) ခြင်မပေါက်ဖွားရန် ရေအိုး/ရေလှောင်ကန်တွေကို အဖုံး "ဖုံး" အုပ်ပါ။
(၂) ရေအိုး/ရေစည် များ၏ အတွင်းပိုင်းကို ၁ပတ် ၁ကြိမ် တိုက်ချွတ်ဆေးကြောပြီး "သွန်" ပါ။
(၃) ဘုရားပန်းအိုးများကို ပိုးလောက်လန်း ပေါက်ဖွားမှာ မရှိစေရန် ၁ပတ် ၂ကြိမ် တိုက်ချွတ်ဆေးကြောပြီး ရေ "လဲ" လှယ် ပေးပါ။
(၄) ရေချိုများတွင် ပိုလောက်လန်းတွေ့ပါက ရေစစ် ဖြစ် "စစ်" ပြီးမှ သိုလှောင် သုံးစွဲပါ။
(၄)အိမ်ပတ်ဝန်းကျင်တွင် ခြင်မခိုအောင်းနိုင်အောင် ခြုံများ၊ တာယာကန်များ၊မိုးရေတင်နိုင်သောရေခွက် အိုးခွက်ဟောင်းများကိုစနစ်တကျ စွန့်ပစ်ခြင်း၊သန့်ရှင်းရေးပြုလုပ်ခြင်းများ ပြုလုပ်ထားပါ။
(၅) နေ့ခင်းဘက်ကလေးအိပ်ချိန် ခြင်မကိုက်အောင်ခြင်ထောင်ထောင်၍သိပ်ပါ။
(၆) အောက်ဖော်ပြပါ ပုံတွင် ကျန်းမာရေးဝန်ကြီးဌာနမှ ထုတ်ပြန်ထားရှိသည့်
" ဖုံး ၊ သွန် ၊ လဲ ၊ စစ်
ခတ် ၊ ထောင် ၊ လောင်း ၊ ဖွင့်
မြုပ် ၊ ရှင်း ၊ ထည့် "
ဆိုသည့် ခြင်ကြား လောက်လန်း နှိမ်နှင်းခြင်း အစီစဥ်များကို ဆောင်ရွက်ထားပါ။
(၇) မိမိ အိမ်နီးချင်း သွေးလွန်တုပ်ကွေးဖြစ်၍ ဆေးရုံတက်ရသောကြောင့် ကျန်းမာရေး ဝန်ထမ်းများမှ ခြင်ဖြန်းဆေး လာရောက်ဖြန်းလျှင် ဝိုင်ဝန်း ပူးပေါင်းဆောင်ရွက်ပေးပါ။
ကာကွယ်ခြင်း သည် ကုသခြင်းထက် ပိုမိုထိရောက်ပါ သဖြင့် မိမိတို့ ပတ်ဝန်ကျင်တွင် ပိုးလောက်လန်း၊ ခြင်ကြား မပေါက်ဖွားအောင် သန့်ရှင်းရေး ဆောင်ရွက်ခြင်း ၊ မိမိ ကလေး ခြင်မကိုက်အောင် အထူးသတိထား ကာကွယ်ခြင်း နှင့် သွေးလွန်တုပ်ကွေး သံသယ ဟု ယူဆပါက အချိန်မှီ ဆေးကုသမှု ခံယူခြင်းဖြင့် ကျန်းမာရွှင်လန်းသော သားသား မီးမီး လေးများဖြစ်ကြပါစေကြောင်း "ကောင်းဆုမွန်" မိသားစုမှ "ဆုမွန်ကောင်း" တောင်းအပ်ပါသည်။
ကျန်းမာပျော်ရွှင်ကြပါစေ🙏🙏🙏
#ကောင်းဆုမွန်
#ကလေးအထူးကုဆေးခန်း
