08/06/2026
Panginoong Diyos, Ama naming maawain,
Itinataas ko sa Inyo ang panalangin para sa isang taong labis na nagdurusa, taong Inyong minamahal at nilikha, na ngayon ay nasa gitna ng matinding hirap at pang-aabuso—walang matatakbuhan, walang malapitan, at tila wala nang natitira sa kanya kundi sakit at bigat ng damdamin.
Alam Niyo, Panginoon, ang lahat ng pinagdadaanan niya: siya ay laging inuulanan ng masasakit na salita, niloloko, binabaliktaran ang katotohanan, at ginagawang parang kasalanan niya ang lahat ng bagay kahit wala naman siyang ginagawang masama. Kasama niya ang taong mapagpanggap, laging galit, laging gusto ayon lang sa kanya, at laging siya pa ang nagpapakabiktima kahit siya mismo ang nanggugulo at nananakit.
Ang taong ito ay ubos na ubos na—wala nang natitirang lakas, wala nang matatakbuhang bahay, wala nang kaibigan o kapamilya na makikinig o tutulong sa kanya. Iniisip niya na wala siyang halaga, na siya lang ang may mali, at tila wala nang pag-asa na matatapos pa ang kanyang paghihirap. Walang kapayapaan ang kanyang isip, laging nag-iingat, laging natatakot, at laging nagtatanong kung bakit kailangan niyang maranasan ang ganito.
Kayo po, Panginoon, ang kanlungan ng mga walang kanlungan, ang lakas ng mga walang lakas, at ang Ama ng mga inapi at inabuso.
Hinihiling ko po: Maging Kayo ang kanyang matatakbuhan. Kapag wala siyang mapuntahan, Kayo po ang maging kanyang tahanan. Kapag walang nakikinig sa kanya, dinggin Niyo po ang bawat daing at iyak na hindi niya masabi sa iba.
Iligtas Niyo po siya sa mga kasinungalingan at panlilinlang ng taong iyon. Tanggalin Niyo po ang takot sa kanyang puso at isipan. Ipaunawa Niyo po sa kanya na hindi niya kasalanan ang lahat ng ito, na mahalaga siya, at hindi siya dapat magdusa nang ganito.
Bigyan Niyo po siya ng lakas ng loob, ng paraan upang makaalis at makalaya, at ng kapayapaang matagal na niyang inaasam. Ibigay Niyo po sa kanya ang pagkain, tirahan, at tulong na kailangan niya, kahit na tila walang ibang nagmamalasakit.
Pagalingin Niyo po ang kanyang pusong sugatan at kaloobang puno ng bigat. Ipaalala Niyo po sa kanya na hindi siya nag-iisa, dahil Kayo ay laging nasa kanyang tabi, hawak siya sa Inyong mga kamay.
Itago Niyo po siya sa Inyong lilim, ilayo sa anumang kapahamakan, at huwag Niyo po siyang pababayaan kahit sandali man lang.
Ito po ang aking panalangin para sa kanya, na walang ibang inaasahan kundi lamang at tulong Niyo lamang.
Sa pangalan ni Hesus,
Amen.
