19/09/2026
"Яаралтай тусламжийн тасгаас тогтолцоо руу: Өнөөгийн сорилт, хөгжлийн чиг хандлага сэдвээр хэлэлцүүлж байна.
Монгол Улсын урт хугацааны хөгжлийн бодлого “Алсын хараа 2050”-ын зорилтын хүрээнд “Яаралтай тусламжийн тасгаас тогтолцоо руу: Практик ур чадварын үзүүлэх” сэдэвт үндэсний сургалт 2026 оны 09 дүгээр сарын 18-наас 21-ний өдрүүдэд Орхон аймгийн УБЭҮ-ийн Соёл урлагийн цогцолборт зохион байгуулагдаж байна. Тус сургалтад төв болон төрөлжсөн нарийн мэргэжлийн эмнэлэг, тусгай эмнэлэг, аймаг, дүүргийн нэгдсэн эмнэлэг болон хувийн хэвшлийн 250 гаруй яаралтай тусламжийн эмч, эмнэлгийн мэргэжилтнүүд оролцож байна.
Тус сургалтыг Эрүүл мэндийн яамны дэргэдэх Яаралтай тусламж судлалын мэргэжлийн салбар зөвлөл, Орхон аймгийн ЗДТГ, Эрүүл мэндийн газар, Бүсийн оношилгоо, эмчилгээний төв (БОЭТ), Монголын яаралтай тусламжийн нийгэмлэг болон АНУ-ын Элчин сайдын яамны Иргэн цэргийн дэмжлэгийн бүлэг хамтран зохион байгуулж байна.
Үндэсний сургалтын хүрээнд дараах үндсэн зорилтот үйл ажиллагааг хэрэгжүүлж байна:
Тогтолцооны шинэчлэл: Яаралтай тусламжийн тасгийн өнөөгийн зохион байгуулалтад дүн шинжилгээ хийн, олон улсын стандартад нийцсэн тогтолцоо руу шилжих алхмуудыг судлах,
Ажилтнуудын эрүүл мэнд, ачаалал: Эмч, мэргэжилтнүүдийн ажлын ачаалал, түүнд нөлөөлөх ажлаас халшрах хам шинжийг тодорхойлон түүнээс гарах арга замыг эрэлхийлэх,
Мэргэжлийн ур чадвар: ЯТТ-ийн бүтэц зохион байгуулалт, KPI үнэлгээ, халдвар хамгаалал, санхүү-даатгалын тогтолцоо, сувилагчийн оролцоо болон өвчтөнийг үнэлэх олон улсын арга зүйг сайжруулах.
Сургалтын үеэр салбарын тэргүүлэх эрдэмтэн, зөвлөх эмч нар илтгэл тавьж, туршлагаасаа хуваалцаж байна. Монгол Улсын Төрийн соёрхолт, Хүний гавьяат эмч Л.Ганболд "Энх оршихуй ба Анагаах ухаан" сэдвээр зочин лекц уншсан бол АНУ-ын ЭСЯ-ны Иргэн цэргийн дэмжлэгийн бүлгийн дарга Санг Ким "Гамшиг осол, үй олноор осолдох үеийн шаталсан орчин үеийн дасгал сургуулилалт"-ыг талбар дээр бодитоор үзүүлэн дадлагажууллаа. Мөн УНТЭ-ийн ЯТТ-ийн эрхлэгч С.Алтансүх, ЦТЭ-ийн эмнэлзүй эрхэлсэн орлогч дарга Р.Баянмөнх, ХӨСҮТ-ийн эрчимт эмчилгээний зөвлөх эмч Ц.Чинбаяр нар салбарын тулгамдсан асуудлуудаар хэлэлцүүлэг удирдан явуулав.
Сургалтын эцсийн үр дүнд яаралтай тусламжийн тасгийн өнөөгийн зохион байгуулалтад бодит дүн шинжилгээ хийж, олон улсын стандартад нийцсэн яаралтай тусламжийн нэгдмэл тогтолцоо руу шилжих эхний алхмуудыг хийх юм. Мөн эмч, мэргэжилтнүүдийн ажлын ачаалал, халшрах хам шинжийг бууруулах арга замуудыг тодорхойлж, эрүүл мэндийн байгууллагуудын яаралтай тусламжийн чанар, хүртээмжийг шинэ шатанд гаргахаар зорьж байна.
