26/08/2026
Ойн гүнд буй цэцгийг үнэрлэж таалах хэн ч байхгүй бол цэцэг гутарч гундах уу? Гоо сайхныг нь магтаж бишрэх хэн ч алга гээд амиа хорлох уу? Үгүй шүү дээ, цэцэг үргэлжилэн дэлгэрч, анхилам үнэрээ цацааар байх болно. Жинхэнэ хайр бусдаас хамаарахгүй буй чанараас ундардаг. Гол мөрөн урсахдаа хэн нэгний цангааг тайлъя гэж урсдаг бил үү? Голын уснаас уух нь ууж, умбах нь умбаж л байдаг. Уух хүн байхгүй ч гол урссар байна.
Бусдаас хамаарсан амьдрал бол хүлээс зовлон. Хамаарал эрх чөлөөг устгадаг. Хайр бол эрх чөлөөний цэцэг. Түүнд цэцэглэх дотоод орон зай хэрэгтэй. Бусдаас хамаарсан амьдралд орон зай олддоггүй. Бусад хүн чамайг дарамталж, чи ч өөрөө бусдыг дарамтална. Хайртай дуртай гэх хүмүүсийн дунд үргэлжийн тэмцэл тулаан өрнөдөг шүү дээ. Эхнэр нь нөхрөө, нөхөр нь эхнэрээ залгихыг хүсдэг.
Өсч хөгжиж байж л чи жинхэнэ хайртай учирна. Гэрэл асахад гэрлийн цацраг харанхуйг нэвтлэн түгдэг шиг чиний дотоод ахуйг илтгэсэн аура эргэн тойронд чинь ургана. Өөртөө гэрэлгүй хүн бусдаас гэрэл царайчилдаг. Өөрт нь хайр байхгүй учир өрөөлөөс хайр гуйланчилдаг. Чи түүнээс, тэр чамаас хайр хүснэ. Хэн хэндээ байгаа болов уу гэж найдсан хоёр гуйлгачин учирсны эцэст хоёулаа хууртсан болж ганихардаг. Ганцаараа байхдаа ганихарч явсан. Ханьтай болоод ч ганихарч явна. Ганц илүү нь, өөрийн хариуцлагаас бултах далим, уйтгар зовонгийнхоо бурууг чихэх эзэнтэй болдог юмсанж.
Чи хэчнээн ч удаа хань ижлээ сольж болох юм. Дүр төрх өөрчлөгдөвч хэв маяг хэвээрээ үлддэг. Олон янзын мөртлөө нэг л хүнтэй ахин дахин учрах болно. Өөрөө чи өөрчлөгдөхгүй байгаад хамаг учир оршдог. Сонголтыг чиний хөгжөөгүй ухамсар хийж байгаа. Нялхас нялхастаа дурладаг бол хөгжсөн хүн хөгжсөн хүндээ дурладаг. Тэд бие биенийхээ хэлийг ойлгодог болохоор тэр.
Нялхас бусдын түшиг горилдог бол хөгжсөн хүн бие даан оршиж чаддаг. Ийм хүн хайрыг нь хүлээж авсны төлөө бусдад талархахаас биш, бусдаас хайр талархал горьдож явдаггүй. Балчрууд хайр дурлалаар бие биеийнхээ эрх чөлөөг боомилдог бол хөгжсөн хүмүүс хайрын амьсгал дунд бие биенээ улам чөлөөлж байдаг.
Ошо #АгнистынГэгээ
