29/06/2026
Il-Proġetti eTwinning fl-Iskola St Michael – Sena ta’ Kollaborazzjoni,
Riflessjoni u Tkabbir Personali
Matul din is-sena skolastika, l-Iskola St Michael kompliet tissaħħaħ fil-qasam tal-kollaborazzjoni Ewropea permezz tal-pjattaforma eTwinning. L-istudenti tagħna, mill-Year 7 sal-Year 11, ħadu sehem f’żewġ proġetti eTwinning tat-Taljan sinifikanti li mhux biss kabbrulhom il-ħiliet lingwistiċi u diġitali, iżda tawhom ukoll
spazju biex jirriflettu fuqhom infushom u fuq id-dinja li jgħixu fiha.
1. Confini da attraversare – Proġett għall-Year 10 u 11
Dan il-proġett kien iffukat fuq it-tema tal-konfini li persuna tgħaddi minnhom matul ħajjitha. L-istudenti tal-Year 10 u 11 ġew mistiedna jiktbu dwar:
• konfini reali li qasmu, bħal meta vvjaġġaw jew żaru pajjiżi oħra
• konfini emozzjonali, jiġifieri sfidi personali, biżgħat jew diffikultajiet li rnexxielhom jegħlbu
Fil-kitbiet tagħhom, l-istudenti rrakkontaw x’kien li għenhom jegħlbu dawn l-ostakli: xi drabi kienet il-familja, xi drabi l-ħbieb, u xi drabi l-perseveranza personali tagħhom stess. Barra minn hekk, ippubblikaw bijografiji ta’ persuni li għaddew minn esperjenzi
simili, sabiex jaraw kif ħafna nies – minkejja l-kuntesti differenti – jgħaddu minn sfidi li jixbhu lil xulxin. Dan għenhom jifhmu li l-esperjenzi umani għandhom ħafna punti komuni u li l-kuraġġ jista’ jispira lil ħaddieħor.
2. Viaggiare tra le storie di ragazzi e ragazze del mondo – Proġett għall-Year 7, 8 u 9
It-tieni proġett kien vjaġġ fl-istejjer taż-żgħażagħ madwar id-dinja. Permezz tal-forum tal-eTwinning, l-istudenti tal-Year 7, 8 u 9 kitbu u qasmu esperjenzi u informazzjoni dwar diversi aspetti ta’ ħajjithom:
• il-ħajja skolastika
• il-ħin liberu u l-passatempi
• l-isport u l-interessi personali
• bijografiji ta’ żgħażagħ li ħajjithom kienet ta’ ispirazzjoni għal ħafna.
Huma u jaqraw u jwieġbu lil xulxin, l-istudenti kienu qishom qegħdin jivvjaġġaw minn storja għal oħra, jiskopru kulturi, drawwiet u realtajiet differenti minn tagħhom. Dan il-proċess kabbarhom fil-fehim, fil-kurżità u fir-rispett lejn id-diversità.
Sfidi u Perseveranza matul is-Sena
Ta’ min isemmi li dawn il-proġetti waqfu għal xi żmien minħabba li l-għalliem tat-Taljan kien indispost. Madankollu, meta rritorna, il-proġetti tkomplew b'ritmu tajjeb ħafna. Fil-fatt, kienet l-ewwel sena li l-istudenti kollha tat-Taljan kienu reġistrati f’xi proġett eTwinning, pass importanti ħafna għall-iskola. L-użu tal-laptops fil-klassi kien kruċjali biex ix-xogħol isir b’mod effiċjenti, kollaborattiv u ordnat, u għen biex l-istudenti jżommu r-ritmu tax-xogħol anke
wara l-waqfa.
Konklużjoni
Is-sena skolastika kienet waħda mimlija tagħlim, riflessjoni u skoperti ġodda. Il-proġetti eTwinning taw lill-istudenti tagħna opportunità biex:
• jiftħu moħħhom għal realtajiet u kulturi differenti
• jifhmu aħjar lilhom infushom u lil xulxin
• jiżviluppaw ħiliet lingwistiċi, diġitali u soċjali
• japprezzaw il-valur tal-kollaborazzjoni u l-komunikazzjoni
L-Iskola St Michael tibqa’ kburija bil-parteċipazzjoni attiva tal-istudenti tagħha u bil-ħidma dedikata tal-edukatur li mexxa dawn l-inizjattivi b’passjoni, professjonalità, perswazjoni u perseveranza
eBooks
Dawn iż-żewġ links huma tal-eBooks kollaborattivi li jagħtu ħjiel tax-xogħol li sar f’dawn il-proġetti.
Confini da attraversare
https://www.calameo.com/books/0067687533fc0b8cefb98
Viaggiare tra le storie di ragazzi e ragazze del mondo
https://www.calameo.com/read/0067687535d63fcc25b7
