Mohammed Qurashi Abbas

Directions Website Contact the practice

Mohammed Qurashi Abbas Educational insights on skin health and science simplification

حكاية العناية بالبشرة ٦٨ القسم الثامن: الحمل والرضاعة والصغار (١٠ من ١٣) شمس الصغار الواقي ما هو خط الدفاع الأول لوش الص...
08/11/2026

حكاية العناية بالبشرة ٦٨

القسم الثامن: الحمل والرضاعة والصغار (١٠ من ١٣)

شمس الصغار

الواقي ما هو خط الدفاع الأول لوش الصغير في الشمس؛ الضل والملابس والقبعة هم الأساس الأول دايماً، والواقي بيجي بعدهم بشروط محددة حسب عمر الطفل

كتير من الأمهات بيفتكروا إنو بشرة أطفالنا السمراء محمية طبيعياً وما بتتأثر بالشمس، والحقيقة إن جلد الطفل أرق وحساس، وبشرتنا السمراء عند الصغار بتحترق وبتلتهب وبتتصبغ برضو لو اتعرضت لهجير الشمس المباشر من غير حماية، التوصيات الطبية العالمية بتقسم الأطفال لمرحلتين عمريتين: قبل ستة شهور، وبعد ستة شهور

للرضيع الأقل من ستة ٦ شهور، القاعدة الأساسية هي إبعادو عن الشمس المباشرة تماماً، والاعتماد على الضل، وغطاء عربات الأطفال، والملابس القطنية الخفيفة البتغطي الجسم، والقبعة عريضة الحافة، طيب هل نمسح ليهو واقي شمس؟ هنا من الأمانة العلمية نذكر الموقفين الرسميين: هيئة الغذاء والدواء الأمريكية (FDA) بتنصح بتجنب مسح واقي الشمس كلياً قبل عمر ستة شهور عشان جلد الرضيع بيمتص المواد بسهولة، بينما الأكاديمية الأمريكية لطب الأطفال (AAP) بتقول إنو لو اضطريتي وما لقيتي ضل أو ملابس كافية، ممكن تمسحي كمية صغيرة جداً من واقي شمس معدني على الأماكن المكشوفة الصغيرة بس زي الخدود وظهر اليدين، وفي رأيي بنطبق على البشرة الفاتحة دون ذات الحماية الطبيعية الداكنة

أما بعد ما يكمل الطفل ستة ٦ شهور ويكبر ويبقى يتحرك ويلعب برة، هنا بندخل واقي الشمس بأمان على الوش والمناطق المكشوفة جنب الملابس القطنية والقبعة والنضارة الشمسية للأكبر سناً، والنوع المفضل دايماً للصغار هو الواقي المعدني (الفيزيائي) المحتوي على أكسيد الزنك أو ثاني أكسيد التيتانيوم والخالي من العطور، لأنو لطيف جداً وما بيهيج عيونهم ولا جلدهم، وبنعيد مسحو كل ساعتين لو الطفل قاعد في الشمس المستمرة أو بيلعب في الموية، من غير ما نتوهم إنو الواقي براهو بيحمي مية بالمية ويخلينا نسيب الطفل في شمس الظهر

وهنا بيجي سؤال الأمهات المعهود: «لو حميت طفلي من الشمس، حيجيب فيتامين د من وين؟»؛ فيتامين د للرضع والأطفال بيحددوا طبيب الأطفال بقطرات ومكملات موزونة ومضمونة، وما بنطلبو أبداً بتعريض الرضيع لحرق الشمس المباشر

وتفاصيل حماية الأطفال في المدارس والمسابح بتلقوها في سلسلة «حكاية الشمس والبشرة» بمكتبة بيت العافية

عرفنا ما يخص الصغير مباشرة، لكن في خطر خفي ما بيخطر على البال: كيف ممكن كريم بتمسحو الأم على وشها هي، يوصل لطفلها ويضرو من غير ما تحس؟ ده موضوع الحلقة الجاية

الحلقة القادمة: كريمات الأم وصحة الصغير

حكاية العناية بالبشرة ٦٧ القسم الثامن: الحمل والرضاعة والصغار (٩ من ١٣) وش الرضيع: أقل مما نتخيل تجي الخالة أو الحبوبة ف...
08/11/2026

حكاية العناية بالبشرة ٦٧
القسم الثامن: الحمل والرضاعة والصغار (٩ من ١٣)
وش الرضيع: أقل مما نتخيل

تجي الخالة أو الحبوبة في الأسبوع الأول للمولود، شايلة المكحلة عشان تكحل عيون البيبي «توسعها وتحميها»، وتشوف حبوب صغيرة بيضاء في خدودو فتقول ليك «امسحي ليهو زيت سمسم ولا كريم من عندك عشان ينضف»

وش المولود والرضيع هو أرق حواشة ممكن تتعاملي معاها؛ الحيطة والمونة فيهو لسه بتتبني، والطبقة القرنية أرق من جلد الكبار، ومساحة سطح جسمو مقارنة بوزنو كبيرة، يعني أي مادة بتمسحيها على جلدو بتمتص أسرع بكتير وتدخل لدمو، عشان كدة، القاعدة الذهبية لوش الرضيع هي: «أقل مما نتخيل»؛ موية، وضل، ومرطب بسيط عند الحاجة، أكتر بكتير مما يحتاج «منتجات»

في الشهور الأولى، بتظهر على وش البيبي حاجات شائعة ومطمئنة جداً وما بتحتاج أي فرك ولا أدوية، بتشوفي نقط بيضاء صغيرة على الأنف والخدود اسمها الدخينات (Milia)، ومرات بتظهر حبوب صغيرة حمراء اسمها «حبوب الرضيع»، الاتنين ديل طبيعيين وبيروحوا براهم في أسابيع من غير ما تعصريهم ولا تمسحي عليهم خلطات، ولو الخدود نشفت من الجو، أو احمرّت منطقة الدقن وحوالين الخشم من كثرة اللعاب والتسنين، كل المطلوب هو غسيل لطيف بموية دافئة، ومسحة من مرطب طبي بسيط خالي من العطور أو مسحة فازلين نقي تحمي الجلد قبل الرضاعة والنوم

في المقابل، في ممنوعات صارمة لا تقبل المجاملة على وش الرضيع، الخط الأحمر الأول هو الكحل التقليدي؛ أبحاث راسخة من منطقتنا العربية وحول العالم، وتحذيرات هيئات الصحة العالمية، أثبتت إن الكحل التقليدي غالباً ملوث بنسب عالية جداً من معدن الرصاص السام، ومسحو لعيون الرضيع أو على سرتو بيرفع مستوى الرصاص في دمو ويأثر على دماغو وأعصابو ونموه، وكمان ممنوع مسح الزيوت العطرية، أو الأعشاب والوصفات الشعبية، أو كريمات الكبار، أو «كريم كورتيزون نفع مع ولد الجيران» على وش الطفل

متين نترك العناية البسيطة ونمشي بالرضيع للطبيب؟ لو ظهر طفح جلدي منتشر أو معاهو حمى وسخانة، أو قشور صفراءسميكة وملتهبة، أو تورم في الوش والجفون، أو لو الطفل بقى تعبان ورضاعتو قلت، وتفاصيل العناية الكاملة بجلد المولود والحفاض والأكزيما وقبعة المهد مشروحة في سلسلة «حكاية جلد الصغار» بمكتبة بيت العافية

ولما يبدأ الصغير يطلع معانا برة البيت في شمسنا الحارة، بنسأل: متين نبدأ نمسح واقي شمس للأطفال؟ في الحلقة الجاية حنعرف قواعد شمس الصغار قبل وبعد ستة شهور

الحلقة القادمة: شمس الصغار

حكاية العناية بالبشرة ٦٦ القسم الثامن: الحمل والرضاعة والصغار (٨ من ١٣) الرضاعة وما بعد الولادة «الحمد لله ولدت بالسلامة...
08/11/2026

حكاية العناية بالبشرة ٦٦
القسم الثامن: الحمل والرضاعة والصغار (٨ من ١٣)
الرضاعة وما بعد الولادة

«الحمد لله ولدت بالسلامة وبدأت أرضع، متين أقدر أرجع لسيروم الريتينول وعلاج الكلف الكنت موقفاهم في الحمل؟»

مرحلة الرضاعة وما بعد الولادة أوسع من فترة الحمل في المسموحات الموضعية، ومحددة جداً في الممنوعات، لكن قبل القزازات، وشك وجسمك في الشهور دي محتاجين رحمة وصبر وسط تغير الهرمونات وقلة النوم مع المولود

نبدأ بالحاجات البتقدر ترجع لرفك بعد الولادة؛ في مراجعات طب الجلد الحديثة، كتير من العلاجات الموضعية الكنا مأجلينها في الحمل احتياطاً، ومنها الريتينويدات الموضعية (زي الأدابالين والتريتينوين والريتينول)، بتعتبر مقبولة أثناء الرضاعة بعد مراجعة طبيبك، لأن الكمية البتعبر من مسحة صغيرة على الوش للدم ومنه لحليب الأم ضئيلة جداً، الشرط العملي الصارم هنا هو إنك تغسلي يديك كويس بعد المسح، وما تمسحي أي كريمات فعالة على منطقة الصدر أو الثدي أو أي مكان بيلامس خد الرضيع أو فمو مباشرة

أما المواد البتفضل في قائمة الممنوعات القطعية أثناء الرضاعة، فهي حبوب الإيزوتريتينوين والأسيتريتين الفموية، وكريمات التفتيح المجهولة المحتوية على الزئبق أو الكورتيزون القوي، وكمان حبوب ومكملات وحقن «التفتيح»؛ دي كلها ما ليها مكان وإنتي بترضعي

وبالنسبة للهيدروكينون وحبوب الترانيكساميك لعلاج الكلف المستمر بعد الولادة، فقرارهم بيكون عند الطبيب المختص حسب الحالة وعمر الرضيع، بينما حمض الأزيليك والنياسيناميد وفيتامين سي والبنزويل بيروكسايد والواقي الملون بيكملوا معاك من غير أي مشكلة

وفي تفاصيل يومية في حياة الأم المرضعة بتحتاج التفاتة؛ مع سهر الليل المتقطع، الهالات وبهتان الوش بيزيدوا، وهنا الترطيب اللطيف والواقي الصباحي بيسندوك لحدي ما ينتظم نومك (وتفصيل الهالات جاي في البوست ٧٧)، ومع غسيل اليدين المتكرر كل ساعة مع غيار البيبي، إيديك وشفايفك بينشفوا شديد

فخلي علبة مرطب تقيل أو فازلين جنب الحوض وجنب سريرك تمسحي منها طوالي، أما لو لاحظتي تساقط شعر كثيف بعد الولادة بتلاتة شهور، فأطمني ده تساقط تيلوجيني طبيعي ومؤقت بيرجع براو، وقصتو كاملة مشروحة في سلسلة «حكاية الشعر» بمكتبة بيت العافية

ومن عناية الأم ننتقل للصغير نفسو؛ في الحلقة الجاية حنعرف ليه وش المولود والرضيع محتاج أقل بكتير مما نتخيل، وليه كحل الحبوبات للرضيع خط أحمر

الحلقة القادمة: وش الرضيع: أقل مما نتخيل

حكاية الجلد الشاهد الباب التاسع | البوست ١٠٩ احمرار مفاجئ في الوش فجأة والزول قاعد في أمان الله، يحس بـهَبّة سخونة طالعة...
08/11/2026

حكاية الجلد الشاهد
الباب التاسع | البوست ١٠٩
احمرار مفاجئ في الوش

فجأة والزول قاعد في أمان الله، يحس بـهَبّة سخونة طالعة في وشو ورقبتو وأضانو، كأنو واقف قدام فرن، والجلد يحتقن بالدم لدقايق وبعدين يهدا ويرجع لطبيعتو، الشكوى دي، البنسميها في الطب التوهج (Flushing)، هي المثال النموذجي البينطبق عليهو بروتوكول الطمأنة في سلسلتنا دي؛ لأن أشيع أسباب الاحمرار المتكرر في الوش حميدة تماماً وما وراها أي أورام

في حياتنا اليومية، الأغلبية الساحقة من النوبات دي بيكون سببها تفاعل فسيولوجي عادي مع الجو الحار، أو أكل الشطة والبهارات والمشروبات السخنة، أو الانفعال والتوتر والخجل، أو مرض الوردية الجلدي الشائع، أو هبات السخونة الطبيعية البتجي للنساء في فترة انقطاع الطمث، أو حتى أثر جانبي معروف لبعض أدوية الضغط، دي كلها أسباب مألوفة ومطمئنة تماماً، وما مفروض أي سخونة في الوش تفتح للزول ملف أورام من قوقل

في بشرتنا الداكنة، التوهج ده غالباً ما بيظهر كلون أحمر طماطمي فاقع زي الصور المدرسية، بل الزول وأهلو بيلاحظوا غمقان مفاجئ في لون الوش يميل للبنفسجي الكاتم أو البني الغامق، مع انتفاخ بسيط ولمعة في الجلد، والأهم من اللون هنا هو الإحساس العنيف بالحرارة، وسخونة الوش الواضحة لمن تخت يدك عليهو

طيب متين الشاهد ده يغير لغتو ويخلينا نفتش أبعد؟ لمن نوبات التوهج والسخونة دي تكون شديدة ومتكررة من غير أي علاقة بالأكل أو الانفعال، وتجي ناشفة من غير عرق، والأهم إنها تترافق مع أعراض تانية في الجسم زي إسهال مائي مزمن ومغص في البطن، أو صفير وكتمة في النفس زي الربو، أو خفقان في القلب، هنا اجتماع القرائن دي بوجه الطبيب لمتلازمة نادرة اسمها متلازمة الكارسينويد (Carcinoid syndrome)، ودي بتحصل بسبب ورم بطيء النمو بيكون غالباً في الأمعاء الدقيقة وبيفرز مواد كيميائية زي السيروتونين في الدم لمن يوصل للكبد، فتعمل النوبات دي، والكلام ده راسخ ومتفق عليه في الإرشادات

الفرق العملي هنا واضح: سخونة الوش البتجي براها مع الشطة أو الحر أو التوتر هي شاهد حميد وعابر، أما النوبات المصحوبة بإسهال مزمن وتعب عام ونقصان وزن فدي بتستاهل زيارة طبية، عشان الطبيب يطلب تحاليل بسيطة في البول والدم تقيس المواد دي وتفصل في القصة بهدوء

لو داير تشوف شكل التوهج ده على بشرة زي بشرتنا، فتّش في قوقل صور بـ (carcinoid flushing dark skin) عشان تعرف تفرقها لمن تشوفها، ما عشان تحكم على نفسك من صورة

وفي المرة الجاية حننزل من الوش لنص البطن بالضبط، ونقيف عند عقدة صغيرة في السرة شايلة اسم راهبة ممرضة، لكنها بتحمل واحدة من أخطر الرسائل في الباب ده كلو

حكاية الجلد الشاهد الباب التاسع | البوست ١٠٨ جلطات بتتنقّل التهاب الوريد السطحي وتكون جلطة صغيرة تحت الجلد من الحاجات ال...
08/11/2026

حكاية الجلد الشاهد
الباب التاسع | البوست ١٠٨
جلطات بتتنقّل

التهاب الوريد السطحي وتكون جلطة صغيرة تحت الجلد من الحاجات البتمر علينا في العيادات، في الأغلبية الساحقة من الحالات بيكون وراها شاهد شائع وبسيط ومطمئن تماماً؛ زي دوالي الساقين المزمنة اللي بتخلي الدم يركد في الأوردة، أو أثر تركيب كانيولا ومحاليل في الوريد، أو خبطة موضعية، أو قعدة طويلة في سفر، في الحالات العادية دي، الالتهاب بيحصل في وريد واحد معروف السبب، وبيتعالج ويتحسن ويمشي لحاله من غير ما يفتح ملف أورام

لكن القرينة بتنقلب وتتحول لشاهد تقيل جداً لمن القصة تاخد سلوك غريب ومتحرك: زول يظهر ليهو خط أو كلكوعة قاسية ومؤلمة تحت الجلد على مسار وريد سطحي في الضراع أو الساق أو الصدر، وبعد أيام تخف من المكان ده عشان تطلع فجأة في وريد تاني في حتة تانية من غير أي سبب موضعي يفسرها، الظاهرة دي في الطب بنسميها التهاب الوريد الخثاري المتنقل أو علامة تروسو (Trousseau sign of malignancy)

في بشرتنا الداكنة، الوريد الملتهب ما دايماً بيظهر كخط أحمر زاهي زي ما بتوصف الكتب، بل كشريط أغمق من الجلد الطبيعي، لونو بنفسجي كاتم أو بني غامق، لكن اليد هنا بتسبق العين؛ لأنك لمن تلمس المكان بتلقى حبل قاسي، ساخن، ومؤلم شديد تحت صباعك على طول الوريد، السبب العلمي ورا الشاهد ده إنو بعض الأورام الداخلية، وأشهرها سرطان البنكرياس وأورام المعدة والرئة، بتفرز مواد مخاطية وكيميائية بتمشي في الدم وتخلي جهاز التجلط في حالة استنفار دائم، فيبدأ الدم يتجلط جوا الأوردة السطحية مرة هنا ومرة هناك، والكلام ده راسخ ومتفق عليه في الإرشادات

الفارق العملي البيخلي الطبيب ياخد العلامة دي بجدية قصوى هو تنقل الجلطات من مكان للتاني، وظهورها في أوردة سليمة ما فيها دوالي، خصوصاً عند زول فوق الأربعين ومعاها قرائن تانية زي نقصان الوزن غير المبرر، أو ألم غامض في البطن والضهر، أو صفار جديد في العين، وقتها دي بتستاهل زيارة وتقييم طبي شامل عشان الطبيب ما يكتفي بمسكنات ومراهم موضعية، بل يفتش جوا البطن والصدر ويلقط السبب الأصلي من بدري

لو داير تشوف شكلها على بشرة زي بشرتنا، فتّش في قوقل صور بـ (migratory thrombophlebitis Trousseau syndrome dark skin) عشان تعرف تفرقها لمن تشوفها، ما عشان تحكم على نفسك من صورة

وفي المرة الجاية حنطلع من أوردة الأطراف للوش، ونشوف كيف نوبات احمرار وسخونة مفاجئة في الوش والرقبة بتخلينا نفرز بين الأسباب اليومية البسيطة وبين متلازمة نادرة بتشهد على الأمعاء

حكاية العناية بالبشرة ٦٥ القسم الثامن: الحمل والرضاعة والصغار (٧ من ١٣) الخلطات والطقوس في الحمل تجيك الجارة ببرطمان خلط...
07/11/2026

حكاية العناية بالبشرة ٦٥
القسم الثامن: الحمل والرضاعة والصغار (٧ من ١٣)
الخلطات والطقوس في الحمل

تجيك الجارة ببرطمان خلطة وتقول ليك «امسحيها عشان تطلعي من الأربعين منورة»، وتجهز ليك حفرة الدخان في أوضة مقفولة؛ وهنا لازم نقيف وقفة صادقة نوزن فيها عاداتنا: شنو الماعرفين أثره لسه، وشنو الأثره معروف وسيئ على الأم والجنين

نبدأ بالخط الأحمر القاطع: كريمات التفتيح المجهولة والخلطات في الحمل، زي ما فصلنا في القسم السادس، الخلطات دي بتعتمد على الزئبق أو الستيرويد القوي (الكورتيزون)، الزئبق بيمتص من الجلد للدم وبيضر الكلى، وما في أي مبرر يعرضك ويعرض جنينك لمعدن سام عشان لون مؤقت

أما الكورتيزون الموضعي القوي والقوي جداً (زي الكلوبيتاسول والبيتاميثازون)، فاستعمال الأنواع القوية دي بكميات كبيرة وتراكمية على مساحات واسعة أثناء الحمل بيرتبط بزيادة خطر نقص وزن المولود عند الولادة، وطبعاً عشان نطمن الحوامل، فالكورتيزون الخفيف أو المتوسط الموصوف طبياً ما فيهو الارتباط ده، بس القطع الفوري لخلطات السوق واجب، وبنفس المنطق نبعد تماماً عن الكحل التقليدي لاحتمال تلوثها بالرصاص، وعن الحنة السوداء المحتوية على بودرة الحجر (PPD) والزيوت العطرية المركزة على الوش

بالنسبة للدخان والدلكة والخمرة في الحمل وبعد الولادة، فالطقوس دي جزء من موروثنا وبنتعامل معاها باحترام، لكن بميزان الطب وتقليل المخاطر، ففي الأبحاث المخبرية، مكثف دخان خشب الطلح أظهر إشارة خطر على الجينات في الخلايا، واتوثقت حالات التهاب جلد تماسي محمول بالهواء من الدخان، لكن ما عندنا دراسات بشرية كافية بتقيس أثر الدخان مباشرة على الحمل

عشان كدة، ما بنقول إن الدخان بيسبب إجهاضاً أو تشوهات، لكن النصيحة الطبية العاقلة هي «تقليل المخاطر»: في الحمل، الأفضل تأجيل الدخان أو تقليله للحد الأدنى، ولو اتعمل يكون في مكان مفتوح ومهوي كويس وبمسافة بعيدة من غير كتمة في أوضة مقفولة عشان ما تستنشقي أول أكسيد الكربون والجسيمات الكثيفة

وبعد الولادة ممنوع تماماً وجود المولود في مكان فيهو دخان أو بخور كثيف لحماية رئتيه وجلده الرقيق، والبديل المريح لوشك في الحمل والأربعين هو غسيل دافئ، ومرطب بسيط بلا عطر، وواقي شمس، من غير أي خلطات، ولو كنتي استعملتي حاجة من الخلطات دي قبال ما تعرفي بحملك، وقفيها وراجعي طبيبك بهدوء، لأن الضرر دايماً مرتبط بالتكرار والكمية

ولما تقومي بالسلامة وتبدأ مرحلة الرضاعة والسهر، بتتغير الخريطة شوية؛ في الحلقة الجاية حنجاوب على السؤال المنتظر: متين أرجع للريتينول وعلاجات البقع وأنا برضع؟

الحلقة القادمة: الرضاعة وما بعد الولادة

حكاية العناية بالبشرة ٦٤ القسم الثامن: الحمل والرضاعة والصغار (٦ من ١٣) كلف الحمل تسمعي من الحولك إنو «الكلف ده وسخ حمل ...
07/11/2026

حكاية العناية بالبشرة ٦٤
القسم الثامن: الحمل والرضاعة والصغار (٦ من ١٣)
كلف الحمل

تسمعي من الحولك إنو «الكلف ده وسخ حمل في الوش، افركيهو بالدلكة والمقشرات أو اصبري عليهو وهو بيروح براهو أول ما تلدي»، فتحتاري بين الفرك العنيف وبين الانتظار السلبي

كلف الحمل (Melasma of pregnancy) لا هو وسخ على السطح عشان يطلع بالدعك، ولا هو ضيف خفيف بنضمن إنو يختفي تماماً يوم الولادة، القصة جوه الجلد إنو في الحمل بيجتمعوا تلاتة محفزات قوية في وقت واحد: ارتفاع هرمونات الحمل، وأشعة الشمس فوق البنفسجية، والضوء المرئي العادي، التلاتة ديل بيستنفروا خلايا الميلانين في أحواض الجبهة والخدود والشنب عشان تضخ صبغة زيادة، وأي فرك أو تقشير قاسي هنا بيزيد الالتهاب ويغمّق الكلف أكتر

العلاج الأساسي والأول لكلف الحمل ببدأ من قفل الباب قدام الضوء، والواقي المعدني واسع الطيف والملوّن بأكاسيد الحديد (Iron oxides) هو حجر الزاوية في شهور الحمل ومأمونية المعادن على السطح بتخليها الدرع الأول لوشك كل صباح، مع الاستعانة بالضل والطرحة أو القبعة لما تطلعي في الشمس

ولو محتاجة «سماد هادي» يساعد في فرملة الصبغة أثناء الحمل جنب الواقي، فحمض الأزيليك (Azelaic acid) هو الخيار الموضعي المقبول والمناسب في المرحلة دي، وممكن معاهو النياسيناميد أو فيتامين سي كمساعدات لطيفة، أما الأسلحة التقيلة زي الهيدروكينون، والتركيبات الثلاثية، وحبوب الترانيكساميك الفموية، وجلسات التقشير الكيميائي، فدي كلها بنؤجلها بهدوء لبعد الولادة والرضاعة

كلف الحمل في بعض الحالات بيبدأ يخف تدريجياً بعد الولادة لما تهدأ الهرمونات، لكن في حالات تانية بفضل موجود ومحتاج نكمل معاهو بخطة علاج الكلف الكاملة الحنشرحها في البوست ٧٤، وفي انتظار ذلك، لو البقع مضايقاك في مناسبة أو طلعة، تغطيتها بمكياج لطيف أو كريم أساس مناسب للونك جائزة تماماً وما بتضر الكلف، بل لو كان المكياج فيهو أكاسيد حديد فوق الواقي حيساعد في حجب الضوء، المهم إياك ثم إياك تلجئي لكريمات «التفتيح» المجهولة أو خلطات السوق في الحمل عشان تستعجلي النتيجة

ولأن الضغوط الاجتماعية على الحامل والنفساء ما بتقيف عند الكريمات، وبتدخل في طقوس البيت والموروث، في الحلقة الجاية حنوزن الخلطات والدخان والكحل والحنة في الحمل بميزان السلامة

الحلقة القادمة: الخلطات والطقوس في الحمل

حكاية العناية بالبشرة ٦٣ القسم الثامن: الحمل والرضاعة والصغار (٥ من ١٣) حبوب الحمل في الشهر الرابع من حملها، وقفت قدام ا...
07/11/2026

حكاية العناية بالبشرة ٦٣
القسم الثامن: الحمل والرضاعة والصغار (٥ من ١٣)
حبوب الحمل

في الشهر الرابع من حملها، وقفت قدام المراية ودمعتها قريبة؛ بعد سنين من علاج حب الشباب ووش صافي، فجأة رجعت الحبوب الملتهبة تملأ خدودها وخط الفك، والكل بيقول ليها «ما تمسحي أي دواء لحدي ما تلدي»

رجوع الحبوب أو زيادتها في الحمل حاجة شائعة ومفهومة، لأن تغير الهرمونات بينشط الغدد الدهنية ويزيد إفراز الزهم (Sebum) في الحواشة، لكن نصيحة «أتركي وشك تسعة شهور من غير علاج» هي نصيحة قاسية وما دقيقة علمياً؛ لأن الحبوب الملتهبة في بشرتنا السمراء لو اتسابت من غير تهدئة، حتتحول لبقع تصبغ عميقة وندبات تقعد سنين بعد الولادة، والعلاج الموضعي المقبول في الحمل موجود ومتاح

وفق المراجعات الطبية الحديثة، خط البداية الأساسي والأهدأ لعلاج حبوب الحمل بيقوم على مادتين عرفناهم كويس في الرف: حمض الأزيليك (Azelaic acid) والبنزويل بيروكسايد (Benzoyl peroxide)، حمض الأزيليك، سواء بتركيز تجميلي أو طبي لحدي عشرين بالمية 20%، بيعتبر جوكر مثالي هنا؛ لأنو بيهدي التهاب الحبوب وفي نفس الوقت بيمنع خلايا الميلانين من إنها تكتب مكان الحبة بقعة سوداء، والبنزويل بيروكسايد مقبول بتركيز لحدي خمسة بالمية 5% مرتين يومياً عشان يقتل البكتيريا ويفتح المسام

لو كانت الحبوب ملتهبة شديد وما كفاها الأزيليك أو البنزويل براهم، الطبيب ممكن يضيف مضاد حيوي موضعي مقبول في الحمل زي الكليندامايسين (Clindamycin) أو الإريثروميسين (Erythromycin)، والقاعدة الذهبية هنا إنو المضاد الحيوي الموضعي ما بيُستعمل لوحدو أبداً، لازم يتجمع مع البنزويل بيروكسايد وبإشراف الطبيب عشان البكتيريا ما تبني مقاومة ضدو ويفقد مفعولو

في المقابل، في أدوية حبوب لازم نبعد عنها تماماً في شهور الحمل: كل عائلة الريتينويدات الموضعية والفموية (زي الأكرتين والديفرين والروكوتان)، ومضادات التتراسيكلين الفموية (زي الدوكسيسايكلين لأنو بيأثر على عظام وأسنان الجنين)، وحبوب السبيرونولاكتون الهرمونية

والوصية العملية الأهم مع حبوب الحمل: أبعدي أصابعك عن الوش وأوعي تعصري الحبة مهما كانت مضايقاك، العصر في وقت الحمل مع نشاط الميلانين العالي معناه بقعة مضمونة، ولو الحبوب بقت عقد كبيرة ومؤلمة تحت الجلد، أو بدت تترك حفر وندبات، أو مأثرة على نفسيتك ونومك، ما تستني؛ راجعي طبيب الجلدية عشان يرتب ليك خطة علاجية مسموح بيها تحفظ سلامة وشك وسلامة حملك، وتفاصيل حب الشباب الكاملة موجودة ليها سلسلة خاصة هي «حكاية حب الشباب»

ومن حبوب الحمل نمشي للشكوى التانية الأشهر في المراية وقت الحمل: قناع الحمل أو الكلف؛ في الحلقة الجاية حنشوف كيف نحاصر الكلف في شهور الحمل بالواقي والصبر

الحلقة القادمة: كلف الحمل

حكاية العناية بالبشرة ٦٢ القسم الثامن: الحمل والرضاعة والصغار (٤ من ١٣) جدول الحمل: مواد تكمل ومواد تتجنب أغلب مواد الرو...
07/11/2026

حكاية العناية بالبشرة ٦٢
القسم الثامن: الحمل والرضاعة والصغار (٤ من ١٣)
جدول الحمل: مواد تكمل ومواد تتجنب

أغلب مواد الروتين اليومي المقبولة في الحمل معروفة، والممنوع فعلاً قليل ومحدد، فما في أي داعي لـ«قائمة نفي كبيرة» تخليك توقفي كل قزازة في رفك وتعيشي في قلق طول التسعة شهور، في طب الجلد بنحب نكون دقيقين في الكلمات؛ وعشان التجارب السريرية المباشرة على الحوامل قليلة لأسباب أخلاقية، فالمراجعات الطبية بتستعمل عبارات زي «مقبول في المراجعات» أو «ما في دليل على ضرر» بدل كلمة «آمن» المطلقة، ومنها بنرسم خريطة واضحة ومطمئنة لحواشتك

نبدأ بالحاجات البتكمل معاك بأمان وراحة بال؛ على رأس القائمة في السماد العلاجي بيجي حمض الأزيليك (Azelaic acid)، وده مقبول في المراجعات العلمية للحبوب وللتصبغ والكلف في الحمل والرضاعة مع بعض، وجنبو بيجي البنزويل بيروكسايد (Benzoyl peroxide) لعلاج الحبوب، وهو مقبول في المراجعات الحديثة بتركيز لحدي خمسة بالمية 5% مرتين يومياً، وكمان النياسيناميد (Niacinamide) وفيتامين سي الموضعي بيعتبروا خيارات مقبولة ومريحة لدعم الحاجز والنضارة

أما أحماض الفواكه والمقشرات اللطيفة، فحمض الجليكوليك (Glycolic acid) وحمض اللاكتيك بتراكيز منخفضة في الغسول أو التونر بياناتها محدودة لكن يُرجّح إنها غير ضارة لأن امتصاصها قليل، ونفس الكلام لحمض الساليسيليك (Salicylic acid) الموضعي؛ التراكيز المنخفضة منو وعلى مساحات صغيرة (زي غسول الوش أو جل على الحبة) مقبولة عند أغلب المراجعات ومختلفة تماماً عن حبوب الأسبرين الفموية، بس بنبعد عن جلسات التقشير الكيميائي القوية والعالية التركيز لحدي ما تقومي بالسلامة، وفي الحماية، الفلاتر المعدنية (أكسيد الزنك وثاني أكسيد التيتانيوم) مع أكاسيد الحديد هي المفضلة دايماً، بينما الفلاتر العضوية رغم ثبوت امتصاص جهازي بسيط ليها فما في أي دليل على إنها بتسبب ضرر

طيب شنو المواد البتطلع من الرف ونتجنبها في الحمل؟
الخط الأحمر الأول والراسخ هو حبوب الإيزوتريتينوين والأسيتريتين الفموية، ودي ممنوعة قطعاً، أما الريتينويدات الموضعية (التريتينوين، الأدابالين، الريتينول) فبتُتجنب احتياطاً، ومادة التازاروتين الموضعية ممنوعة
الحاجة التانية البنتجنبها هي الهيدروكينون (Hydroquinone)، لأن امتصاصو للدم عبر الجلد مرتفع مقارنة بغيرو فنؤجلو لبعد الولادة والرضاعة، وكمان حبوب الترانيكساميك الفموية بتُتجنب إلا لو قرر الطبيب المختص غير كدة، ومعاها الزيوت العطرية المركزة، وبالطبع أي كريمات تفتيح مجهولة أو خلطات فيها زئبق أو كورتيزون قوي

وفي منطقة وسطى «بتُراجع مع الطبيب» حسب الحاجة؛ زي المضادات الحيوية الموضعية للحبوب، أو كريمات الكورتيزون الخفيفة لو اضطرينا ليها لعلاج أكزيما نشطة، لأن الطبيب بيختار النوع الخفيف ولأقصر مدة ممكنة

ولما نجي للتطبيق العملي للجدول ده، أول مشكلة بتواجه كتير من الحوامل هي رجوع الحبوب؛ في الحلقة الجاية حنشوف كيف نتعامل مع حبوب الحمل من غير ما نضر الجنين ولا نسيب الوش للبقع

الحلقة القادمة: حبوب الحمل

حكاية العناية بالبشرة ٦١ القسم الثامن: الحمل والرضاعة والصغار (٣ من ١٣) الروتين الثابت في الحمل: الري ما بقيف أول ما بتظ...
05/11/2026

حكاية العناية بالبشرة ٦١
القسم الثامن: الحمل والرضاعة والصغار (٣ من ١٣)
الروتين الثابت في الحمل: الري ما بقيف

أول ما بتظهر نتيجة التحليل الإيجابية، بتلقي نصيحة جاهزة من الحولك بتقول: «وقفي كل الكريمات والغسولات من وشك عشان الجنين ما يتأثر»، فتقعد الوحدة تسعة شهور بوش ناشف ومشدود وكلف بيزيد مع كل طلعة شمس، والحقيقة إن الحمل ما معناه أبداً إنك توقفي العناية ببشرتك

نرجع لقاعدتنا الذهبية البنينا عليها الروتين في البوست ٤٩: «التلاتة الثابتين والواحد المتحرك»، في فترة الحمل، التلاتة الثابتين البمثلوا سيستم الري والحماية اليومية للحواشة ما بقيفوا أبداً، لأن الجلد في الشهور دي بالذات بكون أحوج ما يكون للرطوبة وللدرع الواقي من الضوء، التغيير الحقيقي بحصل بس في «الواحد المتحرك» أو السماد العلاجي؛ بنشيل المواد الما بتناسب الحمل زي الريتينويدات والهيدروكينون، ونبدلها بخيارات هادية ومقبولة لو كان وشك محتاج علاج

نمسك التلاتة التابتين خطوة خطوة
الخطوة الأولى هي الغسول اللطيف، وده بيكمل معاك الصباح والمساء عادي عشان يشيل العرق والدهن من غير ما يجهد الحيطة
الخطوة التانية هي المرطب؛ بس هنا في تفصيلة صغيرة بتواجه أغلب الحوامل وهي حساسية الشم والوحم في الشهور الأولى، كريمك المفضل الكنتي بترتاحي لريحتو زمان ممكن فجأة يقلب نفسك ويضايقك، وكمان جلد الوش نفسو عند بعض الحوامل بيبقى أرق وأكتر تحسساً للعطور، عشان كدة، الحل العملي والأريح إنك تحولي لمرطب بسيط مكتوب عليهو «بدون عطر» (Fragrance-free)، وتواصلي بيهو ري أحواض وشك بالكمية البتريحها

الخطوة التالتة والأهم في التلاتة وقت الحمل هي واقي الشمس، لأنو مع فورة الهرمونات، خلايا الميلانين في بشرتنا السمراء بتكون مستنفرة وجاهزة لكتابة أي ضوء في شكل كلف حمل، في توافق معقول بين أطباء الجلد على إن الواقي المعدني (Mineral sunscreen) المحتوي على أكسيد الزنك أو ثاني أكسيد التيتانيوم، والملوّن بأكاسيد الحديد لصد الضوء المرئي، هو الخيار المفضل والأنسب للحامل لأنو بيشتغل فوق السطح وما بيمتص داخل الجسم، وطبعاً ده ما معناه إن الواقيات ذات الفلاتر العضوية (الكيميائية) بتضر الجنين؛ الدراسات أثبتت وجود امتصاص جهازي بسيط ليها في الدم، لكن ما في دليل علمي يثبت إنها بتسبب ضرر للحمل، غير إننا بنفضل المعدني الملون كخيار أحوط وأهدأ للبشرة الحساسة، وما ننسى مقاس الإصبعين الكامل للوش والرقبة زي ما اتفقنا في البوست ٥٢

ولأن استجابة جلدك في الحمل ممكن تتغير، لو اضطريتي تدخلي مرطب أو واقي جديد ما جربتيهو قبال كدة، طبقي «اختبار الرقعة المنزلي» خلف الأضان أو على طرف الفك لأيام قبال ما تعمميهو على وشك كلو، عشان تضمني سلامة الحواشة من غير مفاجآت

ومفاتيح بناء الروتين وحساب الكميات موجودة بالتفصيل في البوستات السابقة وفي مكتبة بيت العافية

وبعد ما ثبتنا الري والحماية، في الحلقة الجاية حنفرش قدامك خريطة واضحة ومطمئنة للمواد الفعالة في الحمل: شنو البيكمل معاك بأمان، وشنو البنتجنبو لحدي ما تقومي بالسلامة

الحلقة القادمة: جدول الحمل: مواد تكمل ومواد تقيف

Address

Khalda Station Street
Wad Madani

Alerts

Be the first to know and let us send you an email when Mohammed Qurashi Abbas posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to Mohammed Qurashi Abbas:

Shortcuts

Share

Category