АШУҮИС-ийн Монгол-Японы эмнэлэг

27/08/2026

АШУҮИС-ИЙН МОНГОЛ-ЯПОНЫ ЭМНЭЛЭГ ӨМӨЗО-НЫ ХӨХ ХОТЫН АРДЫН ЭМНЭЛГИЙН ТӨЛӨӨЛӨГЧДИЙГ ХҮЛЭЭН АВЧ УУЛЗЛАА

ӨМӨЗО-ны Хөх хотын Ардын эмнэлгийн төлөөлөгчид 2026.08.26-ы өдөр АШУҮИС-ийн Монгол-Японы эмнэлэгт зочилж, цаашдын хамтын ажиллагааны чиглэлээр албан ёсны уулзалт хийлээ.
Уулзалтад Хөх хотын Ардын эмнэлгийн зүгээс эмнэлгийн дэд захирал Шү Юн Шэн тэргүүтэй мэдрэл-судас, нүд болон цээжний хөндийн мэс засал, мэдээгүйжүүлгийн нарийн мэргэжлийн эмч нар; АШУҮИС-ийн Монгол-Японы эмнэлгийн зүгээс эмнэлгийн захирал П.Баясгалан болон бусад удирдах албан тушаалтнууд, эмч, сувилахуй, эм зүйн мэргэжилтнүүд оролцов.
Арга хэмжээний хүрээнд зочид төлөөлөгчид эмнэлгийн үйл ажиллагаатай танилцсан бөгөөд мэдрэл-судас, нүдний мэс засал, мэдээгүйжүүлэг, сувилахуй болон эм зүйн чиглэлээр жижиг бүлгийн уулзалт зохион байгууллаа. Эдгээр уулзалтаар талууд эмнэлзүйн туршлага солилцох, мэргэжилтнүүдийг чадавхжуулах, харилцан өвчтөн илгээх зэрэг хамтын ажиллагааны нарийвчилсан асуудлуудыг хэлэлцсэн юм.
Хөх хотын Ардын эмнэлгийн төлөөлөгчид Монгол-Японы эмнэлгийн орчин нөхцөл, үйл ажиллагааг өндрөөр үнэлж, энэхүү уулзалт нь хоёр тал харилцан туршлага судалж, бие биеэсээ суралцах үр өгөөжтэй түншлэлийн эхлэл болно гэдгийг онцлон тэмдэглэлээ.
Дашрамд дурдахад, ӨМӨЗО-ны Хөх хотын Ардын эмнэлэг нь 80 жилийн түүхтэй, 3000 гаруй ортой, 5000 орчим эмч, албан хаагчтай тус бүс нутгийн хамгийн том төрөлжсөн эмнэлэг юм.
Энэхүү арга хэмжээ нь хоёр эмнэлгийн хооронд урт хугацааны, тогтвортой харилцааны үндэс суурийг тавьж, сургалт, эрдэм шинжилгээ, эмнэлгийн тусламж үйлчилгээний чиглэлээр харилцан туршлага солилцох, хамтын ажиллагааг өргөжүүлэхэд чухал түлхэц боллоо.

25/08/2026

АШУҮИС-ийн Монгол-Японы эмнэлгийн захиргаа, Үйлдвэрчний эвлэлийн хороо хамтран 2026 – 2027 оны хичээлийн жилд ажилтнуудынхаа хүүхдүүдийн хичээлийн хэрэглэлийг нь бэлдэж өглөө. Хүүхдүүдийн анги, нас, хүйсийн онцлогт тохирсон, хүсэл сонирхолд нь нийцсэн цүнх, дэвтэр, шаардлагатай хичээлийн хэрэглэлүүдийг өгсөн нь ажилтнуудын талархлыг хүлээсэн, тэдний нийгмийн асуудлаа шийдэхэд нь дэмжлэг болсон арга хэмжээ боллоо.

20/08/2026

АШУҮИС-ИЙН МОНГОЛ-ЯПОНЫ ЭМНЭЛЭГ НҮБ-ЫН ЦӨЛЖИЛТТЭЙ ТЭМЦЭХ ТУХАЙ КОНВЕНЦЫН ТАЛУУДЫН 17 ДУГААР БАГА ХУРАЛ (COP17)-ЫН ҮЕЭР ҮЗҮҮЛЭХ ЭМНЭЛГИЙН ТУСЛАМЖИЙН БЭЛЭН БАЙДЛЫГ ХАНГАЖ, ТУСЛАМЖ ҮЙЛЧИЛГЭЭГ ҮЗҮҮЛЖ БАЙНА

АШУҮИС-ийн Монгол-Японы эмнэлэг нь COP17 бага хурлын төлөөлөгч, зочин гадаад иргэдэд төрөлжсөн мэргэшлийн эмнэлгийн яаралтай тусламж, амбулаторийн болон хэвтэн эмчлүүлэх тусламж үйлчилгээг үзүүлэхээр эмнэлгийн зохион байгуулалт, хүний нөөц, эм хэрэгсэл, тоног төхөөрөмжийн бэлэн байдлыг ханган, эмнэлгийн тусламж үйлчилгээг шуурхай үзүүлж байна.

Монгол-Японы эмнэлгээс COP17 бага хурлын талбар дахь Цэнхэр бүсэд эмнэлгийн тусламжийн 2 цэг, хөдөлгөөнт яаралтай тусламжийн 2 баг, бүрэн тоноглол бүхий түргэн тусламжийн 2 машинтайгаар нийт 17 эмнэлгийн эмч, мэргэжилтнийг өндөржүүлсэн бэлэн байдалтайгаар ажиллуулж байна.
СОР-17 бага хурлын “Ажиллагааны удирдлагын нэгдсэн төв”-д тус эмнэлгийн хэмжээнд хурлын төлөөлөгчдөд үзүүлсэн тусламж, үйлчилгээний талаарх мэдээллийг тогтсон хугацаанд илгээн, ЭМЯ-аас ирүүлсэн чиглэл үүргийн дагуу эмнэлгийн тусламж үйлчилгээний бэлэн байдал, аюулгүй, шуурхай байдлыг ханган ажиллаж байна.

Эмнэлгийн тусламж үйлчилгээ үзүүлэх явцад гадаадын иргэн үйлчлүүлэгчтэй харилцахад хэлний бэрхшээл саад үүсэхээс урьдчилан сэргийлэх үүднээс тус эмнэлгийн яаралтай тусламжийн болон амбулаторийн тасагт гадаад хэлний орчуулагч, хөтчийн үүргийг суралцагч резидент эмч нар болон АШУҮИС-ийн англи хэлний ангийн сайн дурын оюутнуудаас бүрдсэн баг дэмжин туслах үүргийг идэвхтэй гүйцэтгэж байна.

20/08/2026

АШУҮИС-ийн Монгол-Японы эмнэлэгт дараах ажлын байрны сонгон шалгаруулалтад урьж байна.

18/08/2026

КАНАД, АНУ-ЫН ЭМЧ, ЭМНЭЛГИЙН МЭРГЭЖИЛТНҮҮД АШУҮИС-ИЙН МОНГОЛ-ЯПОНЫ ЭМНЭЛГИЙН ЭМЧ НАРТАЙ ХАМТРАН АЖИЛЛАХ БОЛЛОО

2026 оны 08 дугаар сарын 17-ны өдөр Канад болон АНУ-аас Монгол Улсад хүрэлцэн ирсэн эмч, эмнэлгийн мэргэжилтнүүдийн төлөөлөл АШУҮИС-ийн Монгол-Японы эмнэлэгт зочилж, эмнэлгийн үйл ажиллагаатай танилцан, Монгол Улсын эрүүл мэндийн тогтолцоо, эмнэлгийн тусламж, үйлчилгээний онцлогийн талаар мэдээлэл авч, цаашдын хамтын ажиллагааны боломжийн талаар ярилцав.

П. Баясгалан захирал “Миний бие Канад улсын их сургуулийг төгссөний хувьд эмчилгээ оношилгооны стандарт өндөр төдийгүй анагаах ухааны сургалтын жишиг болсон Канад улсын CanMed системийг төрөлх сургууль маань хэрэгжүүлэн ажиллаж байгаад баяртай байдаг. Цаашид Канадын их дээд сургуулиуд, эмнэлгүүдтэй хамтын ажиллагааг өргөжүүлэх болно” гэж уулзалтыг нээхдээ онцоллоо.

Төлөөлөгчдийн бүрэлдэхүүнд хоол боловсруулах эрхтэн судлалын эмч Dr. Christopher Wang, бөөрний эмч Dr. Shirley Torng, өрхийн болон дотрын эмч Dr. Alfred Chan, зүрхний эмч Dr. Keith Kwok, хүүхдийн болон дотоод шүүрлийн эмч Dr. Robert Law зэрэг эмч нар оролцов.

Уулзалтын үеэр зочдод Монгол-Японы эмнэлгийн үйл ажиллагаа, эмнэлгийн тусламж, үйлчилгээний үндсэн чиглэлүүдийг танилцуулж, хоол боловсруулах, бөөр судлал, өрхийн анагаах ухаан, зүрх судлал, хүүхэд судлалын чиглэлээр мэргэжлийн жижиг бүлгийн уулзалтуудыг зохион байгууллаа.
Жижиг бүлгийн уулзалтаар эмч, мэргэжилтнүүд өөрсдийн мэргэжлийн туршлага, Монгол Улсын эрүүл мэндийн салбарын өнөөгийн нөхцөл байдлын талаар харилцан мэдээлэл авч, цаашид Монгол Улсад дахин хүрэлцэн ирж ажиллах, эмнэлзүй, сургалт, мэргэжлийн туршлага солилцоо болон бусад чиглэлээр хамтран ажиллах боломжуудын талаар ярилцав.

17/08/2026

11/08/2026

Япон улсын Хирошима их сургуулийн эрдэмтэн Эрдэнэбөх эмч “Аутизмын хүрээний эмгэгүүд” сэдвийн доор 2026.08.14-ний өдөр Монгол-Японы эмнэлэг дээр эцэг, эхчүүдэд зөвлөгөө өгч, сургалт хийх тул та бүхэн өргөнөөр үйлчлүүлнэ үү.
Та зөвлөгөөний цаг авах, асууж тодруулах зүйл байвал 95020356 утсаар холбогдоорой.

11/08/2026

АШУҮИС-ИЙН МОНГОЛ-ЯПОНЫ ЭМНЭЛЭГТ ЯПОН УЛСЫН КЕЙО ИХ СУРГУУЛИЙН НҮДНИЙ ЭМЧ ЗОЧИЛЛОО.

Уулзалтад Ёкозүна Харүмафүжи болон Япон улсын Кэйо их сургуулийн Анагаах ухааны тэнхимийг төгссөн эмч нарын үүсгэн байгуулсан FIGHT FOR VISION ТББ-ын төлөөлөл болох Кэйо их сургуулийн багш, нүдний эмч Yo Koyu, оюутнууд, АШУҮИС-ийн Монгол-Японы эмнэлгийн удирдлагын баг оролцон хамтын ажиллагааны боломжуудын талаар санал солилцлоо.

FIGHT FOR VISION ТББ нь Япон улсын нүдний эмч нарын өөрсдийн мэдлэг чадвараас залуу эмч нарт зааж сурган, чадваржуулахад хувь нэмэрээ оруулах, эрүүл мэндийн тусламж үйлчилгээ авахад хүндрэлтэй алслагдсан аймаг сумдад амьдардаг хүмүүст эрүүл мэндийн үйлчилгээ үзүүлэх гэсэн зорилгоор байгуулагдсан Монгол Улсад нүдний үзлэг, оношилгоо, нүдний болор солих мэс заслыг Төв аймаг болон алслагдсан аймаг, сумдын иргэдэд үзүүлдэг сайн дурын төрийн бус байгууллага юм.

Уулзалтын үеэр зочид Монгол-Японы эмнэлгийн үйл ажиллагаатай танилцаж, эмнэлгийн нүдний тусламж үйлчилгээ, ЖАЙКА-тай хамтран хэрэгжүүлж буй төслийн явцтай танилцан, цаашид резидент, эмч нарын туршлага солилцооны хөтөлбөр, Fight for Vision ТББ-ын үйд ажиллагаанд хамтран ажиллах боломжит чиглэлүүдийн талаар ярилцлаа.

11/08/2026

АШУҮИС-ийн Монгол-Японы эмнэлгийн Эрсдэлийн удирдлагын зөвлөлийн 2026 оны 08 дугаар сарын 11-ны өдрийн хурлаар "Code purple буюу Яаралтай тусламжийн тасгийн хэт ачааллын үеийн үйл ажиллагааны журам”, “Code red буюу Гал гарсан үед ажиллах журам”, “Ажилтны эрүүл мэндийг хамгаалах журам”, “Эмнэлэгт шинэ оношилгоо, эмчилгээ хийхэд зөвшөөрөл олгох журам”, “Үл тохирол, залруулах арга хэмжээний журам”-ыг тус тус хэлэлцэж баталлаа.
Их сургуулийн эмнэлгийн хувьд үйлчлүүлэгчид өндөр чанартай тусламж үйлчилгээг эрсдэл, аюулгүй үзүүлэхийн сацуу эмнэлгийн ажилтан, албан хаагчдыг эрүүл, аюулгүй орчинд ажиллах нөхцөлөөр хангах нь чухал юм.

11/08/2026