19/03/2026
Ang pagtoo sa Diyos usahay masabtan pinaagi sa yano nga pananglitan sa kinabuhi. Sama sa ligid sa sakyanan—kung dili pa kini ma-flat, dili pa nato hunahunaon ang pag-adto sa vulcanizing shop. Apan kung maabtan na ta sa problema sa dalan tungod sa flat nga ligid, didto pa ta mangita og paagi aron kini maayo. Ingon usab sa pagtoo, daghan kanato ang malimot sa pag-ampo ug sa pagduol sa Ginoo kung hapsay ang dagan sa atong kinabuhi. Sa dihang walay kakulian, murag dili nato makita ang panginahanglan sa Iyang presensya.
Apan sa panahon sa pagsulay—kung naa na’y kasakit, kalisod, o problema—didto nato mas hinumdoman ang Diyos ug mas moduol ngadto Kaniya. Sama sa pagdali nato pangita og tabang kung na-flat ang ligid, mao usab ang atong kasingkasing nga mangita og kusog ug paglaum gikan sa Ginoo. Kini nga kahimtang nagpakita nga ang pagtuo dili unta magdepende lamang sa kalisod, kondili dapat padayon bisan sa kalinaw. Kay kung atong buhaton nga pirmi ang pagduol sa Diyos, dili na nato hulaton nga “ma-flat” ang atong kinabuhi aron lamang makahinomdom sa KANIYA❤️🙏
