12/08/2026
دي نقطة بحب أوضحها لكل مريضاتي… لأن فهم طبيعة الميلازما نفسها جزء أساسي جداً من العلاج.
الـ Melasma ما مجرد بقع غامقة ظهرت في البشرة وحنفتحها وخلاص.
الميلازما في الحقيقة بنعتبرها
Chronic Pigmentary Disorder
يعني اضطراب صبغي مزمن…
المشكلة ما بس في الميلانين الموجود حالياً في الجلد، لكن في إن الخلايا المسؤولة عن تصنيع الميلانين Melanocytes نفسها بتكون شديدة الحساسية وسريعة الاستجابة للمحفزات.
يعني شنو الكلام دا؟
يعني ممكن نعالج التصبغات الموجودة فعلاً ونوصل لنتيجة ممتازة جداً…
لكن لو البشره اتعرضت مرة تانية للمحفزات..الخلايا دي ممكن ترجع تنشط وتنتج ميلانين زيادة من جديد.
والمحفز ما الشمس وبس ☀️
الشمس طبعاً من أهم المحفزات…
لكن عندنا كمان:
الحرارة
الأشعة المرئية Visible Light
التغيرات الهرمونية
الالتهابات وتهيج البشرة
وأحياناً حتى الاحتكاك المتكرر.
والحزن ..
وعشان كده دائماً بقول لمريضاتي:
الميلازما ممكن تتحسن بصورة ممتازة جداً… لكن عندها قابلية للرجوع.
ودي نقطة مهمة جداً نفهمها…
رجوع الميلازما ما معناهو إن العلاج فشل….
وما معناهو إن الكريم الفلاني كان ممتاز وبعدين فجأة بطل يشتغل….
وما معناهو إننا لازم كل مرة نفتش عن كريم أقوى وتقشير أقوى وليزر.
لا.
معناهو ببساطة إن دي طبيعة المرض نفسه.
عشان كده علاج الميلازما الحقيقي ما مفروض يكون هدفه بس:
كيف افتح البقع ؟
لكن الأهم:
كيف أسيطر على نشاط المرض وأقلل المحفزات وأحافظ على النتيجة لأطول فترة ممكنة؟
وده الفرق الكبير بين علاج التصبغ كـ لون…
وعلاج Melasma كحالة مزمنة محتاجة Management طويل المدى.
عشان كده الحماية من الشمس والحرارة والـ Visible Light، والمحافظة على الـ Skin Barrier، وتقليل الالتهاب والتهيج… ما حاجات إضافية بنعملها جنب العلاج.
دي جزء من العلاج نفسه.
فالخلاصة 🌻
الميلازما ما مجرد لون غامق عايزين نمسحو.
هي بشرة عندها قابلية صبغية عالية محتاجة نفهمها ونتعامل معاها براحه واستمرارية.
نعالجها… نسيطر عليها… وبعدها نحافظ على النتيجة.
لأن في الميلازما
Maintenance جزء من العلاج… ما مرحلة اختيارية بعده.
د.ندى حمد🫶🏼🌻
Dr. Nada Hamad
Clinica Skin Care & Laser Clinics
Where Medicine Meets Beauty🌻
