Health Department Lower Kohistan

01/08/2026

فیلڈ ایکٹیویٹی رپورٹ

پبلک ہیلتھ انویسٹیگیشن ٹیم کی سفارشات اور ڈپٹی کمشنر کوہستان لوئر کی ہدایات اور تعاون سے آج یونین کونسل ججال میں وبائی صورتحال کے پیش نظر متعدد حفاظتی اور انسدادی اقدامات کیے گئے۔

اہم سرگرمیاں:

- ٹی ایم اے (TMA) کے تعاون سے BHU ججال کی مکمل صفائی اور سینیٹیشن کی گئی، جبکہ واٹر اسٹوریج ٹینکس کو صاف کرکے پانی سے بھر دیا گیا تاکہ صحت مرکز میں محفوظ پانی کی دستیابی یقینی بنائی جا سکے۔
- یونین کونسل ججال کے مختلف بازاروں، ہوٹلوں اور کھانے پینے کے مراکز کا معائنہ کیا گیا۔ دکانداروں اور ہوٹل مالکان کو حفظانِ صحت، محفوظ خوراک کی تیاری، صاف پانی کے استعمال اور صفائی کے اصولوں پر ضروری ہدایات جاری کی گئیں۔
- تمام ہوٹلوں، ریسٹورنٹس اور فوڈ اسٹالز پر صابن کے ساتھ ہینڈ واش اسٹیشن قائم کرنے کی ہدایت دی گئی تاکہ ہاتھ دھونے کی مؤثر سہولت فراہم کی جا سکے۔
- عوام اور فوڈ ہینڈلرز کے لیے آگاہی سیشنز منعقد کیے گئے جن میں ہیضہ/اسہال سے بچاؤ، ہاتھ دھونے، محفوظ پانی کے استعمال اور غذائی صفائی کے حوالے سے تفصیلی آگاہی فراہم کی گئی۔
- ایڈیشنل اسسٹنٹ کمشنر صاحب کے ہمراہ خا تم انبیئیں مدرسے کا دورہ کیا گیا، جہاں طلبہ میں صفائی و حفظانِ صحت کی کٹس تقسیم کی گئیں اور بیماریوں سے بچاؤ کے متعلق آگاہی سیشن منعقد کیا گیا۔
- پبلک ہیلتھ انجینئرنگ ڈیپارٹمنٹ (PHED) کو ہدایت جاری کی گئی کہ وہ اپنے عملے اور ضروری لاجسٹکس کے ساتھ کل سے BHU ججال میں عوام کو کلورین فراہم کریں اور مختلف علاقوں کے واٹر ٹینکس کی کلورینیشن کا عمل جاری رکھیں، تاکہ ہر گھر اور ہر کمیونٹی تک محفوظ اور صاف پانی کی فراہمی یقینی بنائی جا سکے۔

یہ تمام اقدامات موجودہ وبائی صورتحال پر قابو پانے، بیماری کے مزید پھیلاؤ کو روکنے اور عوام کو محفوظ پانی اور صحت مند ماحول کی فراہمی کے لیے انتہائی اہم ثابت ہوں گے۔

01/08/2026

01/08/2026

31/07/2026

ڈسٹرکٹ ہیلتھ آفیسر لوئر کوہستان ڈاکٹر رحیم کی خصوصی ہدایات پر ٹی ایچ کیو ہسپتال پٹن کے انچارج ڈاکٹر ضیاء کو ضروری ادویات فراہم کر دی گئی ہیں تاکہ ہسپتال میں آنے والے مریضوں کو بروقت، معیاری اور بلا تعطل علاج معالجے کی سہولیات میسر رہیں۔

ڈاکٹر رحیم نے اس موقع پر ہدایت کی کہ فراہم کی گئی ادویات کو شفاف طریقے سے مستحق مریضوں تک پہنچایا جائے ۔

انہوں نے اس عزم کا اعادہ کیا کہ ضلع لوئر کوہستان کے تمام سرکاری صحت مراکز میں ادویات اور طبی سہولیات کی مسلسل دستیابی کو یقینی بنایا جائے گا تاکہ عوام کو ان کی دہلیز پر بہترین اور معیاری طبی خدمات فراہم کی جا سکیں.

30/07/2026

آئیے! مل کر اس وبا کو شکست دیں۔
صاف پانی، محفوظ صحت، صحت مند معاشرہ۔
احتیاط اپنائیں، بیماری سے بچیں، اور اپنے خاندان و معاشرے کو محفوظ رکھیں۔

30/07/2026

ڈپٹی کمشنر کوہستان لوئر کی ہدایات پر ججال میں پانی کی کلورینیشن کا عمل جاری

پبلک ہیلتھ انویسٹیگیشن ٹیم کی سفارشات اور ڈسٹرکٹ ہیلتھ آفیسر (DHO) کوہستان لوئر کی گزارش پر، ڈپٹی کمشنر کوہستان لوئر کی ہدایات کے مطابق محکمہ پبلک ہیلتھ انجینئرنگ (PHED) نے اپنے دائرۂ اختیار میں یونین کونسل ججال کے مختلف علاقوں کی مرکزی پانی کی ٹینکیوں میں کلورینیشن (Chlorination) کا عمل انجام دیا۔ اس سلسلے میں ایکسین پی ایچ ای ڈی نے اپنی ٹیموں کے ذریعے تمام ضروری اقدامات بروقت مکمل کیے۔

اس اقدام کا مقصد عوام کو صاف، محفوظ اور جراثیم سے پاک پینے کا پانی فراہم کرنا اور مشتبہ ہیضہ/شدید آبی اسہال (Cholera/AWD) کے پھیلاؤ کو روکنا ہے۔ امید ہے کہ ان بروقت اقدامات سے پانی سے پھیلنے والی بیماریوں، بالخصوص ہیضہ، میں نمایاں کمی آئے گی۔

عوام سے گزارش ہے کہ درج ذیل احتیاطی تدابیر پر ضرور عمل کریں:

- بیت الخلاء استعمال کرنے کے بعد اور کھانا کھانے یا تیار کرنے سے پہلے ہاتھ صابن سے اچھی طرح دھوئیں۔
- صرف صاف، محفوظ، کلورین شدہ یا ابلا ہوا پانی استعمال کریں۔
- تازہ اور اچھی طرح پکا ہوا کھانا کھائیں۔
- باسی، ایک دن پرانے یا غیر محفوظ کھانوں سے پرہیز کریں۔
- پھل اور سبزیاں استعمال کرنے سے پہلے اچھی طرح دھوئیں۔
- اگر اسہال یا قے کی شکایت ہو تو فوراً او آر ایس (ORS) استعمال کریں، جسم میں پانی کی کمی نہ ہونے دیں، اور قریبی سرکاری صحت مرکز سے فوری رجوع کریں۔

احتیاط، صفائی اور محفوظ پانی کا استعمال ہی ہیضہ اور دیگر آبی بیماریوں سے بچاؤ کا مؤثر ذریعہ ہے۔

30/07/2026

ڈسٹرکٹ ہیلتھ آفیسر لوئر کوہستان ڈاکٹر رحیم نے ہیضہ (کالرا) کے حالیہ پھیلاؤ کے پیش نظر بی ایچ یو جیجال کا ہنگامی دورہ کیا اور صورتحال کا تفصیلی جائزہ لیا۔ دورے کے دوران مریضوں کے علاج اور طبی سہولیات کی فراہمی کو مزید مؤثر بنانے کے لیے بی ایچ یو جیجال کو ضروری ادویات، اضافی بستر (Beds) اور دیگر طبی سامان فراہم کیا گیا تاکہ متاثرہ مریضوں کو بروقت اور معیاری علاج مہیا کیا جا سکے۔

عوام کو بہتر طبی سہولیات فراہم کرنے اور بڑھتے ہوئے مریضوں کے دباؤ سے نمٹنے کے لیے چار ڈاکٹرز کو فوری طور پر بی ایچ یو جیجال میں تعینات کر دیا گیا ہے، جو چوبیس گھنٹے مریضوں کی دیکھ بھال اور علاج کو یقینی بنائیں گے۔

ڈاکٹر رحیم نے متعلقہ عملے کو ہدایت جاری کی کہ ہر مریض کو بروقت علاج، او آر ایس، وافر مقدار میں سیال (Fluids) اور دیگر ضروری طبی سہولیات فراہم کی جائیں، جبکہ مشتبہ مریضوں کی مسلسل نگرانی اور رپورٹنگ بھی یقینی بنائی جائے۔

عوام کے لیے احتیاطی تدابیر

ہیضہ ایک پانی اور خوراک سے پھیلنے والی بیماری ہے، جس سے احتیاطی تدابیر اختیار کرکے بڑی حد تک بچا جا سکتا ہے۔ عوام سے اپیل ہے کہ:

* صرف ابلا ہوا، فلٹر شدہ یا کلورین ملا صاف پانی استعمال کریں۔
* کھانے سے پہلے اور بیت الخلا استعمال کرنے کے بعد صابن سے اچھی طرح ہاتھ دھوئیں۔
* کھانے کو اچھی طرح پکا کر استعمال کریں اور کھانے پینے کی اشیاء کو ڈھانپ کر رکھیں۔
* کچے یا آلودہ پانی سے تیار شدہ کھانوں سے پرہیز کریں۔
* بچوں کو صاف پانی اور محفوظ غذا فراہم کریں۔
* اگر کسی شخص کو شدید دست یا الٹیاں ہوں تو فوراً قریبی صحت مرکز سے رجوع کریں اور او آر ایس کا استعمال شروع کریں۔
* پانی کے ذخائر کو صاف رکھیں اور کھلے میں رفع حاجت سے گریز کریں تاکہ بیماری مزید نہ پھیلے۔

ڈسٹرکٹ ہیلتھ آفس لوئر کوہستان عوام کو یقین دلاتا ہے کہ ہیضہ کے پھیلاؤ پر قابو پانے کے لیے تمام دستیاب وسائل بروئے کار لائے جا رہے ہیں۔ عوام سے گزارش ہے کہ محکمہ صحت کی ہدایات پر عمل کریں، صفائی کا خاص خیال رکھیں اور کسی بھی مشتبہ مریض کی صورت میں فوری طور پر قریبی سرکاری صحت مرکز سے رابطہ کرے -