https://www.facebook.com/104102268530134/

Yangon Medical Network, Yangon (2026)

10/09/2026

🤔ဘယ်လိုဗိုက်အောင့်ခြင်းမျိုးကစိုးရိမ်ရသလဲ။
🧑‍⚕️ အသက်အန္တာရာယ် ရှိသောဗိုက်အောင့်ခြင်းမျိုးကို ဆေးမြီးတိုများနှင့်ကု၍ အသက်ဆုံးပါး သွားရသောသာဓကများစွာရှိပါသည်။ ထို့ကြောင့် ဗိုက်အောင့်ခြင်းနှင့်အတူ အောက်ပါလက္ခဏာများရှိပါကမပေါ့ဆသင့်ပါ။
1)လတ်တလောဝမ်းဗိုက်ကိုထိခိုက်ဒဏ်ရာရထားခြင်း၊
2)ဝမ်းအမဲရောင် သွားခြင်း၊ ကော်ဖီရောင်၊ အညိုရောင်၊ သွေးရောင်အန်ခြင်း၊
3) ဖျား ခြင်း၊
4) အသားဝါ၊ မျက်လုံးဝါခြင်း၊
5) သွေးပေါင်ကျခြင်း၊ နှလုံးခုန်နှုန်းမြန်ခြင်းနှင့်သွေးလန့်သည့် လက္ခဏာများ၊ အသက်ရှုနှုန်းမြန်လာခြင်း၊
6) ဆီးနည်းသွားခြင်း၊ ဆီးမထွက်တော့ခြင်း၊ ဆီးထဲတွင်သွေးပါခြင်း၊
7) လူနာ သတိကောင်းစွာမရတော့ပဲ ဂယောင်ချောက်ချားဖြစ်ခြင်း၊
8) ဗိုက်အောင့်ခြင်းသည်အလွန်ဆိုးရွားပြင်းထန်လျက် ဝမ်းဗိုက်တစ်ခုလုံးအထိမခံနိုင်အောင်နာကျင်ခြင်း၊
9) ပြင်းထန်ကာလဝမ်းရောဂါ၏ လက္ခဏာများဖြစ်သော ဝမ်းလျှောခြင်းနှင့်အန်ခြင်း၊
10) အမျိုးသမီးများတွင်ရာသီထိန်ခြင်း၊
11) ကလေးငယ်များတွင် ခုန်ပေါက်ဆော့ကစားနေရင်းရုတ်တရက် ဗိုက်အောင့်ခြင်း၊
12)သက်ကြီးရွယ်အိုများ၊ နဂို သွေးတိုး၊ ဆီးချို၊ နှလုံးရောဂါအခံရှိသူများတွင်ဖြစ်ခြင်း၊
စသည်တို့ရှိပါက ကျွမ်းကျင်သူဆရာဝန်၊ ဆရာမများနှင့်
အမြန်ဆုံး စနစ်တကျကုသမှုခံယူသင့်ပါသည်။

လူတိုင်း ကျန်းမာ ရေးကို လက်လှမ်း မှီ စေရန်
ရည် သန်လျက်
Yangon Medical Network

08/09/2026

Tetanus
မေးခိုင်ရောဂါသိကောင်းစရာ

🤔မေးခိုင်ရောဂါဆိုတာ ဘာလဲ။
🧑‍⚕️မေးခိုင်ရောဂါဆိုတာ Clostridium tetani လို့ခေါ်တဲ့ ဘက်တီးရီးယားပိုး တစ်မျိုး ကထုတ်လွှတ်တဲ့ အဆိပ်( toxin) ကြောင့် ဖြစ်သောရောဂါဖြစ်ပါတယ်။

🤔မေးခိုင်ရောဂါဘာကြောင့်ဖြစ်တာလဲ။
🧑‍⚕️မေးခိုင်ရောဂါပိုးကိုဖြစ်စေသော Clostridium tetani ဘက်တီးရီးယားပိုး သည်မြေကြီးနှင့် တိရစ္ဆာန်တို့၏ မစင်စသည်တို့တွင်တည်ရှိနေတတ်သည်။
ထိုဘက်တီးရီးယားပိုးသည် ထိခိုက်ရှနာမှတဆင့် ခန္ဓာကိုယ်အတွင်းသို့ဝင်ရောက်လာသောအခါ (Tetanospasmin) ဟုခေါ်သောအဆိပ် (Toxin) တစ်မျိုးကိုထုတ်လွှတ်ပေးသည်။ ထိုအဆိပ်သည် လူ၏ ခန္ဓာကိုယ် ရှိကြွက်သားများကိုထိန်းချုပ်ပေးသော အာရုံကြော (nerves) များကိုထိခိုက်ပျက်စီးစေခြင်းဖြင့်ရောဂါလက္ခဏာများကိုဖြစ်ပေါ်စေပါတယ်။

🤔မေးခိုင်ရောဂါရဲ့ရောဂါလက္ခဏာတွေကဘာတွေလဲ။
🧑‍⚕️ ရောဂါပျိုးချိန်မှာ ( 3) ရက်မှ ( 21)ရက် အတွင်းဖြစ်ပါတယ်။
အများစုမှာ (14) ရက်အတွင်းရောဂါလက္ခဏာပြလေ့ရှိပါတယ်။
ရောဂါလက္ခဏာတွေက
👉 မေးကြောများဆွဲခြင်း၊ ပါးစပ်ပိတ်မရပဲဖြစ်ခြင်း
👉မေးရိုးတလျောက်နာကျင်တောင့်တင်းပြီး မလှုပ်ရှားနိုင်ပဲဖြစ်သွားခြင်း၊
👉 နှုတ်ခမ်းတဝိုက်ရှိကြွက်သားများကိုတောင့်တင်းစေပြီး အံကြိတ်သလိုဖြစ်နေစေခြင်း
👉အစာမျိုချခက်ခြင်း
👉 ဝမ်းဗိုက်ကြွက်သားများနာကျင်တောင့်တင်းခြင်း
စတာတွေဖြစ်နိုင်ပါတယ်။
ပိုဆိုးလာပါက
💢အချိန်အတော်ကြာအောင်တက်သွားခြင်း၊ (အများအားဖြင့် လည်ပင်းနှင့်ကျောက ကော့သွားတတ်ပြီး ခြေထောက်များတောင့်သွားတတ်သည်။ လက်များက လက်သီးကျစ်ကျစ်ဆုပ်၍ ကွေးကောက်သွားတတ်သည်။)
💢လည်ပင်းတဝိုက်နှင့် ဝမ်းဗိုက်ကြွက်သားများတောင့်တင်းသွားခြင်းကြောင့် အသက်ရှုခက်ခဲခြင်းကိုဖြစ်စေသည်။
👉ရုတ်တရက်အသံကျယ်လောင်စွာကြားရခြင်း၊လူနာကိုထိကိုင်ခြင်း၊အလင်းပြပြမြင်ရခြင်းကပင် ထိုပြင်းထန်သောအကြောဆွဲမှုများကို ဖြစ်ပေါ်စေပါတယ်။
💢ရောဂါပြင်းထန်လာပါက
🔺 သွေးပေါင်ချိန်တက်ခြင်း၊ကျခြင်း
🔺နှလုံးခုန်နှုန်းမြန်ခြင်း
🔺ဖျားခြင်း
🔺ချွေးစီးပြန်ခြင်း
စတာတွေဖြစ်လာနိုင်ပါတယ်။

🤔မေးခိုင်ရောဂါကိုဘယ်လိုခွဲခြားနိုင်သလဲ။
👉ထိခိုက်ဒဏ်ရာရသောနေရာတစ်နေရာတည်းဖြစ်သောမေးခိုင်ရောဂါ (Localized tetanus)
👉 ဦးခေါင်းပိုင်းထိခိုက်ဒဏ်ရာကြောင့်မျက်နှာရှိကြွက်သားများအားနည်းခြင်းနှင့် မေးရိုးအကြောဆွဲခြင်းဖြစ်သောမေးခိုင်ရောဂါ(Cephalic tetanus)
👉ခန္ဓာကိုယ်တစ်ခုလုံးသို့ မေးခိုင်ရောဂါပျံ့နှံ့သွားခြင်း ( Generalized tetanus)
ဟူ၍ခွဲခြားနိုင်ပါတယ်။

🤔မေးခိုင်ရောဂါကဘယ်လိုကူးစက်နိုင်သလဲ။
👉မြေကြီးနှင့် တိရစ္ဆာန်တို့ရဲ့မစင်တွေမှာရှိတဲ့မေးခိုင်ရောဂါပိုးဟာ ငုပ်လျှိုးနေ၊ မြုံနေတဲ့ အသွင်( dormant state) အနေနဲ့ရှိပြီး၎င်းအသက်ရှင်နေထိုင်နိုင်မည့် လူခန္ဓာကိုယ်အတွင်းသို့ရောက်မှသာနိုးထ လာပြီး (awakened) ဆဲလ်များပွားများကာ အဆိပ်များထုတ်လုပ်နိုင်ခြင်းဖြစ်ပါတယ်။
ဒါကြောင့်မေးခိုင်ပိုးဟာမသန့်ရှင်းသည့် မြေကြီးတွေမှာနှစ်နဲ့ချီ၍ရှိနေနိုင်ပါတယ်။
👉မြေကြီး၊ နောက်ချေးမြေဩဇာစသည်နှင့်ထိတွေ့မိသော ပွန်းရာ၊ရှရာများ
👉 သံချောင်း၊ပုလင်းကွဲအစ စသည်ဖြင့်စူးမိသောဒဏ်ရာများ၊
မှတဆင့်လူတို့၏ခန္ဓာကိုယ်အတွင်းဝင်ရောက်ရောဂါဖြစ်စေပါတယ်။

🤔ဘယ်လိုလူမျိုးတွေမှာ မေးခိုင်ရောဂါဖြစ်နိုင်ချေများသလဲ။
👉 ကိုယ်ခံအားကျဆင်းသည့်ရောဂါရှိသူများ၊စတီးရွိက် အပါအဝင်ကိုယ်ခံအားကျစေသောဆေးများသောက်နေရသူများ
👉ဆီးချိုရောဂါရှိပြီးအရေပြားတွင်အနာရှိသူများ
👉 မေးခိုင်ကာကွယ်ဆေး အပြည့်မထိုးထားသောမိခင်မှမွေးသောကလေးများတွင်အချင်းပိုးဝင်ခြင်း၊
👉 မူးယစ်ဆေးသုံးစွဲသူများတွင်မသန့်ရှင်းသည့် အပ်များမျှဝေသုံးစွဲခြင်း၊
👉 မေးခိုင်ကာကွယ်ဆေးလုံးဝမထိုးထားသူများ၊(သို့မဟုတ်) လွန်ခဲ့သော (10) နှစ်အတွင်းမေးခိုင်ကာကွယ်ဆေးမထိုးခဲ့သူများ
စတာတွေမှာမေးခိုင်ရောဂါဖြစ်နိုင်ချေများပါတယ်။

🤔နောက်ဆက်တွဲပြဿနာ တွေက ဘာတွေ လဲ။
မေးခိုင်ရောဂါဖြစ်သွားပြီးပါက တိကျသောဆေးမရှိသေးပါ။ ကုသမှုနောက်ကျပါက
👉 တက်သွားခြင်း၊အကြောဆွဲခြင်း၊လည်ပင်းနှင့် ဝမ်းဗိုက်ရှိကြွက်သားများတောင့်တင်းခြင်းကြောင့် အသက်ရှုရခက်ခဲခြင်း၊
👉 အဆုတ်သွေးကြောပိတ်ခြင်း
👉အဆုတ်ရောင်ခြင်း
👉 အရိုးကျိုးသွားခြင်း
👉 အသက်သေဆုံးခြင်းအထိဖြစ်နိုင်ပါတယ်။

🤔မေးခိုင်ရောဂါမဖြစ်အောင်ဘယ်လိုကာကွယ်ရမလဲ။
👉ကလေးငယ်များတွင် အသက် (2) လမှစ၍အကြိမ်ရေပြည့်အောင်မေးခိုင်ကာကွယ်ဆေးထိုးထားခြင်း
👉 ကိုယ်ဝန်ဆောင် မိခင်များတွင်မေးခိုင်ကာကွယ်ဆေး ထိုး ထားခြင်း
👉 လူကြီးများတွင် booster shot အနေနဲ့(10) နှစ်တစ်ကြိမ်ကာကွယ်ဆေးထိုးခြင်း 👉 ခန္ဓာကိုယ်တွင် ပွန်းရာ ရှရာများရှိပါကမြေကြီး၊တိရစ္ဆာန်တို့၏ မစင်စသည်တို့ဖြင့်မထိတွေ့စေရန်သတိထားခြင်း၊ထိတွေ့မိပါကလည်း ဆပ်ပြာနှင့်စင်ကြယ်အောင်ဆေးကြောခြင်း
👉ထိခိုက်ဒဏ်ရာရလာခြင်း၊သံစူးခြင်းဖြစ်ပါက မေးခိုင်ကာကွယ်ဆေး ချက်ချင်းထိုးခြင်း
ဖြင့်မေးခိုင်ရောဂါမဖြစ်အောင်ကာကွယ်နိုင်ပါတယ်။

လူတိုင်း ကျန်းမာ ရေးကို လက်လှမ်း မှီ စေရန်
ရည် သန်လျက်
Yangon Medical Network

References
Davidson's Principles and Practices of Medicine
https://www.mayoclinic.org/diseases-conditions/tetanus/symptoms-causes/syc-20351625
https://my.clevelandclinic.org/health/diseases/23582-tetanus-lockjaw

02/09/2026

🤔G6PD ရောဂါရှိတဲ့သူတွေမှာ ဘယ်အရာတွေကသွေးနီဥ ဆဲလ်များပျက်စီးခြင်း ( Hemolytic anaemia) ဖြစ်အောင်လှုံ့ဆော်ပေးသလဲ။
👉ပဲလိပ်ပြာ၊ပဲကြီးနှင့် အချို့သောပဲများ
👉အချို့သောပိုးသတ်ဆေးများ၊ဆာလဖာပါသောဆေးများ
👉အက်စပရင်အပါအဝင် အကိုက်အခဲပျောက်ဆေးနှင့်အရောင်ကျဆေးများ
👉ပရိုင်မာကွင်းအပါအဝင် အချို့သောငှက်ဖျားဆေးများ
👉 အမျိုးအမည်ပါဝင်ပစ္စည်းမသိသော ဗမာဆေး၊တိုင်းရင်းဆေးများ၊တရုတ်ရိုးရာ တိုင်းရင်းဆေးများ
👉အသည်းရောင်အသားဝါ အေ ပိုး ၊ ဘီပိုး
👉အူရောင်ငန်းဖျားရောဂါ (Typhoid)
👉အဆုတ်ရောင် ရောဂါ( Pneumonia)
👉ဆေးလိပ်သောက်ခြင်း
👉အရက်အလွန်အကျွံသောက်ခြင်း
👉စိတ်ဖိစီး မှုများ
👉ဒန်းဆိုးခြင်း
👉ပြင်းထန်သောလေ့ကျင့်ခန်းများ
👉 ပရုပ်လုံးအပါအဝင် naphthalene ပါဝင်သည့် ပစ္စည်း များ နှင့်ထိတွေ့ခြင်း
👉 Blueberry အပါအဝင်ဘယ်ရီသီးများ၊ပဲနို့၊ပူရှိန်းဆေးပြားများ၊ ပူစီနံကဲ့သို့ အရွက်များ၊ကြက်ဟင်းခါးသီး၊ ခရမ်းသီး၊ ဝိုင်အမျိုးမျိုး၊ကိုလာ၊ Tonic water စသော အချိုရည်များ
👉Vitamin C နှင့် Vitamin K ပမာဏအများအပြားပါဝင်သောအားဆေးများ
စတာတွေက ရောဂါရှိသူများတွင်သွေးနီဥဆဲလ်များပျက်စီးခြင်းဖြစ်အောင်လှုံ့ဆော်ပေးပါတယ်။

31/08/2026

Stroke
လေဖြတ်ခြင်း

အရပ်ထဲမှာ ဦးဘယ်သူဒေါ်ဘယ်သူကတော့ဖြင့် ရေချိုးမှားလို့၊ပန်ကာလေခံမိလို့၊သမံသလင်းပေါ်အိပ်မိလို့၊လေစာတွေစားမိလို့ လေဖြတ်သွားပြီစသည်ဖြင့် ပြောဆိုတတ်ကြပါတယ်။ အဆိုပါအကြောင်းအရာများက တကယ်ပဲလေဖြတ်ခြင်းကိုဖြစ်စေသလား။

🤔လေဖြတ်ခြင်းဘာကြောင့်ဖြစ်တာလဲ။
🧑‍⚕️ ဦးနှောက် အတွင်း သွေးလှည့်ပတ်မှုရပ်တန့်သွားခြင်း၊(သို့မဟုတ်) သွေးကြောပိတ်ခြင်း၊ (သို့မဟုတ်) သွေးကြောပေါက်ခြင်းကြောင့်ဖြစ်ပါတယ်။
🧠 ဦးနှောက် အတွင်းမှာရှိတဲ့ဆဲလ်တွေက သွေးလှည့်ပတ်မှု ထဲမှာပါတဲ့ အောက်ဆီဂျင်နဲ့ လိုအပ်တဲ့အာဟာရတွေကိုမရခဲ့ရင်မိနစ်ပိုင်းအတွင်းမှာပဲ ဆဲလ်သေဆုံးခြင်းဖြစ်သွားနိုင်ပါတယ်။
💢ဒါကြောင့်အချိန်မီကုသမှုမလုပ်ရင်လေဖြတ်ခြင်းကြောင့်ဖြစ်တဲ့ခြေလက်များမလှုပ်ရှားနိုင်ခြင်းစသည်တို့ဟာရာသက်ပန်ဖြစ်သွားတတ်ပါတယ်။
👉ကုသမှုခံယူသည့် တိုင်အောင်
🔺 ဖြစ်ရသည့် အကြောင်းရင်း ၊ နဂိုရောဂါအခံ၊
🔺 ဦးနှောက်အတွင်း ဘယ်သွေးကြောကိုထိခိုက်မိသလဲ။(တချို့သွေးကြောအသေးလေးတွေထိခိုက်ခြင်းဖြစ်သလို၊တချို့ကသွေးကြောအကြီးတွေထိခိုက်ခြင်းဖြစ်တတ်သည်။)
🔺ဦးနှောက်အတွင်းဧရိယာဘယ်လောက်များများထိခိုက်သွားသလဲ။ထိခိုက်သောဆဲလ်ပမာဏ၊ တည်နေရာ စသည်တို့ပေါ်မူတည်ပြီး ပြန်ကောင်းနိုင်ခြင်းရှိမရှိကွာခြားပါတယ်။

🤔 လေဖြတ်ခြင်းကိုဘယ်လိုအမျိုးအစားခွဲခြားနိုင်သလဲ။
🧑‍⚕️အကြမ်းအားဖြင့်လေဖြတ်ခြင်းကို
👉ဦးနှောက်အတွင်းသွေးကြောပိတ်ခြင်းကြောင့်လေဖြတ်ခြင်း (Ischaemic stroke) (85% ခန့် ဖြစ်ပါတယ်)
👉 ဦးနှောက် အတွင်း သွေးကြောပေါက်ခြင်းကြောင့် လေဖြတ်ခြင်း (Haemorrhagic stroke) (15% ခန့်ဖြစ်ပါတယ်)
ဆိုပြီးခွဲခြားနိုင်ပါတယ်။
💢ဖြစ်ရတဲ့အကြောင်းရင်းမတူညီသလို ကုသပုံကုသနည်းလဲကွာခြားပါတယ်။
🧠 လေဖြတ်ခြင်းစုစုပေါင်းရဲ့(99%)ခန့်ဟာ သွေးလွှတ်ကြော ( Arterial system) မှာဖြစ်တတ်ပြီး (

28/08/2026

မြွေကိုက်ခံရသောလူနာများအကြောင်း

စာရေးသူ၏ ဆရာဝန်သက်တမ်းတလျောက်တွင် တောရောမြို့ပါကြုံတွေ့ရသောလူနာတစ်မျိုးမှာ မြွေကိုက်ခံရသောလူနာများဖြစ်ပေတော့သည်။ အထူးသဖြင့်မြန်မာပြည်အလယ်ပိုင်းမြွေပွေးမြွေဟောက်ပေါများလှသောဒေသတွင်လက်ထောက်ဆရာဝန်အဖြစ်တာဝန်ကျနေစဥ်က နေ့စဥ်နီးပါးမြွေကိုက်သောလူနာများကိုအခြေအနေမျိုးစုံဖြင့်တွေ့ရသည်။ထိုအထဲမှ အချို့ကိုကား အလွန်ပင်မှတ်မှတ်ရရရှိလှပါသည်။
ထိုလူနာအမည်မှာ ဦးမြပဲဆိုကြပါစို့။ ဦးမြသည် တောင်သူတစ်ဦးဖြစ်ပြီးသူနေသောနေရာက ထိုနယ်ဆေးရုံလေးနဲ့ ဝေးလှသည်။ ကားမရောက်၍ ကုန်းကြောင်းလျောက်ရသောနေရာတွင်တည်ရှိသည်။
တောင်ယာလုပ်ရင်း မြွေကိုတက်နင်းမိရာမှ အကိုက်ခံရခြင်းဖြစ်သည်။
မြွေဆိုသည့်သတ္တဝါမှာ သွေးအေးသတ္တဝါဖြစ်ပြီး အခြေအနေအများစုတွင် သူကိုမထိပဲကိုက်တတ်သည်က ရှားပါသည်။
ကိုက်သည့်နေရာတွင်လည်းအချို့က အစွယ်နှင့် ခြစ်မိရုံ၊အချို့က ထိမိရုံသာရှိသည်။ အချို့လူနာများတွင်တော့ မြွေက ခဲနေသဖြင့် လွတ်မကျပဲရှိတတ်သည်။
🚨ထို့ကြောင့်ဆရာဝန်ဆရာမတွေကမြွေကိုက်လူနာများတွင် ထိမိရုံ၊ခြစ်မိရုံပဲလား၊ခဲနေသေးလား၊အစွယ်ရာရှိလား၊သွေးထွက်သေးလားစသည်ဖြင့်မေးကြခြင်းဖြစ်ပါသည်။
🚨မြွေကိုက်ခံရသောဒဏ်ရာအတိမ်အနက်ပေါ်မူတည်၍ မြွေဆိပ်ဝင်ရောက်ခြင်း၊ မြွေဆိပ်ပျံ့လွယ်ခြင်း ကွာခြားပါသည်။
အခုဦးမြကတော့ တက်နင်းမိ၍ မြွေက စိတ်နာနာနှင့် မလွတ်တမ်းကိုက်လိုက်ပုံရသည်။ အစွယ်ရာ နှစ်ပေါက်အပြင်သွေးစို့နေသည်။ သို့သော်ထိုဒဏ်ရာကိုတွေ့ဖို့ အချိန်အတော်ယူလိုက်ခဲ့ရပါသည်။ ဖြစ်ပုံမှာလမ်းခရီးဝေးသဖြင့် မြွေဆိပ်ပျံ့နှံ့သွားမည်ကို အစိုးရိမ်လွန်ပြီး ကြားဖူးနားဝဖြင့် ဝိုင်း၍ ကျပ်စည်းပေးလိုက်ကြခြင်းဖြစ်ပါသည်။
အပေါ်ဆုံးက နွယ်ပင်တွေနဲ့ တင်းကျပ်စွာစည်းထားသည်။ တစ်ရစ်ပြီးတစ်ရစ်ဖယ်ထုတ်ပြီးမှ အောက်မှာအဝတ်စဖြင့် စည်းထားသောခြေထောက်ကသွေးမလျှောက်တော့သဖြင့် ညိုမဲနေသည်။ မကြာခင်ပုပ်တော့မည့် အရိပ်အရောင်မြင်နေရပါသည်။
🚨မြွေကိုက်လူနာတွင် ကျပ်စည်းရခြင်းအဓိက အကြောင်းရင်းမှာထိုခြေလက်ကိုလှုပ်ရှားမှု နည်းစေလို၍ဖြစ်သည်။ သွေးကြောတွေပိတ်လောက်တဲ့အထိ ကျပ်စည်းခြင်းမျိုးမှာ အခန့် မသင့်ရင် ခြေလက်များပုပ်သွားပြီးဖြတ်ပြစ်ရသည်အထိဖြစ်တတ်သည်။
ဦးမြကိုကိုက်သည့်မြွေအမျိုးအစားကိုမေးတော့ မမြင်လိုက်ပါဟုပြောသည်။
မြွေပွေးရောမြွေဟောက်ရောပေါသည့်နေရာဖြစ်၍နှစ်မျိုးလုံးဖြစ်နိုင်သည်။ သို့သော်မြွေဟောက်ကိုက်၍ အဆိပ်ပျံ့သည့် လက္ခဏာများ ဖြစ်သည့်မျက်ခွံတွဲကျခြင်း၊လျှာလေး၊အာလေးလာခြင်း၊အောက်ဆီဂျင်ကျခြင်းများကိုကားမတွေ့ရချေ။ ဒါဆိုရင်တော့မြွေပွေး ဖြစ်နိုင်ချေရှိသည်ပေါ့။ သွေးခဲမှုဓါတ်၊ကျောက်ကပ်ဆိပ်၊ဆီးနည်းလာခြင်းရှိမရှိ စသည်တို့ကိုကြည့်ပြီး မြွေပွေး ဆိပ်ဖြေဆေးထိုးရန် ကြိုးစားရတော့သည်။
ကံကောင်း၍ ညိုမည်းပြီးပုပ်လုနီးနီးဖြစ်နေသည့် ခြေထောက်မှာသွေးခုန်နှုန်းနည်းနည်းစမ်းလို့ရသည်။ တစ်ပတ်အကြာမှသာပုံမှန်အရောင်ပြန်ဖြစ်လာသဖြင့် တော်ပါသေးရဲ့ဟုတွေးလိုက်ရတော့သည်။
😁လူနာတွေကတခါတလေမှာတော့ကိုက်သည့်မြွေကိုယူလာပေးတတ်ပါသည်။
တခါက မြွေကိုက်ခံရသည့် လူနာတစ်ယောက် ဆေးရုံလာပို့သည်။ ဘေးမှာဆာလာအိတ်ကြီးတစ်ခုပါလာပြီးထိုအိတ်ကြီးကို ဆရာဝန်ထိုင်သည့်စားပွဲနားမှာလာချသည်။ ကျွန်မလည်းလူနာ၏ အိပ်ရာလိပ်ထုတ်ပဲဟုထင်လို့ ဘာမှမပြောဖြစ်ပဲထားမိပါသည်။ ပြီးမှကိုက်တဲ့မြွေပါလာလားဆိုတော့ ပါလာတယ်လေ ဆရာမဘေးမှာဆိုပြီး အထုတ်ကြီးကိုဖြေပြပါတော့သည်။ ထိုအခါမှ လုံးပတ်ရှစ်လက်မလောက်ရှိသည့် စပါးကြီးမြွေကြီးကိုတွေ့ရတော့သည်။ သေနေလို့သာတော်ပါသေးသည်။
တခါကလည်းမြွေပါလာသည်ဆိုပြီး ကြွပ်ကြွပ်အိတ်အထုတ်ကလေးလာပေးသည်။ ဖွင့်ကြည့်လိုက်တော့ စိစိညက်ညက်ကြေအောင်ထုခံရသောမြွေခေါင်းတစ်ခုဖြစ်နေသည်။ ဆရာမတို့ပဲ မြွေခေါင်းကြည့်ပြီးခွဲလို့ရတယ်ပြောလို့ခေါင်းပဲဖြတ်ယူလာတာလို့ပြောသည်။
🚨ကိုက်သည့်မြွေခေါင်းကိုကြည့်ပြီး မြွေပွေး ဆိုရင်အကွက်ပါသည်။ မြွေဟောက်ဆိုရင်တော့ ဂငယ်ပုံ
ပါးပျဥ်းပါသည်၊အစွယ်ဘယ်လိုစသည်ဖြင့်ခွဲခြားရသည်ကတော့မှန်ပါသည်။ ဒါပေမယ့်ထိုစိစိညက်ညက်ကြေနေသော မြွေခေါင်းကိုကြည့်ပြီးတော့ ရယ်ရအခက်၊စိတ်ဆိုးရအခက်ဖြစ်ခဲ့ရပါတော့သည်။
🚨မြွေခေါင်းတင်မက၊မြွေအမြီးကိုလည်းကြည့်ပြီးခွဲခြားရပါသေးသည်။ မြွေပွေးဆိုရင်အမြီးတုတ်၍တုံးတတ်ပြီးမြွေဟောက်ဆိုရင်အမြီးလုံးချွန်၍သွယ်တတ်သည်။ မြွေစိမ်းမြီးခြောက်ဆိုရင်မြွေစိမ်းပင်မယ့် အမြီးထိပ်ကတော့ အညိုရောင်ဖြစ်နေတတ်ပါသည်။
🚨သို့သော်စပ်မြွေများ၊အမျိုးအစားကွဲပြားသောမြွေများရှိနိုင်သဖြင့် ပုံသဏ္ဍာန်ကြည့်ပြီးတသမတ်တည်းပြောလို့မရနိုင်ပါချေ။
တခါကတော့ ရွာဓလေ့ထုံးစံအတိုင်း မြွေအမြီးကိုဖြတ်၍မျိုချလာသည်ဟုပြောလေသည်။
ထိုအလေ့အထများသည် အရိုးစွဲနေသော်လည်းမှားယွင်းသောအပြုအမူများဖြစ်ပါသည်။ မြွေအမြီးကိုမျိုချခြင်းဖြင့် မည်သည့်အကျိုးကျေးဇူးမှမရနိုင်ပါ။ မြွေကိုက်ခံရသောနေရာတွင် ကိုက်သည့်မြွေ၏ဦးခေါင်းကိုကျင်းတူး၍ မြှုပ်သည်ဆိုသောရွာဓလေ့ထုံးစံလည်းတွေ့ကြုံခဲ့ရသေးသည်။တခါက ရွာ ဘက်ကလာသောလူနာတစ်ယောက် ၊ခြေထောက်မှာမြွေကိုက်ခံရသည်ဟုပြောပြီးလာပါသည်။ကြည့်လိုက်တော့ခြေထောက်တစ်ခုလုံးရောင်ကိုင်းကာ အပေါက်ရာတွေအများကြီးဖြစ်နေသည်။ မြွေက ဘယ်နှစ်ကြိမ်တောင်ကိုက်ခဲ့တာလဲလို့မေးမှ အစွယ် အရာသေးသေးလေးနှစ်ခုကိုပြလေသည်။ ကျန်တာတွေက ရွာဓလေ့ထုံးစံအရ စုတ်ထိုးလာခြင်းဖြစ်ပါသည်လို့ပြောပြပါသည်။ သူ့ကိုကိုက်သောမြွေက အဆိပ်မရှိသော်လည်း စုတ်ထိုးလာခြင်းရဲ့ အကျိုးကြောင့် ခြေထောက်ပိုးဝင်ရောင်ရမ်းခြင်း(Cellulitis)ဖြစ်သွားသဖြင့်ပိုးသတ်ဆေး ထိုးဆေးများထိုးကာ ရက်အတော်ကြာ ဆေးရုံတွင် ကုသလိုက်ရပါတော့သည်။
🚨 မြွေကိုက်ဒဏ်ရာကိုစုတ်ဖြင့်ထိုးခြင်း၊ဓါးဖြင့်ခွဲခြင်းများသည်မြွေဆိပ်ကိုသာပို၍ပျံ့နှံ့စေပါသည်။ အကျိုးမရှိပါ။ တခါတရံတွင်ဘယ်တစ်ခုကမြွေကိုက်ရာလည်းတောင်ခွဲခြားလို့မရသော အခြေအနေကိုဖြစ်စေပါသည်။
အလားတူမြွေကိုက်လူနာကို မက်ကလောင် ဖေါက်သည့် အလေ့အထလည်းထိုအရပ်ဒေသတွင် တွေ့ရပါသည်။ ခြေထိပ်၊လက်ထိပ်၊စအိုထိပ်များကိုသွေးထွက်အောင်အပ်ဖြင့်ဖေါက်ခြင်းဖြစ်သည်။မသန့်သည့်အပ်၊ပိုးသတ်ခြင်းမလုပ်ထားသောအပ်ကိုအသုံးပြုခြင်းဖြင့်ရောဂါပိုးမျိုးစုံကူးစက်စေပါသည်။
ထို့အပြင် ဘယ်သူကစပြီး တည်ထွင်လိုက်သည်မသိ။ မြွေဆိပ်ကို ပါးစပ်ဖြင့် စုပ်ယူသော အလေ့အထကို အချို့သောရုပ်ရှင်ဇာတ်ကားများတွင်တွေ့နေရသည်။ အခန့်မသင့်ပါက အကိုက်ခံရသူကော၊ကယ်သူကောနှစ်လောင်းပြိုင်ဖြစ်နိုင်သည့် အလွန်အန္တရာယ်များလှသော အပြုအမူပင်ဖြစ်ပေတော့သည်။
တိုက်နယ်ဆေးရုံ လေးတစ်ခု တွင် တာဝန်ကျ စဥ်ကတော်တော်လေးမိုးချုပ်မှ မြွေကိုက်လူနာတစ်ယောက်ရောက်လာခဲ့သည်။ ဖြစ်စဥ်ကိုမေးတော့မနက်ကတည်းကမြွေကိုက်ခံရပြီး ရွာကဘိုးတော်ဆီမှာ သွားမန်းနေကြောင်းပြောသည်။ဘိုးတော်ကမန်းနေရင်းမျက်ခွံတွေကျလာ၊လျာလေးအာလေးဖြစ်လာမှမနိုင်တော့၍ဆေးရုံလွှတ်လိုက်ခြင်းဖြစ်သည်။ဆေးရုံရောက်ချိန်တွင် မြွေဟောက်ကိုက်၍ မြွေဆိပ်ပျံ့သည့်လက္ခဏာများတွေ့နေရပြီဖြစ်ပြီး မြွေဟောက်အ ဆိပ်ဖြေဆေးထိုးကာ အောက်ဆီဂျင်ပေးသော်လည်းထိုလူနာကိုကယ်တင်နိုင်ခြင်းမရှိခဲ့ပါ။
မြို့ရှိသင်ကြားရေးဆေးရုံတွင်တာဝန်ကျစဥ်က မြွေဟောက်ကိုက်ခံရသောလူနာမှန်းသေချာပါကမြွေဆိပ်ဖြေဆေးထိုးပြီးအသက်ရှုစက်ရှိသော အထူးကြပ်မပ်ကုသဆောင်တွင်သာကုသခဲ့ရသည်ပဲဖြစ်သည်။ လူနာအများစုမှာပြန်ကောင်းသွားသည်သာဖြစ်သည်။ အကယ်၍ယခုလူနာတွင်လည်းမန်းမှုတ်မနေပဲဒီထက်အချိန်နည်းနည်းစော၍သာရောက်လာခဲ့ရင်၊မြွေဆိပ်ဖြေဆေးစောစောပေးရရင် အသက်ရှင်နိုင်ကောင်းရဲ့ဟုကျွန်မတွေးမိပါသည်။
🚨 အဆိပ်မရှိသောမြွေကိုက်ခံရလျင်တော့ မန်းမှုတ်ခြင်း၊မက်ကလောင် ဖောက်ခြင်းပြုလုပ်သည်ဖြစ်စေ၊ဘာမှမလုပ်ပဲစောင့်ကြည့်သည်ဖြစ်စေ ပြန်ကောင်းသွားမည်သာဖြစ်သည်။
🚨သို့သော်မြွေပွေးမြွေဟောက် ၊ငန်းတော်ကြား အစရှိသည့် အဆိပ်ရှိသောမြွေကိုက်ခံရလျင်တော့ အချိန်မီမြွေဆိပ်ဖြေဆေးထိုးမှသာ အသက်ကယ်နိုင်မည်ဖြစ်ပါသည်။
နောက်ထပ်လူနာတစ်ယောက်ကတော့ မြွေပွေးအကိုက်ခံရသောလူနာဖြစ်ပြီး ဆီးမထွက်တော့ပဲကျောက်ကပ်ဆိပ်များတက်နေသော လူနာဖြစ်ပါသည်။ လူနာက သောက်ချင်လှပါသည်ဆို၍ ဆရာဝန်၊ ဆရာမများမရှိချိန်တွင် လူနာစောင့်က အုန်းရည်ဝယ်တိုက်သည်။ သွေးတွင်းပိုတက်ဆီယမ်ဓါတ်တွေများလာပြီး နှလုံးစည်းချက်မမှန်မှု ဖြစ်လာသဖြင့် အရေးပေါ်နှလုံးစက်နှိုးပြီး ( Defibrillation) ကုသရသည်အထိဖြစ်ခဲ့သည်။ ကံမကောင်းသဖြင့်ထိုလူနာ၏ အသက်ကိုမကယ်လိုက်နိုင်ခဲ့ပါချေ။
🚨မြွေပွေးကိုက်သောလူနာတွင်ဆီးနည်းသွားခြင်း၊ဆီးမထွက်တော့ခြင်းသည်အရေးကြီးသောလက္ခဏာဖြစ်ပါသည်။ အုန်းစိမ်းရေ၊သစ်သီးဖျော်ရည်များလုံးဝမတိုက်သင့်ပါ။
အလားတူမြွေပွေး ကိုက်ပြီး ကျောက်ကပ်ဆိပ်တက်နေသောလူနာမျိုးများစွာကိုမြို့ပေါ်ဆေးရုံတွင် တာဝန်ကျနေသောအချိန်ကတွေ့ကြုံဖူးခဲ့ပါသည်။ ထိုစဥ်ကတော့ ကျောက်ကပ်ဌာနသို့လွှဲကာ အချိန်မီကျောက်ကပ်ဆေးခြင်းဖြင့်လူနာတို့၏အသက်ကိုကယ်နိုင်ခဲ့ဖူးပါသည်။
"အသက်ကိုဉာဏ်စောင့်သည်" ဟူ၍ ဆိုရိုးစကားရှိပါသည်။
မြွေကိုက်ခံရသောလူနာချင်းအတူတူ၊ ကိုက်သည့်မြွေချင်းအတူတူ အချို့မှာ အသက်ရှင်၍ အချို့မှာ အသက်ဆုံးကြရသည်။ မြွေကိုက်မခံရအောင် ကြိုတင်ကာကွယ်နိုင်ပါကတော့ပိုကောင်းပါသည်။
အကယ်၍သာလူတိုင်းကျန်းမာရေးအသိပညာတိုးတက်လာပါက မတော်တဆမြွေကိုက်ခံရခဲ့သည်ရှိသော်ဆောင်ရန် ရှောင်ရန်များ ကိုလိုက်နာဆောင်ရွက်ခြင်းဖြင့် မိမိအသက်ကိုမိမိကံစွမ်းဉာဏ်စွမ်းရှိသလောက်ကာကွယ်နိုင်မည်ဟုသာယူဆမိပါတော့သည်။

26/08/2026

🤔ဘယ်လိုခေါင်းကိုက်ခြင်းမျိုးကစိုးရိမ်စရာလိုသလဲ။

🚨 ရုတ်တရက်မိုးကြိုးပစ်ခံရသလိုပြင်းပြင်းထန်ထန် ခေါင်းကိုက်ခြင်း၊ ( Thunderclap headache) (ဦးနှောက် အတွင်း သွေးကြော ပေါက် ခြင်း ကြောင့် ဖြစ် နိုင်သည်။)
🚨ခေါင်းတခြမ်းကိုက်ခြင်းနှင့်အတူ မျက်လုံးတစ်ဖက်နာကျင်ခြင်း၊ မျက်ရည်ပူကျခြင်း။
🚨ခေါင်းကိုက်ခြင်းနှင့်အတူ ဖျားခြင်း၊ အသက်ရှုကျပ်ခြင်း၊ လည်ပင်းတောင့်နေခြင်း၊ အရေပြားအကွက်များပေါ်ခြင်း၊(ဦးနှောက်အမြှေးရောင်ခြင်းကြောင့်ဖြစ်နိုင်သည်။)
🚨ခေါင်းထိခိုက်ဒဏ်ရာရထားခြင်း
🚨ခါးရိုးခြင်ဆီဖေါက်ထားပြီး (သို့မဟုတ်) ခါးအောက်ပိုင်းထုံဆေးပေးထားပြီးနောက်တွင်ဖြစ်သောခေါင်းကိုက်ခြင်း၊
🚨အသက် (55) နှစ်ကျော်မှ စတင်အသစ်ဖြစ်သော ခေါင်းကိုက်ခြင်း၊ ပုံမှန်ဖြစ်နေကျခေါင်းကိုက်ခြင်းမှကွဲထွက်ခြင်း၊
🚨ကိုယ်ဝန်ဆောင်များတွင်သွေးတိုးခြင်းနှင့်အတူ ခေါင်းကိုက်ခြင်း၊
🚨ခေါင်းကိုက်ခြင်းနှင့်အတူ
💢ခြေလက်များလေးသွားခြင်း၊ လေဖြတ် ခြင်း၊
💢ခေါင်းမူးခြင်း၊
💢မနက်အိပ်ရာထချိန်တွင်ဖြစ်ခြင်း၊ ထိုးအန်ခြင်း၊
💢သတိလစ်သွားခြင်း၊
💢တက်သွားခြင်း၊
💢မျက်နှာထုံကျင်ခြင်း၊
💢ရုတ်တရက်ဟန်ချက်မညီပဲ ဟိုယိုင် ဒီယိုင်ဖြစ်ခြင်း၊ လဲခြင်း၊
💢ခြေလက်များထုံကျင်လာခြင်း၊
💢စကားပြော လေးလာခြင်း၊ လျှာလိပ်ခြင်း
💢သတိကောင်းစွာမရခြင်း၊
💢ပြုမူလှုပ်ရှားပုံများမူမမှန်တော့ခြင်း
💢မျက်စိကောင်းစွာမမြင်ရခြင်း၊ ဝေဝါးလာခြင်း၊ နှစ်ထပ်မြင်ရခြင်း စသည်တို့ရှိပါက စိုးရိမ်ရန်လိုအပ်ပါသည်။

24/08/2026

Transient Ischaemic Attack
(TIA)
တခဏတာလေဖြတ်သွားခြင်း

🧑‍⚕️ တခဏတာလေဖြတ်သွားခြင်းကို လေဖြတ်ခြင်းအငယ်စား(mini -strokes) ဟု မှားယွင်းခေါ်ဆိုလေ့ရှိကြသည်။ အမှန်တကယ်တော့ ထိုတခဏတာလေဖြတ်ခြင်းများသည်လည်း လေဖြတ်ခြင်းကဲ့သို့ အရေးပါပြင်းထန်ပြီး ရှေ့ပြေးအကြို လက္ခဏာလည်းဖြစ်ပါသည်။

🤔Transient Ischaemic Attack ဆိုတာဘာလဲ။
🧑‍⚕️တခဏတာ (24) နာရီအတွင်းပြန်ကောင်းသွားသော လေဖြတ်ခြင်းဖြစ်ပါသည်။
👉ဖြစ်ရသည့် အကြောင်းရင်းမှာ ဦးနှောက်အတွင်းဆဲလ်များကိုထောက်ပံ့နေသော သွေးလှည့်ပတ်မှုခဏတဖြုတ်ရပ်သွားခြင်းကြောင့်ဖြစ်ပါသည်။ သွေးလှည့်ပတ်မှုမရသည့် တခဏတွင် ဦးနှောက်အတွင်း ဆဲလ်များအလုပ်ကောင်းစွာမလုပ်တော့ပဲ အချိန်ကြာလာသည်နှင့်အမျှသေဆုံးသွားနိုင်ပါသည်။ အချို့မှာနာရီပိုင်းအတွင်းပြန်ကောင်းသွားတတ်သော်လည်း ခဏတဖြုတ်လေဖြတ်ခြင်းသည် အရေးပေါ်အခြေအနေဖြစ်ပြီးကုသမှုလိုအပ်ပါသည်။

🤔ခဏတဖြုတ်လေဖြတ်ခြင်း(Transient Ischaemic Attack) ၏ရောဂါလက္ခဏာတွေကဘာတွေလဲ။
🧑‍⚕️ အောက်ပါလက္ခဏာများအနက်မှ တစ်ခုသို့မဟုတ်တစ်ခုထက်ပို၍ဖြစ်နိုင်ပါသည်။
👉ကိုယ်တစ်ခြမ်းလေးလံသွားခြင်း၊အားနည်းသွားခြင်း၊မလှုပ်ရှားနိုင်ပဲဖြစ်သွားခြင်း
👉 စကားပြောရန်ခက်ခဲခြင်း၊စကားမပြောနိုင်ပဲဖြစ်သွားခြင်း၊
👉 စကားပြောလေးလာခြင်း၊သို့မဟုတ်စကားလုံးမပီပြင်ပဲ ပလုံးပထွေးဖြစ်ခြင်း
👉 မျက်နှာတစ်ခြမ်းရှိကြွက်သားများကောင်းစွာမလှုပ်ရှားနိုင်ခြင်း၊သို့မဟုတ်မျက်နှာရွဲ့စောင်းသွားခြင်း
👉 ရုတ်တရက်အမြင်အာရုံတစိတ်တပိုင်း၊သို့မဟုတ်အားလုံးကွယ်သွားခြင်း၊မျက်စိရှေ့တွင်ကန့်လန့်ကာချလိုက်သကဲ့သို့ဖြစ်သွားခြင်း၊
👉အမြင်အာရုံဝါးလာခြင်း၊နှစ်ထပ်မြင်ခြင်း
👉ရုတ်တရက်နားမကြားတော့ခြင်း
👉အနံ့မရခြင်း
👉အရသာမသိတော့ခြင်း
👉ခြေလက် ထုံနေပြီးထိတွေ့ခြင်းကိုမသိခြင်း
👉 ဟန်ချက်ညီအောင်မထိန်းနိုင်ပဲ ဒယိမ်းဒယိုင်ဖြစ်ခြင်း
👉ခေါင်းမူးခြင်း၊ချာချာလည်ခြင်း
👉ပျို့ခြင်း၊အန်ခြင်း
👉 လည်ပင်းတောင့်နေခြင်း
👉 စိတ်ကျလွယ်တက်လွယ်ဖြစ်ခြင်း၊ပုံမှန်ပြုမူပုံမှ ကွဲထွက်ခြင်း
👉စိတ်ရှုပ်ထွေးခြင်း၊ဒေါသထွက်လွယ်ခြင်း
👉သတိမေ့လွယ်ခြင်း
👉 ရုတ်တရက်ပြင်းထန်စွာခေါင်းကိုက်ခြင်း
👉မူးမေ့သွားခြင်း၊သတိလစ်လဲကျသွားခြင်း
စတာတွေထဲကတစ်ခု(သို့မဟုတ်) တစ်ခုထက်ပို၍ဖြစ်နိုင်ပါသည်။

🤔နောက်ဆက်တွဲပြဿနာ တွေက ဘာတွေ လဲ။
🧑‍⚕️ခဏတဖြုတ်လေဖြတ်ခြင်း သည်အရေးပေါ်အခြေအနေဖြစ်ရသည့်အကြောင်းရင်းမှာ လေဖြတ်ခြင်း၏ရှေ့ပြေးအကြို လက္ခဏာ ဖြစ်သောကြောင့်ဖြစ်ပါသည်။
🚨20 % သောလူနာများတွင် ရက်ပေါင်း ( 90)အတွင်းလေဖြတ်ခြင်းဖြစ်တတ်ပြီး၎င်းတို့ထဲမှတစ်ဝက်ခန့်မှာ ခဏတစ်ဖြုတ်လေဖြတ်ခြင်းဖြစ်ပြီး (2)ရက်အတွင်းဖြစ်တတ်ပါသည်။

🤔ဘယ်အကြောင်းတွေကြောင့် ဖြစ်နိုင်သလဲ။
🧑‍⚕️သွေးကြောပိတ်၍လေဖြတ်ခြင်း (Ischaemic stroke) နှင့် TIA (Transient ischemic attacks) တခဏတာလေဖြတ်သွားခြင်းတို့သည် တူညီသောအကြောင်းရင်းကြောင့်ဖြစ်ပါသည်။
👉 ဦးနှောက်အတွင်း သွေးခဲပိတ်ဆို့ခြင်း(thrombosis)
👉 ခန္ဓာကိုယ်အတွင်းမည်သည့်နေရာတွင်မဆိုဖြစ်ပေါ်နိုင်သော သွေးခဲ ( ဥပမာခြေသလုံးသွေးပြန်ကြောတွင်းသွေးခဲပိတ်ဆို့ခြင်း၊) မှသွေးလှည့်ပတ်မှုအတိုင်းသွား၍ ဦးနှောက်အတွင်း ပိတ်ဆို့ခြင်း(thromboembolism)
👉 ဦးနှောက်အတွင်း သွေးကြောငယ်လေးများကိုလက်စထရောစုပုံရာမှ ပိတ်ဆို့ခြင်း(Lacunar stroke)
👉 အကြောင်းရင်းသေချာမသိရပဲဖြစ်ခြင်း (Cryptogenic TIA)
စတာတွေကြောင့်ဖြစ်နိုင်ပါသည်။

🤔ဘယ်လိုလူမျိုးတွေမှာခဏတဖြုတ်လေဖြတ်ခြင်း (Transient Ischaemic Attack) ဖြစ်တတ်သလဲ။
👉သွေးတိုးရောဂါရှိသူများ
👉ဆီးချိုရောဂါရှိသူများ
👉 ဆေးလိပ်သောက်သူများ၊ V**e သုံးစွဲသူများ
👉 နှလုံးစည်းချက်မမှန်သည့်ရောဂါရှိသူများ (Atrial Fibrillation)
👉 အရင်ကလေဖြတ်ဖူးခြင်း(သို့မဟုတ်)ခဏတဖြုတ်လေဖြတ်ခြင်းဖြစ်ဖူးသူများ
👉နှလုံးရောဂါရှိသူများ
👉သွေးတွင်းကိုလက်စထရော များ သူများ
👉အဝလွန်သူများ
👉 သွေးနီဥဆဲလ်များ ပုံမှန်မရှိသူများ (polycythemia, sickle cell anaemia)
👉 ကိုဗစ်ရောဂါဖြစ်ဖူးသူများ(သွေးပျစ်ခြင်းကြောင့်)
👉အရက်အလွန်အကျွံသောက်သူများ
👉စိတ်ကြွဆေးနှင့်မူးယစ်ဆေးဝါးသုံးစွဲသူများ
👉အသက်အရွယ်ကြီးသူများ(>55နှစ်)
👉အမျိုးသားများတွင်ခဏတဖြုတ်လေဖြတ်ခြင်းအဖြစ်များပါသည်။

🤔ခဏတဖြုတ်လေဖြတ်ခြင်းဖြစ်မှန်းဘယ်လိုသိနိုင်မှာလဲ။
🧑‍⚕️ဆရာဝန်တွေက ရောဂါရာဇဝင်ကိုမေးမြန်းခြင်း၊စမ်းသပ်စစ်ဆေးခြင်းအပြင် လိုအပ်ပါကသံလိုက်ဓါတ်မှန်ရိုက်ခြင်း(MRI) ၊ ကွန်ပျူတာဓါတ်မှန်ရိုက်ခြင်း(CT) ၊လည်ပင်းသွေးကြောကိုစစ်ဆေးခြင်း( carotid doppler) စတာတွေပြုလုပ် ရန်လိုအပ်ပါသည်။
🚨သို့ရာတွင်ခဏတဖြုတ်လေဖြတ်ခြင်း သည်ကွန်ပြူတာဓါတ်မှန်နှင့် သံလိုက်ဓါတ်မှန် တို့တွင်ဘာမှမတွေ့ရပဲရှိတတ်ပါသည်။ 🤔ဘယ်လိုကာကွယ်ရမလဲ။
🧑‍⚕️ခဏတဖြုတ်လေဖြတ်ခြင်း (Transient Ischaemic Attack) မဖြစ်ရလေအောင်
👉ဆီးချိုပုံမှန်ထိန်းခြင်း
👉သွေးတိုးရောဂါရှိသူများ တွင်သွေးကျဆေးများပုံမှန်သောက်ခြင်း
👉ကိုယ်အလေးချိန်ပုံမှန်ထိန်းခြင်း၊
👉 ဟင်းသီးဟင်းရွက်ပိုစားခြင်း၊အဆီအစိမ့် လျော့စားခြင်း၊ဆားနှင့် အငန်လျော့စားခြင်း၊
👉 ဆေးလိပ်ဖြတ်ခြင်း ၊ v**e သောက်ခြင်းမှ ရှောင်ကြဥ်ခြင်း
👉အရက်အလွန်အကျွံသောက်ခြင်း မှရှောင်ကြဥ်ခြင်း
👉ကိုလက်စထရော များခြင်းရှိပါကစနစ်တကျကုသမှုခံယူ ခြင်း
👉ရောဂါလက္ခဏာ ပြလာပါကစောစောကုသ မှုခံယူခြင်း
စသည်ဖြင့် ကာကွယ် နိုင် ပါသည်။

လူတိုင်းကျန်းမာ ရေးကို လက်လှမ်း မှီ စေရန်
ရည် သန်လျက်
Yangon Medical Network

References
https://my.clevelandclinic.org/health/diseases/14173-transient-ischemic-attack-tia-or-mini-stroke
https://www.mayoclinic.org/diseases-conditions/transient-ischemic-attack/symptoms-causes/syc-20355679
Davidson's Principles and Practices of Medicine

19/08/2026

Long term use of Analgesic
အကိုက်အခဲပျောက်ဆေးများ ကြာရှည်စွဲသောက်ခြင်း၊များများထိုးခြင်းကြောင့်ဘာဖြစ်နိုင်သလဲ။
🧑‍⚕️ ခါးနာခြင်း ၊ဒူးနာခြင်းစသောရောဂါများတွင် အကိုက်အခဲပျောက်ဆေးများ ကြာရှည်စွဲသောက်လေ့ရှိကြသည်။တချို့ကအကိုက်အခဲပျောက်ဆေးထိုးမှ သက်သာသည်ဟုပြောကြသည်။
အမှန်တကယ်တော့ဆေးတိုင်းတွင် ဘေးထွက်ဆိုးကျိုးရှိပြီးစွဲသောက်သည့် ၊(သို့မဟုတ်) ထိုးသည့်အကိုက်အခဲပျောက်ဆေးပေါ်မူတည်၍ ဘေးထွက်ဆိုးကျိုးကွာခြားပါသည်။
👉ပါရာစီတမောလိုအပျော့စားအကိုက်အခဲပျောက်ဆေးများသည် ပုံမှန်အားဖြင့်တော့ဘေးထွက်ဆိုးကျိုးနည်းပါသည်။ သို့သော်နဂိုအသည်းရောဂါအခံရှိသူများ၊အရက်အလွန်အကျွံသောက်သူများတွင် ပမာဏပေါ်မူတည်၍အသည်းရောင်ခြင်း၊အသည်းထိခိုက်ပျက်ဆီးခြင်းဖြစ်နိုင်ပါသည်။
👉 Ibuprofen, Diclofenac အစရှိသည့် အကိုက်အခဲပျောက်ဆေးများ ကြောင့် အစာအိမ်အနာဖြစ်ခြင်း၊အစာအိမ်အတွင်းသွေးစိမ့်ခြင်း၊ကျောက်ကပ်ထိခိုက်ခြင်း၊ သွေးတိုးခြင်း၊လူကြီးများတွင် ရုတ်တရက်နှလုံးထိခိုက်ခြင်းများအဖြစ်များပါသည်။
Diclo ကဲ့သို့အကိုက်အခဲပျောက်ဆေးထိုးဆေးများကြောင့် အခန့်မသင့်ပါက ဓါတ်မတည့်ခြင်း ၊သွေးပေါင်ချိန်ပြုတ်ကျခြင်း၊Shockရခြင်း၊ သွေးလန့်ခြင်းများဖြစ်နိုင်သည်။
မကျွမ်းကျင်သူများနှင့်ဆေးထိုးရာမှ ဆေးထိုးကြိတ်၊ ဆေးထိုးအနာဖြစ်ခြင်း၊အာရုံကြောထိခြင်းများဖြစ်တတ်သည်။
👉Tramadol, Morphine စသည့် မူးယစ်ဆေးပါသည့်အကိုက်အခဲပျောက်ဆေးများကိုရေရှည်စွဲသောက်ခြင်းဖြင့်၊ထိုးခြင်းကြောင့် အန်ခြင်း၊ ဝမ်းချုပ်ခြင်း၊အသက်ရှုနှေးခြင်း၊ဆေးစွဲပြီးမသောက်ရမနေနိုင်ဖြစ်ခြင်းစတာတွေဖြစ်နိုင်ပါသည်။
"တန်ဆေးလွန်ဘေး"ဆိုသည့် ဆိုရိုးစကားရှိသောကြောင့် အကိုက်အခဲပျောက်ဆေးများ ကိုရေရှည်စွဲသောက်ခြင်း၊ထိုးခြင်းထက် ဖြစ်စေသော အကြောင်းရင်းကိုရှာဖွေကုသခြင်း၊လိုအပ်ပါကခွဲစိတ်ခြင်းသာပြုလုပ်သင့်ပါသည်။

လူတိုင်း ကျန်းမာ ရေးကို လက်လှမ်း မှီ စေရန်
ရည် သန်လျက်
Yangon Medical Network

17/08/2026

Food poisoning
အစာအဆိပ်သင့်ခြင်း

🤔အစာအဆိပ်သင့်ခြင်းဆိုတာဘာလဲ။
🧑‍⚕️အစာအဆိပ်သင့်ခြင်း( food poisoning) ဆိုသည်မှာသန့်ရှင်းမှုမရှိသော ဘက်တီးရီးယား၊ ဗိုင်းရပ်စ်ပိုး၊ မှိုပိုးနှင့် ကပ်ပါးကောင်ပိုးမွှားများ နှင့်၎င်းတို့မှထုတ်လွှတ်သော အဆိပ်အတောက်များပါဝင်သည့် အစားအသောက်များကိုစားသုံးမိခြင်းကြောင့်ဝမ်းပျက်ဝမ်းလျှောဖြစ်ခြင်း၊ အန်ခြင်းစသည့်ရောဂါလက္ခဏာများဖြစ်ခြင်းကိုခေါ်ပါသည်။
လူ၏ ခန္ဓာကိုယ်သည် အဆိပ်အတောက်များ ပါဝင်သည့် အစားအသောက်များကိုစားမိသည့် ချိန်တွင် ၎င်းအဆိပ်ဓါတ်များကို ခန္ဓာကိုယ်မှစွန့်ထုတ်သန့်စင်ရန် တုံ့ပြန်လေ့ရှိပါသည်။ ထိုသို့တုံ့ပြန် တွင်အန်ခြင်းဖြင့် လည်းကောင်း၊ ဝမ်းလျှောခြင်းဖြင့်လည်းကောင်း၊ နှစ်မျိုးစလုံးဖြင့်လည်းကောင်းတုံ့ပြန်လေ့ရှိပါသည်။ ထိုအချိန်မျိုးတွင် အဖျားလည်း တက်တတ်ပါသည်။
🧑‍⚕️Food-related poisoning ဆိုသည်မှာထိုအစားအစာကိုယ်တိုင်က အဆိပ်ဖြစ်နေခြင်းဖြစ်ပါသည်။ ဥပမာ မစားသင့်သော အဆိပ်ရှိမှိုများ၊အဆိပ်ရှိသော ငါးပူတင်းကဲ့သို့သောငါးများကို စားသုံးမိခြင်းဖြစ်သည်။

🤔အစာအဆိပ်သင့် ခြင်းကြောင့်ဖြစ်သောရောဂါ လက္ခဏာတွေကဘာတွေလဲ။
👉ဝမ်းပျက်ဝမ်းလျှောဖြစ်ခြင်း၊
👉ပျို့ ခြင်း၊ အန်ခြင်း၊
👉ဗိုက်အောင့်ခြင်း၊ ဗိုက်ရစ်နာခြင်း
👉ဖျားခြင်း
👉ခေါင်းကိုက်ခြင်း
👉အားနည်းသလိုခံစားရခြင်း
👉ပြင်းထန်ပါကသွေးပေါင်ပြုတ်ကျ၍ shock ရခြင်း၊
👉အချို့သောအစာအဆိပ်သင့်ခြင်းများတွင်ခြေလက်များပျော့ ခွေ၍ မလှုပ်ရှားနိုင်ပဲဖြစ်သွားခြင်း
👉အချို့သောမှိုအဆိပ်သင့်ခြင်းများတွင်အသည်းပျက်စီးခြင်း၊ ကျောက်ကပ်ပျက်စီးခြင်း၊ ဂယောင်ခြောက်ခြားဖြစ်ခြင်း၊
👉အသက်သေဆုံးခြင်းအထိဖြစ်နိုင်ပါသည်။

🤔အစားအစာစားပြီးဘယ်လောက်ကြာရင် ရောဂါလက္ခဏာပြတတ်သလဲ။
🧑‍⚕️စားသုံးသော အစားအသောက်အမျိုးအစား၊ ပမာဏအနည်းအများ၊ ဖြစ်ပွားသောရောဂါပိုးမွှား၊ အဆိပ်အတောက်များတစ်မျိုးနှင့်တစ်မျိုးမတူညီသောကြောင့် ၎င်းတို့အပေါ်တွင်မူတည်၍ ရောဂါလက္ခဏာပြချိန်ကွာခြားပါသည်။ အချို့မှာစားသောက်ပြီးနာရီပိုင်းအတွင်းဖြစ်တတ်ပြီးအချို့မှာရက်အတော်ကြာမှဖြစ်လေ့ရှိပါသည်။

🤔အစာအဆိပ်သင့်ခြင်း ကိုဖြစ်စေသော အဆိပ်အတောက်တွေက ဘာတွေလဲ။
👉ဘက်တီးရီးယားများ
👉ဗိုင်းရပ်စ်ပိုး များ
👉ပါရာဆိုက်ခေါ် ကပ်ပါးကောင်များ
👉မှိုပိုးများ
👉အဆိပ်အတောက်များ
👉အချို့သောငါးများ၊ ပင်လယ်စာများ၊ အသီးအရွက်များ
👉အချို့သော စားသုံးရန်မသင့်သည့်မှိုများ
👉ဓါတုပစ္စည်းများ
စသည်တို့ကြောင့်ဖြစ်နိုင်သည်။

🤔အစာအဆိပ်သင့်ခြင်း ကကူးစက်တတ်သလား။
🧑‍⚕️အစာအဆိပ်သင့်ခြင်းသည်ပိုးမွှားများကြောင့် အများဆုံးဖြစ်လေ့ရှိသဖြင့် ၎င်းပိုးမွှားပါဝင်သောအစားအသောက်များကို စားသုံးမိခြင်းမှလည်းကောင်း၊ ရောဂါဖြစ်ပွားသူ၏ အန်ဖတ်၊ မစင်စသည်တို့နှင့်ထိတွေ့မိခြင်း၊ ၎င်းအညစ်အကြေးများကိုယင်နားခြင်း၊ ထိုယင်ကောင်များက အစားအသောက်များအပေါ်တဖန်ပြန်နားခြင်း၊ အညစ်အကြေးအမှုန်အမွှားများ၊ ပိုးမွှားများ၊ အဆိပ်အတောက်များဖြင့် ရောနှောနေသောသောက်ရေ၊ သုံးရေများမှ လည်းကောင်းကူးစက်နိုင်ပါသည်။

🤔ဘယ်သူတွေမှာအစာအဆိပ်သင့်ခြင်းအများဆုံးဖြစ်လေ့ရှိသလဲ။
🧑‍⚕️မည်သူမဆို ကျားမအသက်အရွယ်မရွေးအစာအဆိပ်သင့်ခြင်းဖြစ်နိုင်ပါသည်။
💢ရောဂါလက္ခဏာများသည်လူနာ၏ ကိုယ်ခံအားတုံ့ပြန်မှု၊ စားမိသောအစားအစာအတွင်းပါဝင်သောပိုးမွှားအဆိပ်အတောက်ပမာဏအနည်းအများ၊ ပြင်းထန်မှုစသည်တို့အပေါ်မူတည်၍ ရောဂါလက္ခဏာ၊ ပြင်းထန်မှုစသည်တို့ကွာခြားပါသည်။
လူအများစုတွင် အလိုအလျောက်ပြန်ကောင်းသွားတတ်သော်လည်း
💢အသက်(5) နှစ်အောက်ကလေးများ
💢ကိုယ်ဝန်ဆောင်များ၊
💢အသက် ( 65) နှစ်အထက် သက်ကြီးရွယ်အိုများ၊
💢HIV နှင့်ကိုယ်ခံအားကျဆင်းသည့်ရောဂါရှိသူများ၊
💢စတီးရွိက်ကဲ့သို့သောဆေးများကို ရေရှည်စွဲသောက်နေရသူများ၊
💢နဂိုရောဂါအခံရှိသူများတွင် ပြင်းထန်တတ်ပါသည်။

🤔အစာအဆိပ်သင့်ခြင်း ၏နောက်ဆက်တွဲပြဿနာတွေကဘာတွေလဲ။
👉ပြင်းထန်သောအစာအဆိပ်သင့်ခြင်းများတွင်ရေနှင့် ဓါတ်ဆားများဆုံးရှုံးခြင်းကြောင့် သွေးပေါင်ချိန်ပြုတ်ကျခြင်း၊ (Shock) ရခြင်း၊
👉ကျောက်ကပ်ပျက်စီးခြင်း
👉ဦးနှောက်အမြှေးပါးရောင်ခြင်း
👉အကြောသေရောဂါဖြစ်ခြင်း( Guillain-Barré syndrome)
👉Listeria ဘက်တီးရီးယားကြောင့်ဖြစ်သောအစာအဆိပ်သင့်ခြင်းကြောင့် ကိုယ်ဝန်ဆောင်များ တွင် ကိုယ်ဝန်ပျက်ကျခြင်း၊ မွေးစကလေးသေဆုံးခြင်း၊ ကလေးတွင် ဦးနှောက်အာရုံကြောရောဂါဖြစ်ခြင်း
👉ဆာမိုနဲလား (salmonella) ဘက်တီးရီးယားကြောင့်ဖြစ်သောအစာအဆိပ်သင့်ခြင်းကြောင့် အဆစ်ရောင်ခြင်း စသည်တို့ဖြစ်သွားနိုင်ပါသည်။

🤔ဘယ်လိုအစားအစာမျိုးတွေက အစာအဆိပ်သင့်ခြင်း ဖြစ်တတ်သလဲ။ 👉သန့်ရှင်းမှုမရှိခြင်း၊
👉ကောင်းမွန်စွာချက်ပြုတ်ထားမှုမရှိခြင်း
👉မှန်ကန်သော အပူချိန်တွင်သိမ်းဆည်းထားမှုမရှိခြင်း၊
👉အစားအသောက်များကိုင်တွယ်၊ ဆေးကြော၊ ချက်ပြုတ်ရာ တွင်သန့်ရှင်းမှုမရှိခြင်း၊
👉မစားသင့်သောအစားအစာများ (ဥပမာ အဆိပ်ရှိသောမှိုများ၊ ပုံမှန်စားနေကျမဟုတ်သောအသီးအရွက်များ၊ အသား၊ ငါးများကိုစားသုံးမိခြင်း)
👉အသားငါးများကိုအစိမ်းစားခြင်း ( ဥပမာကြက်ဥအစိမ်းစားခြင်းကြောင့်salmonella ဆာမိုနဲလားဘက်တီးရီးယားပိုးမွှားများကြောင့်ဖြစ်သော အစာအဆိပ်သင့်ခြင်း ဖြစ်နိုင်သည်။)
👉ကောင်းစွာကြိုချက် ပိုးသန့်စင်ထားခြင်းမရှိသော နို့နှင့် နို့ထွက်ပစ္စည်းများစားမိခြင်း
👉ကောင်းစွာချက်ပြုတ်ပြင်ဆင်ထားခြင်းမရှိသော ပင်လယ်စာများစားမိခြင်း

🤔အစာအဆိပ်သင့်ခြင်းမဖြစ်အောင်ဘယ်လိုကာကွယ်ရမလဲ။
👉သန့်ရှင်းသော သောက်ရေ၊ သုံးရေရအောင်ဆောင်ရွက်ခြင်း၊ မရပါက ရေကိုကြိုချက်၍ သောက်သုံး ခြင်း၊
👉အသား၊ ငါး၊ ဟင်းသီးဟင်းရွက်များကိုကောင်းစွာဆေးကြောသန့်စင်ခြင်း၊ ကောင်းစွာကျက်အောင်ချက်ပြုတ်ခြင်း၊
👉နို့နှင့်နို့ထွက်ပစ္စည်းမျာကို သေချာစွာပိုးသန့်စင်ခြင်း၊ ချက်ပြုတ်ခြင်း၊
👉အစားအသောက်များကိုသင့်တင့်သော အပူချိန်တွင်ကောင်းစွာသိုလှောင်သိမ်းဆည်းခြင်း၊
👉အစာအဆိပ်သင့်ခြင်းဖြစ်နေပါအစားအသောက်များကိုင်တွယ်ချက်ပြုတ်ခြင်းမှရှောင်ကြဥ်ခြင်း၊
👉မှိုတက်နေသောအစားအစာများကိုရှောင်ကြဥ်ခြင်း၊
စသည်တို့ ပြုလုပ်သင့်ပါသည်။

🤔အစာအဆိပ်သင့် ခြင်း ကစိုးရိမ်ရသလား။
🧑‍⚕️အစာအဆိပ်သင့်ခြင်းအများစုသည်(24) နာရီမှ(48) နာရီအတွင်းပြန်ကောင်းသွားတတ်ပါသည်။ သို့သော်ကပ်ပါးကောင်ပိုးမွှားများကြောင့်ဖြစ်သောအစာအဆိပ်သင့်ခြင်း များတွင် ပို၍ အချိန်ကြာနိုင်ပါသည်။
👉လူနာ၏ ခန္ဓာကိုယ်အတွင်း ပိုးမွှားအဆိပ်အတောက်များဘယ်လောက်ဝင်သွားသလဲ။
👉ဘယ်လိုပိုးမွှားတွေဝင်ရောက်သွားသလဲ။
👉လူနာ၏ ကိုယ်ခံအားအခြေအနေ ဘယ်လိုရှိသလဲဆိုတာတွေက အစာအဆိပ်သင့်ခြင်းကြာမြင့်ချိန်ကိုအဆုံးအဖြတ်ပေးမှာ ဖြစ်ပါသည်။
⏰လူနာကိုအလုပ်မှ သို့မဟုတ်ကျောင်းမှ အနည်းဆုံး (24)နာရီခန့်အနားပေးထားရန်လိုအပ်ပါသည်။
🚫အစာအဆိပ်သင့်ခြင်းဖြစ်နေစဥ်အချိန်အတွင်း
🔺အဆီများသောအစားအစာများ၊ဆီကြော်မုန့်များ
🔺အပူအစပ်များ
🔺နို့နှင့်နို့ထွက်ပစ္စည်းများ
🔺ကော်ဖီ
🔺အရက်
🔺ဆေးလိပ်
🔺အမျှင်များသောအစားအစာများ
🔺အက်ဆစ်ဓါတ်များသောအစားအစာများကိုရှောင်ကြဥ်သင့်ပါသည်။

🤔ဘယ်အချိန်မှာဆေးခန်းပြဖို့လိုလာပြီလဲ။
🚨အသက်(5)နှစ်အောက်ကလေးများ၊
🚨အသက် (65) နှစ်ကျော်လူကြီးများ
🚨ကိုယ်ဝန်ဆောင်များ
🚨နဂိုရောဂါအခံရှိသူများ
🚨ကိုယ်အပူချိန် 102ဒီဂရီ ဖာရင်ဟိုက်ကျော်ခြင်း
🚨ဝမ်း ထဲတွင်သွေးပါခြင်း
🚨ပါးစပ်မှဓါတ်ဆားနှင့် အစာမဝင်နိုင်အောင် အန်နေခြင်း
🚨ဆီးနည်းသွားခြင်း၊ ဆီးမထွက်တော့ခြင်း
🚨လူနာဂယောင်ချောက်ခြားဖြစ်ခြင်း၊ သတိလစ်သွားခြင်း၊
🚨သွေးပေါင်ချိန်ပြုတ်ကျခြင်းစသည်တို့ရှိပါကနီးစပ်ရာဆရာဝန်၊ဆရာမနှင့် အမြန်ဆုံးကုသမှုခံယူသင့်ပါသည်။

လူတိုင်းကျန်းမာရေးကို လက်လှမ်း မှီ စေရန်
ရည် သန်လျက်
Yangon Medical Network

References
https://my.clevelandclinic.org/health/diseases/21167-food-poisoning
Davidson's Principles and practice of medicine
https://www.mayoclinic.org/diseases-conditions/food-poisoning/symptoms-causes/syc-20356230

Yangon Medical Network

10/09/2026

08/09/2026

02/09/2026

31/08/2026

28/08/2026

26/08/2026

24/08/2026

19/08/2026

17/08/2026

Address

Website

Alerts

Contact The Practice

Shortcuts

Share

Category

Listing takedown request