14/08/2026
တစွူသေႏတဝ်း၊ တဆင်ႏလွုမ်ꩻ
ဟော်ꩻစံꩻကဟုဲင်း ဗဟုသုတယံငါႏ။
နီနမ်း🤷 နီꩻသꩻ နီထာꩻယူႏ🤔
နီထာꩻပျောႏ၊ နီထာꩻတလွိုႏဖုံႏ
အဝ်ႏပြောင်ꩻတသေႏသေႏ၊
တစွူသေႏတဝ်း၊ ထာဝရလဲ့ တမွေးတဝ်း။
အဝ်ႏပြောင်ꩻချာငါ။ အဝ်ႏတပန်ႏချာငါ။
တဆင်ႏပျောႏ၊ တဆင်ႏသမ်းတလွိုး။
တဆင်ႏထဲ့သွုမ်ꩻ၊ တဆင်ႏသမ်းအောင်ႏမျင်ႏ
ကာႏကအဝ်ႏ တဆင်ႏလွုမ်ꩻ။
ပျောႏဗာႏထာꩻလဲ့
တွမ်ႏပျောႏမရေႏမရာႏမွော့၊
တလွိုႏဗာႏ၊ ဆာစဲင်ဗာႏ၊ ခံႏစာꩻဗာႏလဲ့
တွမ်ႏခံႏစာꩻမရေႏမရာႏမွော့
နောဝ်ꩻနဝ်ꩻ တဆင်ႏလွုမ်ꩻ။
နီခန္ဓာႏယိုလဲ့စက္ကန့်တွိုင်ꩻ မိနစ်တွိုင်ꩻ
နီဆဲလ်(Cell)ဖုံႏလဲ့ အဝ်ႏပြောင်ꩻ ပနီꩻနီꩻ။🤷
တဆင်ႏဖြား တဆင်ႏဆာ
တဆင်ႏသီ တဆင်ႏကွုတ်
အဝ်ႏမုဲင်ꩻ နီကဟဲ့ဒါႏ (ယဝ်ꩻ-အတ္တ)
အဝ်ႏမုဲင်ꩻနီကဟဲ့ဒါႏ ဝိဉာဉ်ႏ (Atman)
ထာꩻစွူသေႏ၊ နီကရိုꩻ ထာဝရ ထီႏအွိုႏမုဲင်ꩻ?
နောဝ်ꩻလဲ့တဆင်ႏလွုမ်ꩻ။
နီကအဝ်ႏထင်းဒျာႏ
နီကအီႏပဲင်ႏဗာႏအမျိုꩻ
နီတကာꩻ၊ နီသဲင်ကယ်ယံယံ
နီရွဉ်၊ နီခံꩻ၊ နီလမ်းဟဝ်ဟဝ်၊ နီသွို့ခြံဖုံႏယို
နီကအဝ်ႏလိုꩻခမ်းတွင်ꩻလဲ့ ပြောင်ꩻထိုꩻ၊
ထိုꩻမားထိုꩻ၊ ပဲစ့်ꩻထိုꩻ၊ ပြင်ꩻထိုꩻ၊
ဝင်ꩻတခွန်ꩻထိုꩻ၊ ထီအီခြွဉ်ႏ၊ မေႏအူအံႏ၊
ကားကအဝ်ႏ တဆင်ႏလွုမ်ꩻ။
နီကထွိုင်င်ႏသီ နီအွဉ်ႏကုဲင်ပြာႏချာ
နီအတာႏဆꩻငါ ထမုဲင်ꩻလဲ့တပါတဝ်း။🥹
နီကအဝ်ႏရက်ဒါႏအဖြာꩻလဲ့
အဝ်ႏမွန်မွန်လဲ့ ဖဗာႏ
တနီꩻခါꩻသီတွော့ꩻ ဖဗာႏ။🥹
နီတရက်တဝ်းအဖြာꩻလဲ့
တနီꩻခါꩻ နီအီႏညာꩻဗာႏ။
လောႏကကို စွူသေႏငါႏအမျိုꩻ
မော့ꩻမုဲင်ꩻကို? ယိုနဝ်ꩻတဆင်ႏလွုမ်ꩻ။
"တဆင်ႏလွုမ်ꩻ တစွူသေႏတဝ်း" သဘောꩻတရာꩻယို
နီမဉ်ႏလက္ခံႏဒါႏလဲ့ နီသꩻသက်သာႏလွဉ်၊
ခိုးလျားဗာႏငါႏတဝ်း။ ဒုက္ခဗာႏတဝ်း။
သꩻဆင်ꩻရယ်ꩻဗာႏတဝ်း။
နီလိုꩻသီးကဒုက္ခ၊ ကဆင်ꩻရယ်ꩻဗာႏနဝ်ꩻ
အဝ်ႏထင်းဝွေꩻသီးပဲင်ႏဗာႏ၊ ဆဲင်ႏဗာႏတထာဝရ၊
အဝ်ႏထင်းဝွေꩻသီး အီႏအုံညီꩻဗာႏ တစိုးသက်တွော့ꩻ
ထာꩻကုဲင်ပြင်ꩻထွိုင်ႏဖျော်နဝ်ꩻ တဗꩻသꩻအင်
မဲ့ထီရီႏလင်ꩻဗာႏ၊ ခံႏစာဗာႏစွဉ်ႏ ထာꩻဒုက္ခ။
ကွပ်နဝ်ꩻမꩻ လက္ခံႏသွော့ သဘာဝတရာꩻ။
နီကအုံဒင်ႏဒါႏ ကမ္ဘာႏ၊
လာ 🌕🌙ကအဝ်ႏလေဒါႏ ထာꩻဆကီလဲ့
သိပ္ပံပညာႏရိုꩻ တနီခါꩻအီႏခံႏဗာႏဒျာႏ
မွူး🌞အံႏမျောႏတဲ့။
🌞မွူးကအဝ်ႏလေဒါႏထာꩻ ဆꩻကီ
✨ဆာႏကအဝ်ႏလေဒါႏထာ အာႏကသꩻ
ဝွေꩻသီး အဆာႏ(ဟိုက်ဒရိုဂျင် လောင်စာ)မဉ်ႏလို့လဲ့
အီႏဖေ့၊ အီႏသီဒျာႏနေနေတဲ့။
အွိုး...လောႏကကို
စွူသေႏငါႏ အဝ်ႏကိုဒွုမ်အိုႏမုဲင်ꩻ
နဝ်ꩻမꩻ နီဗွေႏဘုရာꩻရိုꩻ
"သဗ္ဗေ အနိစ္စ ဝတ သင်္ခါရာ"တဲ့
မဲဉ်ႏမွေးငါႏထာꩻ။
ကွပ့်ꩻနဝ်ꩻမꩻ
ဒေါꩻသꩻ-ထာꩻသꩻဒွေါင်ႏသလျား
ထာꩻဗွိုႏထာꩻစန်းဝင်ꩻ၊
မာႏန-ထာꩻသꩻဖြုံႏထိုꩻ
အဃာတ- ထာꩻအွဉ်ႏအပြွေႏ
ဣဿာ-ထာꩻတကေး
မစ္ဆရိယ-ထာꩻစေꩻ စစွဉ်ႏ
တဟဝ်တဝ်းသꩻမျိုꩻ အဝ်ႏလိုးလွူးတဝ်း။
အဝ်ႏလိုႏလွူးဒျာႏသꩻ
ထာꩻစွဲးကမ်း၊ ထာꩻသꩻညင်ꩻ၊
ထာꩻသွိုꩻသွင်ႏ၊ ထာꩻရက်မေတ္တာႏဖုံႏ
အဝ်ႏလိုႏ လွောင်ႏလွောင်ႏဗူႏဗူႏငါႏဝင်ꩻ၊
တဖြာꩻတွမ်ႏတဖြာꩻ
အဝ်ႏလိုႏစွဲးပမ်းကူႏငီႏကိုငါႏဝင်ꩻသွူ။
ပွိုးထမုဲင်ꩻနဲးတဲင်
နီကအုံသော့ꩻဒါႏ လောႏကခမ်းကိုယိုနဝ်ꩻ
အနိစ္စ ထာꩻတမြဲတဝ်း ခမ်းကိုဒျာႏတဲင်
တနီꩻခါ ခွေတွမ်ႏသီနီတွမ်ႏနာꩻ
အီႏထန်ႏထိုꩻဗာႏဒျာႏနုဲင်းနုဲင်းဝင်ꩻသွူ။
ကွပ့်စွဉ်ႏ ထာꩻတဆင်ႏ အတောႏတွင်ꩻ
ပေႏယို ကုသိုလ်ႏထာꩻဟဝ်လဲ့
အဝ်ႏလိုႏမာꩻအာအာငါႏ။
ဘဝအဆင်ႏမဉ်ႏတပြေႏတဝ်းလဲ့
သေနန်းမာꩻသွော့ကုသိုလ်ႏ။
မဉ်ႏတပြေႏတဝ်းဒွုန်းလဲ့
မာꩻထဲင်းထဲင်ႏဖျင်သွော့ ကုသိုလ်ႏ
နီကုသိုလ်ႏ စွန်ꩻအာႏမဉ်ႏတလာလွဉ်တနီꩻခါသူꩻ
နီဘဝ အဆင်ႏအီႏပြေႏလွဉ်ဒျာႏ။
ကုသိုလ်ႏထာꩻဟဝ်ဒျာႏကအီႏပါနီဆꩻငါ
လွိုꩻအလင်နဝ်ꩻ နီပဲင်ႏ၊ နီဆဲင်ႏဆောင်း
တဆင်ႏလွုမ်🙂။
#ခွန်နေမိန်ဗွေႏ
#ပအိုဝ်ႏ
#ပအိုဝ်ႏငဝ်းခြုဲင်း
#ပအိုဝ်ႏတရာꩻ
