Lara Abela - Gestalt Psychotherapist

11/06/2026

Ġewwa fina ħafna drabi nġorru vuċi li tikkritika, tiġġudika u tfakkarna f’dak li stajna għamilna b’mod differenti jew aħjar.

Madankollu, meta persuna li nħobbu tkun għaddejja minn żmien diffiċli, ħafna drabi nippruvaw nifhmuha u nuru aktar paċenzja, ġentilezza u kompassjoni.

Għaliex kultant ikun aktar faċli noffru kompassjoni lil ħaddieħor milli lilna nfusna?

Li nuru kompassjoni lejna nfusna ma jfissirx li ninjoraw ir-responsabbiltà jew li nsibu skużi għal dak li qed jiġri. Ifisser li nagħrfu li l-esperjenza umana tinkludi żbalji, sfidi u mumenti ta’ inċertezza.

Il-mod kif nitkellmu magħna nfusna għandu impatt kbir fuq il-benesseri emozzjonali tagħna.

Kieku ħabib jew ħabiba jiġu għandek bl-istess diffikultajiet li qed iġġorr inti llum, x’kont tgħidilhom?

Forsi inti wkoll jistħoqqlok tisma’ dak il-kliem ☺️

It-terapija tista’ toffri spazju sigur fejn tesplora r-relazzjoni tiegħek miegħek innifsek u tiżviluppa vuċi interna aktar ġentili, aktar ta’ sostenn, u aktar mimlija kompassjoni lejk innifsek 🤍

04/06/2026

It-tama hija bħal xemgħa żgħira f’kamra mudlama. Mhijiex hemm biex tkeċċi d-dlam kollu, imma biex tfakkrek li d-dawl għadu possibbli.

Hi bħal żerriegħa moħbija taħt l-art... kwieta, inviżibbli, imma mimlija potenzjal li tikber anke wara staġuni ta’ kesħa.

It-tama ma tiċħadx jew tinjora r-realtà li bħalissa għaddejjin minn maltempata. Hija dik l-umbrella miksura li xorta żżommok miexi, anke meta r-riħ ikun qawwi u x-xita bil-qliel. Għax anke jekk ma tipproteġikx perfettament, tibqa’ tgħinek u pass, pass twasslek lejn post kenni, li forsi għalkemm għadu mhux jidher, imma jeżisti.

U forsi, l-aktar ħaġa profonda dwar it-tama hi li ma titlobx li taraha b’għajnejk, imma li tibqa’ tgħixha anke meta kollox ġewwa fik isir kwiet wisq biex tħoss li għadha hemm.

28/05/2026

Il-biża’ għandha mod kif iżżommna mwaħħlin.

Idaħħal dubji f’moħħna, tnaqqas il-fiduċja fina nfusna u ġġegħelna nibqgħu fejn hu komdu, anke meta qalbna tkun tixtieq timxi ’l quddiem.

Kemm-il darba ħallejna l-biża’ tieħu post il-ħolm tagħna?

Kemm-il darba żammejna lura milli nieħdu pass ġdid għax bżajna mill-falliment, mill-ġudizzju jew mill-inċertezza?

Il-biża’ hija parti naturali mill-esperjenza umana, imma meta nibdew nagħtuha wisq poter, tista’ tibda tikkontrolla ħajjitna, il-ħsibijiet tagħna u anke s-sentimenti tagħna.

Verament nikbru meta nibdew nagħrfu l-biża’ mingħajr ma nħalluha tiddeċiedi għalina. Kull pass żgħir ’il quddiem huwa att ta’ saħħa u fiduċja fina nfusna.

19/05/2026

Therapy is not about having everything figured out.
It is about creating space to understand yourself, process your experiences, and move towards meaningful change at your own pace.

Together, we can create a safe and non-judgemental space where you feel heard, supported, and empowered.

Sessions available by appointment.
📍Mosta and Żejtun

11/05/2026

L-uġigħ... nistgħu niltaqgħu miegħu fil-vjaġġ tal-ħajja tagħna f’ħafna forom differenti.

X’tagħmel bih?... Tinjorah?... Tippretendi li mhux hemm?... Tilbes tbissima biex ħadd ma jintebaħ bih?

Iżda l-uġigħ ma jisparixxix. L-uġigħ jibqa’. Anke f’dawk iċ-ċirkustanzi fejn ma rridux inħarsu lejh.

Il-ferita tibqa’ viżibbli, u din hija l-prova ta’ dik is-sofferenza.
Hija l-prova li ġarrabna... li waqajna... li qomna... u li minkejja kollox, bqajna mexjin.

Tajjeb li naraw u nifhmu li l-uġigħ mhux biss iweġġa’, iżda jista’ jagħtina opportunità:

li jibnina.
li jgħallimna.
li jsaħħaħna.
li jagħtina profondità, empatija, u saħħa li forsi qatt ma konna niskopru mingħajru.

Qed nagħrfuha din is-saħħa? Jew qed ninjorawha wkoll għax twieldet mill-weġgħa?

Forsi wasal iż-żmien li ma nibqgħux naħbu l-feriti... imma nagħrfuhom bħala parti mill-istorja tagħna.

Storja ta’ kuraġġ...
ta’ tama...
u ta’ trasformazzjoni.

Għax xi kultant, l-akbar saħħa tagħna titwieled proprju mill-akbar uġigħ tagħna.

29/04/2026

💭 Il-Limiti…
Inti taf x’inhu tiegħek?

Il-limiti mhumiex biex tbiegħed lin-nies.
Huma hemm biex tipproteġi l-paċi tiegħek.

Ħafna minna ġejna mgħallmin minn età żgħira biex nagħtu prijorità lill-ħaddieħor… u dan jaf iġib miegħu riperkussjonijiet fejn, fil-proċess, ninsew lilna nfusna.

Dan ħafna drabi jwassal għal:
• għeja emozzjonali
• rabja moħbija
• u f’ċerti każijiet anke burnout

Il-limiti qegħdin hemm biex jgħinuna. Kif?

❇️ Nirrispettaw lilna nfusna u l-bżonnijiet tagħna
(Iva, il-bżonnijiet tagħna huma importanti daqs dawk ta’ ħaddieħor)

❇️ Nipproteġu l-enerġija tagħna

❇️ Nibnu relazzjonijiet aktar b’saħħithom
(Għax meta nkun tajjeb jew tajba jien, inkun nista’ nkun aktar disponibbli għal ħaddieħor)

❇️ Insaħħu r-rispett lejna nfusna

Li tgħid “le” jew tqiegħed lilek innifsek l-ewwel, speċjalment jekk qatt ma kont tagħmel dan, jista’ jkun li tħossok skomdu ħafna fil-bidu. U ħafna drabi dan jiġi mfixkel mal-egoizmu.

Iżda fir-realtà, dan huwa att ta’ mħabba u kompassjoni lejk innifsek ❤️

Ftakar: Lill-oħrajn inti tgħallimhom kif għandhom jittrattawk permezz ta’ dak li taċċetta f’ħajtek.

22/04/2026

Kemm-il darba ssib lilek innifsek iżżomm ġo qalbek affarijiet li weġgħuk?

Kliem li qatt ma ntesa...
Ġrajjiet li baqgħu jduru ġewwa fina...
Jew rabja li bil-mod il-mod issir parti minna mingħajr ma nindunaw...

Li żżomm dan il-piż fik jista’ jagħtik l-illużjoni li qed tipproteġi lilek innifsek… iżda fil-verità, huwa proprju dan l-istess piż li jżommok maqbud.

Dan hu li jorbotna mal-passat u jfixkilna milli ngħixu fil-preżent, u minħabba f'hekk innaqqsu l-possibbiltà li nħossuna eħfef u ħielsa.

Hemm ħafna sbuħija fil-mument li tagħraf li wasal iż-żmien li titgħallem terħi. Dan iġib miegħu sens qawwi ta’ libertà li forsi qatt ma kont taf li teżisti. Meta terħi, ma tkun tlift xejn… anzi, tkun qed terġa’ ssib lilek innifsek.

Il-paċi tiegħek tibda minn hemm 💛

Il-paċi tal-qalb tibda meta titgħallem terħi. ⏳

🐢 ‍🙅🏻‍♂️

19/04/2026

Healing is not about handling the trauma, pain, anxiety and depression.

You’re used to these.

Healing is the ability to handle joy and accept happiness back into your life.

Hang in there ! 💚💚

14/04/2026

Nothing drains you more than your own mind.

We end up constantly stressing over things we can’t control.

You did enough today. You are enough today.

Let yourself rest in that truth.

You’re doing okay 🤍

10/04/2026

X’nifhmu verament meta ngħidu; Ninvestu fina nfusna?

Spiss nitkellmu dwar self-care. Imma xi drabi dan jiġi mifhum biss bħala li nieħdu ħsieb taghna nnfusna minn barra. Dan hu importanti u essenzjali għax jgħinna nħossuna aħjar… imma dan mhux biżżejjed.

Li tieħu ħsieb lilek innifsek ifisser ħafna aktar…
M’hemmx bżonn ta’ bidla drastika jew trasformazzjoni “maġika”

Dan mhux realistiku !!

Izda dan possibli li jseħħ b’passi żgħar u deċiżjonijiet żgħar li nagħmlu fil-ħajja ta’ kuljum. Huwa dan li eventwalment iwassalna u jiggwidana għal bidla reali.

B’hekk, sabiex ikollna konnessjoni b’saħħitha ma’ dawk ta’ madwarna, huwa essenzjali li jkollna konnessjoni pożittiva u b’saħħitha l-ewwel u qabel kollox magħna nfusna.

Għax biex inkunu verament hemm għal oħrajn, irridu l-ewwel nimlew it-tazza tagħna🤍