02/12/2022
عشقه چې ازار دې کړم اوس خو به خوشحاله یې
روغ ومه بیمار دې کړم اوس خو به خوشحاله یی
زړه دې ومه ایسته دې بل سړي له ورکړمه
سر دې ومه ځار دې کړم اوس خو به خوشحاله یې
اوښکه ومه سترګو دې شپه راباندې تیره کړه
ستوری د سهار دې کړم اوس خو به خوشحاله یې
ژونده په ساګانو مې ته هم ستړی شوی وې
ښه ده چې په دار دې کړم اوس خو به خوشحاله یې
ګیر یمه په زلفو کې ول په ول ماتیږمه
عشقه تار په تار دې کړم اوس خو به خوشحاله یې
هسې دې سعود سره هیڅ بی هیڅه ورانه کړه
یار دې وم اغیار دې کړم اوس خو به خوشحاله یې
_______________________________
سید شاه سعود
