تەندروستی پێست

02/01/2025

سڵاو هاوڕێیانی پەیج ، دوای ماوەیەکی زۆر خۆشحاڵم دووبارە دەگەڕێمەوە لاتان ...
کیانو ڕێڤیس ئەکتەری بەناوبانگ و نیک کیرۆسی یاریزانی تێنسی ئوستڕاڵی هەردووکیان تووشبووی ئەلۆپیشیان ( نەمانی موو لە بەشێکی لەشیان ) ، ئەم نەخۆشییە زۆر هۆکاری هەیە ، دەکرێت هۆکارانەکان زیاتر بن لەوەی کە ئێستا دەزانرێت ، بەڵام بە گشتی و هۆکاری سەرەکی ئەم جۆرەیان کە تەنها بەشێکی لەشە سترێس و دڵەڕاوکێییەیە . نەخۆش لە هەر تەمەنێک بێت تووشی ئەم حاڵەتە ببێت دەبێت سەردانی پزیشکی پێست بکات و چەند پشکنینێکی سەرەتایی سادە بکات بۆ دڵنیا بوون لە تەندروستی گشتی کەسەکە ، دوای ئەم پشکنینە سادانە زۆربەی زۆری کاتەکان نەخۆش هیچ پێویست ناکات چارەسەر وەرگرێت و حاڵەتەکەی زۆر بە ئاسایی وەردەگیرێت چوونکە بە هیچ شێوەیەک نەخۆشیەکە ناگوازرێتەوە و ترسی نییە .
شێوازی چارەسەر جیاوازە و لەکەسێکەوە بۆ کەسێکی تر دەگۆڕدرێت بەڵام ٩٠% بەرەو سەرەوە هۆکاری چارەسەر تەنها ئەوەیە کە نەخۆش بە هەر نرخێک بێت دەیەوێت مووەکانی زوو بێنەوە و گرنگی بە زیانە لاوەکیەکانی دەرمانەکان نادات ...
هۆکاری ئەم دوو وێنەیە کە پۆستم کردووە ئەوەیە کە خەڵک هۆشیار بێت لەوەی ئەم ئەکتەر و یاریزانە ملیۆنێرن و باشترین پزیشکەکانی جیهانیان هەیە و هەموو کات باشترین ڕێگای دروست هەڵدەبژێرن بۆ تەندروستیان... هیچ کامیان چارەسەر وەرناگرن و بەسروشتی چاوەڕێی چاک بوونەوەن (کیانو ڕێڤیس چەند ساڵێکە چاک بۆتەوە بەڵام دەکرێت دووبارە تووش ببێتەوە و زۆر ئاساییە ) ، دورکەوتنەوە لە سترێس و بەردەوامی لە هەرجۆرێک وەرزش بێت باشترین چارەسەرە .
بۆیە هیوادارم هەر بەڕێزێک تووشی ئەم حاڵەتە بووە بەهیچ جۆرێک بیر لە دەرزی و کرێم و هیچ شتێکی تر نەکاتەوە جگە لە ڕێنمایەکانی پزیشکەکەی .

02/02/2023

دوای دابڕانێکی زۆر بەهۆی کۆڕۆنا و دواتر دەست پێکردنی شەڕی ڕووسیا و ئۆکرانیا ،جارێکیتر هەوڵ دەدەم بگەڕێمەوە لاتان و بتوانم خزمەتێکی بچووکیش بێت پێشکەشتانی بکەم ...
ئەم وێنەیە سەدەفییە ، لای هەندێک کەس بە گەڕی ناوی دەبەن ، لە ڕاستیدا ئەمە یەکێکە لە پاک ترین نەخۆشیەکان ، کەسی تووشبوو بەم نەخۆشیە تووشی ناڕەحەتی دەبێت بەڵام بەهیچ شێوەیەک هیچ زیانێکی نییە بۆ کەسی بەرامبەر ، تەنانەت پزیشکی نەشتەرگەری گەر تووشبووی ئەم نەخۆشیە بێت بۆی هەیەی لە کارەکەی بەردەوام بێت و نەشتەرگەری بکات و زیانی نابێت بۆ نەخۆشەکانی .

28/03/2020

contact dermatitis
ئەمە جۆرێکە لە هەستیاری بەهۆی بەرکەوتنی پێست بە ماددەکانەوە ڕوو دەدات ، لە کەسێکەوە بۆ کەسێکی تر جیاوازە و لە هەندێک حاڵەت کەسەکە پێشتر هەستیاری نەبووە بەو ماددەیە ...
ئەم نەخۆشە هەستیاری هەیە بەو ئاسنانەی لە وێنەکەدا دیارە و خۆی هەستی پێ نەکردووە کە هۆکارەکەی ئەو ئاسنانەیە ، دوای بەکار هێنانی چارەسەر لە وێنەکانی تر دیارە بەتەواوی چاک بۆتەوە ...

06/09/2019

ئەم جۆرە حەشەرەیە جۆری زۆرە پێی دەڵێن گەنە و زیاتر لە مەڕ و ماڵات دەدات ، سەری دەچەقێنێتە پێستەوە یان گوانی مەڕ و ماڵات و خوێن دەمژێت ، ئەم حاڵەتەی دەیبینن نەخۆشێکمە هاتۆتەلام سەرەتا نەی دەزانی حەشەرەیە ، ئەمەش جۆرێکە لە جۆرەکانی گەنە ، لەم حاڵەتە دەبێت دوای دەرهێنانی پشکنین بۆ حەشەرەکە بکرێت چوونکە دەکرێت نەخۆشی ترسناکی لەگەڵ بێت ....

23/01/2019

دیسان ترساندی خەڵک گوایە خوێیەک هەیە دەیکەیتە ناو ئاوی لیمۆوە ڕەش دەبێت و دەبێتە هۆی ژێرپەنجە ، ئەمە ئەسڵ و ئەساسی نییە و دوورە لە ڕاستیەوە ...
هەر وەک چۆن باسی ترسناکی ڕۆن کرا و باسی خراپی ئیندۆمی کرا ئەمەش بەهەمان شێوە تەنها بۆ ترساندنی خەڵکە ...
زۆر سەیرە بەسەدان پسپۆری خۆراک و خواردنمان هەیە ، بەسەدان کەس ماستەری لەم بوارە هێناوە بۆ یەک کەس نایەتە جواب ؟
گۆڕانی ڕەنگی خوێ بەهۆی کارلێکی یۆدەوەیە لەگەڵ ئاوی لیمۆ ، ئەمەش مانای وایە خوێکە یۆدی تێدایە ، ئەگەر یۆدت پێویست نییە خوێیەک بکڕە کە یۆدی تیانییە و هەرزان تریشە ، من بەرگری لەم کۆمپانیای خوێیانە ناکەم چوونکە بەس خوا دەزانێت چۆن دروستی دەکەن و ئەوە ئیشی کوالێتی کۆنتڕۆڵە خراپی و باشی خوێیەکە دیاری بکات ، من تەنها دژی ترساندنی خەڵکم ...
مەسەلەی ئیندۆمیەکەش کە ماوەیەکی زۆر باس دەکرا ئەسڵ و ئەساسی نییە و یابان و صین و کۆریا هەزاران ساڵە دەیخۆن و هەمان پێکهاتەی ماکەرۆنەیە هیچ جیاوازیەکی نییە ، گەر ئیندۆمی خراپ بێت کەواتە مەکەرۆنەش خراپە ، ناشڵێم ئەوانەی کوردستان 100% تەندرووستن ئەوە ئیشی کوالێتی کۆنتڕۆڵە مادام لە بازاڕ دەفرۆشرێت و لە شوێنێکی تەندرووستدا هەڵدەکیرێت کەواتە زیانی نییە ...
هۆکاری بڵاوبوونەوەی ئەم هەواڵانە دوو هۆکاری هەیە :
یەکەم هۆکاری بازرگانی ، بۆ نموونە کەسێک دەیەوێت خوێکەی خۆی ساغ کاتەوە کە یۆدی تێدانییە بۆیە ڕیکلامێکی وا دروست دەکات ، یان مەسەلەی ئیندۆمیەکە کە هەندێک وڵاتی تری جیهانیشی گرتەوە هۆکارەکەی کەمی نرخ و هەرزانی و زوو ئامادە کردنی یەتی ، ئەمەش زیان دەیات لە کۆمپانیاکانی فاست فوود و ڕێستۆرانتەکان ، لە ڕاستیدا ئیندۆمی گەر کوالێتی باش بێت زۆر بەسوود ترە لە هەرچی خواردی فاست فوودە بە کاباب و گۆشت و برنج و شلەشەوە ...
هۆکاری دووەمی بڵاوبوونەوەی ئەم هەواڵانە ترساندن و سەرقاڵ کردنی خەڵکە ...
لە کۆتاییدا داوای شەیر و کۆمێنت ناکەم داوا دەکەم تا دەکرێت خوێ و شەکر کەم بکەنەوە چوونکە زیان بە تەندروستیت دەگەیەنن ...

08/01/2019

ڤایرۆسەکانی جگەر بەهەموو جۆرەکانیەوە و ڤایرۆسی HIV بەهیچ شێوەیەک ڕێگە لە زەواج ناگرێت و هیچ مەترسی گواستنەوەی نابێت بە مەرجێک ڕێنماییەکانی پزیشک پەیڕەو بکرێت و دەتوانن منداڵی تەندروستیش بخەنەوە ، هەر پزیشکێک زەواج قەدەغە بکات هەڵەیەکی گەورەی کردووە ...

08/01/2019

05/12/2018

سەیرە کەناڵێکی وا گەورە و گران وا ئەبێت بە ٢٠١٩ بە دوو دکتۆر بابەتێک باس دەکەن بە شێوەیەکی هەڕەمەکی و پێدانی چەندین زانیاری هەڵەی گەورە بە هاوڵاتیان و ترساندنیان !! لەسەر ئەم هەڵانە بەهیچ شێوەیەک نابێت وەزارەتی تەندروستی بێدەنگ بێت ، تێناگەم چ سوودێک دەبینن لە ترساندنی خەڵک ؟ یان ترسناک کردنی کەسانی تووش بوو یان هەڵگری ئەم ڤایرۆسە لەناو کۆمەڵگا ؟ ئەبێت گوناحیان چیبێت لە کۆمەڵگەیەکدا دەژین ڕۆشنبیری و هۆشیاری پزیشکی سفرە ...
بە چەند خاڵێک هەڵەکان باس دەکەم کە نابێت دکتۆرەکانیش بێدەنگ بن لەم ترساندنە :
١-بەهیچ شێوەیەک ئەم فایرۆسە لە ڕێگەی ماچ کردنەوە ناگوێزرێتەوە ، ڕاستە لە لیکدا ڤایرۆسەکە لە چەند حاڵەتێک دەبینرێت بەڵام کۆتا ڕاپۆرتی who هاوڵاتیان دڵنیا دەکاتەوە کە هەر سێ جۆری ( بی و سی و دی ) لە ڕێگەی ماچ کردنەوە ناگوێزرێتەوە هەر وەک ڤایرۆسی HIV کە ئەویش لە ڕێگەی ماچەوە ناگوازرێتەوە ، نەک هەر بەماچ ڤایرۆسی جگەری جۆری (بی) بە شیردان بە منداڵیش ناگوازرێتەوە .
٢. گواستنەوەی لەڕێگەی شلەکانی جەستە وەک دکتۆرە پێشکەشکارەکە باسی کرد ، ئەمەش زانیاریەکی هەڵەیە چوونکە بە تێکەڵاو بوونی شلەکانی جەستە ناگوازرێتەوە لە چەند حاڵەتێکی دەگمەن نەبێت کاتێک کە شلەی جەستەی کەسی نەخۆش بەر برینێک یان ڕووشاوی کەسی بەرامبەر دەکەوێت ، تەنانەت گەر بەرکەوتنیش هەبوو لەم حاڵەتەش دا ئەگەری تووش بوون ١٢٪ بۆ ١٥ یە .
٣.بەهیچ شێوەیەک ئەم ڤایرۆسە مەترسی وەک ڤایرۆسی HIV نییە ، ئەم ڤایرۆسە کاری بە بەرگری لەش نییە بەڵکو تارگێتی ئەم ڤایرۆسە خانەکانی جگەرە نەک بەرگری لەش ، ڤایرۆسی جگەری جۆری (ئەی) هەندێک کات پێویستی بە چارەسەر نییە و بەرگری لەشی مرۆڤ دژی دەوەستێتەوە ، جۆری (بی) کە بە ترسناکترین ناو دەبرێت چوونکە ١٪ دەکرێت ببێتە هۆی مردن لە ماوەی هەفتەیەک بۆ دوو هەفتە ، بەڵام ٩٠٪ ی کەسی تووش بوو پێش ٦ مانگ چاک دەبێتەوە بەهۆی وەرگرتنی چارەسەر و وەڵامدانەوەی بەرگری لەشی ، ٩٪ ی نەخۆشیش دوای ٦ مانگ نەخۆشیەکەی بەردەوام دەبێت و دەبێتە ڤایرۆسی جگەری جۆری (بی درێژ خایەن) لەم حاڵەتەش دا نیوەی نەخۆشەکان چاک دەبنەوە نیوەکەی تر دەبن بە دوو گروپەوە یەکەم گروپ دەبێتە هەڵگری نەخۆشییەکە واتە ڤایرۆسەکە چالاک نییە و مەترسی لەسەر ژیانی نابێت ، گروپی دووەم هەڵگرە و ڤایرۆسەکەش چالاکە و ئەم گرووپە ئەگەری تووشبوونیان هەیە بە داڕزانی جگەر یان ژێرپەنجەی جگەر ئەگەر هیچ چارەسەرێک بەکار نەهێنن ، لەم حاڵەتەی کۆتاییشدا هێشتا نەخۆش بێ ئومێد نابێت و دەکرێت جگەری بۆ بگۆڕن کە نەشتەر گەریەکی گەورەیە .
٤. ئەو نەخۆشە ئافرەتەی کە یەکی مانگ هاتووە و بۆتە هۆی گێرمە و کێشەیەکی گەورە پێویستە سکاڵا تۆمار بکات چوونکە ئەم دکتۆرە بەڕێزە وەک باسی پشکنینەکەی دەکات تازە زانیوێتی کە نەخۆشە و تووشبووە بە ڤایرۆسەکە جارێ هیچ ڕوون نەبۆتەوە کە چ جۆرێکە ، جۆری (بی کورت خایەنە ) یان (بی درێژخایەن ) ئایە ڤایرۆسەکە ئەکتیڤە یان نا و چەندین پشکنینی وردی تر کە لەلایەن پسپۆری نەخۆشیەکانی جگەر دەکرێت و ئینجا بڕیار لەسەر ترسناکی دەدرێت ، ئەو ئافرەتە ئێستا دنیای لەبەر چاو ڕەش بووە و چاوەڕێی مردنە و ڕووخاوە لە هەموو ڕوویەکەوە دوای بینینی ئەم بەرنامەیە ، لەوانەیە هیچ ئەندامێکی خێزانیشی نەوێرن لێی نزیک بنەوە ، ئەمە خۆی لە خۆیدا تاوانە و نابێت وەزارەتی تەندروستی بێدەنگ بێت .
٥.ئەم ڤایرۆسە بە هیچ شێوەیەک وەک ڤایرۆسی HIV نییە ، ڤایرۆسی HIV تارگێتی بەرگری لەشی مرۆڤە و بەرگری لەش لەناو دەبات بەڵام ڤایرۆسەکانی جگەر پەیوەندیان بە بەرگری لەشەوە نییە و تارگێتیان خانەکانی جگەرە بە هۆی وێران کردنی خانەکانی جگەر ئەنزیمەکانی جگەر تێک دەچن .
٦. ڤایرۆسی جگەری جۆری (بی) داڕزاندنی جگەری ١٠٠٪ بەناوچەوانەوە نییە و گەر داڕزانی جگەریش ڕوویدا یام ژێرپەنجای جگەر ڕوویدا کۆتایی و مردن نییە ، ئەمەش ڕووخاندنی وورەی ئەو نەخۆشانەیە کە داڕزانی جگەریان هەیە ، سەدان ملیۆن کەس لە جیهان تووشبووە بەم ڤایرۆسی جگەری جۆری (بی) یە و ژیانێکی ئاساییان هەیە و منداڵ و ماڵیان هەیە وەک هەموو کەسێکی ئاسایی دەژین و زۆربەیان پێویستیان بە چارەسەریش نییە ، ئەوانەی ڤایرۆسەکەش تیایاندا ئەکتیڤە بە چارەسەری درێژ خایەن دەکرێت ئەکتیڤی ڤایرۆسەکە بەتەواوی کەم بکرێتەوە بە مەرجێک ڕێنمایەکانی پزیشک جێبەجێ بکات وەک دورکەوتنەوە لە مادە کحولیەکان و خواردنێکی تەندروست و سەردانی کردنی بەردەوامی پزیشک بە پێی ئەو خشتەیەی بۆ دادەنرێت .
-لەکۆتاییدا داواکارم لە کەناڵی ڕووداو لە بری ترساندنی خەڵکی و ترسناک کردنی تووشبوانی ئەم نەخۆشیە لە بەرچاوی کۆمەڵگا باشترە پرۆگرامێکی تایبەت بکەن لەسەر ژیانی ئەم کەسانە و گەڕاندنەوەیان بۆ ناو کۆمەڵگا و بەرز کردنەوەی ورە و هەست و سۆزیان ، پیشاندانی تووش بوانی ئەوروپا و ووڵاتە پێشکەوتووەکان کە چۆن تێکەڵاوی یەکن و ئاسایی ژیان بەڕێ دەکەن لە ڕەوزەوە تا زانکۆکانیان وەک کەسێکی ئاسایی مامەڵەیان لەگەڵ دەکرێت دوور لە ترس و دڵە ڕاوکە و بەدوورە پەرێز گرتنیان ، دروست بوونی کێشەی خێزانی و لێک ترازانی خێزان دوای تووشبوون بەم نەخۆشیە یان لە کاتی زانین بەم نەخۆشییە هۆکارەکەی کەمی ڕۆشنبیری و هۆشیاری پزیشکییە کە پزیشکەکان و میدیاکان لێی بەر پرسن .
-ئەم دکتۆرە بەڕێزە داوای دوو شتی جوانی کرد لە کۆتاییدا ، یەکەم کارمەندانی تەندروستی دەبێت هاوکار بن و زیاتر ئاگاداری کەرەستەی نەشتەرگەریەکان و خۆشیان بن ، دووەم دەبێت حوکمەت بەرنامەیەکی تۆکمە و باش دابنێت بۆ بەرەنگار بوونەوە و چارەسەری ئەم نەخۆشیە و دابین کردنی دەرمان و پێداویستیەکانی پشکنین بۆ نەخۆشەکان بێ بەرامبەر وەک لە زۆربەی وڵاتانی ئەوروپی پەیڕەو دەکرێت .

02/09/2018

زۆر گرنگە دایکان و باوکان لەکاتی بەکار هێنانی کرێم بۆ چارەسەری ئەکزێما یان هەر هەستیاریەکی تر ئاگاداری کۆرپەکانیان بن و بەهیچ شێوەیەک نەهێڵن کۆرپەکانیان بەر ئەو بەشە بکەوێت کە کرێمەکەیان بەکار هێناوە ، گەر دەستەکان بوو باشتر وایە لە کاتێکدا کە کۆرپەکانیان دەخەوێت کرێم بەکار بهێنن ، گەر کۆرپەی خۆشت نەبێت و هی کەسە نزیکەکانت بێت دەبێت پزیشک ئاگادار بکەیتەوە لەوەی کۆرپە لە ماڵەکەتان دەژی تا پزیشکەکە ڕێنمایی تەواو و تەندروستت بداتێ لە بەکار هێنانی کرێمەکان ...

23/04/2018

پاسکیل سواری و سوودەکانی بۆ پێست ...
١- پاسکیل سواری دەبێتە هۆی بەرز کردنەوەی بەرگری لەش دژی نەخۆشیەکانی پێست.
٢- چالاک بوونی سووڕی خوێن کە دەبێتە هۆی گەیشتنی خوێنی پێویست بۆ پێست .
٣- پیربوون و چرچ بوونی پێست دوا دەخات .
٤- ئارەقە ڕژێنەکان چالاک دەکات و یارمەتی دەر دەبێت بۆ فڕێدانی پاشەڕۆ زیان بەخشەکانی پێست .
جگە لەم سوودانەی پاسکیل سواری ،ئێجگار سوودی گرنگی تری هەیە بۆ لەش کە بە ڕاستەوخۆ و ناڕاستەوخۆیی پەیوەندیان بە پێست و ڕوخساری مرۆڤەوە هەیە ، هەندێک لەوانە :
- ڕێک خستنەوەی هۆڕمۆنات .
- یەکێکە لە وەرزشە زۆر باشەکان بۆ دابەزانی کێش بەجۆرێک ٤٥ دەقە پاسکیل سواری واتە سووتانی نزیکەی ٥٠٠ کالۆری .
- تەندروستی دڵ دەپارێزێت .
- تەندروستی جومگەکانی لەش دەپارێزێت بەتایبەتی ئەژنۆکان و بڕبڕەی پشت .
- یارمەتی دەرە بۆ سترێس و قەلەقی و خەوی شەو ئارام دەکات .
- ماسولکەکانی قاچ بەهێز دەکات .
- سییەکان بەهێز دەکات و کرداری هەرس ئاسان دەکات .
ئەوەی دڵ خۆشکەرە ئەوەیە کە کەسانی بە تەمەن گەر پاسکیل سواری بکەن ٣ ئەوەندەی کەسانی تر سوودمەند دەبن لە سوودە بێهاوتاکانی ، بۆیە هیچکات دڕەنگ نییە بۆ پاسکیل سواری ...
بەهیوای تەندروستییەکی باشتر ...

29/01/2018

دوژمنی پێست خەمۆکییە ، دوای منداڵ بوون ئەگەری زۆری دروست بوونی خەمۆکی هەیە لەدایکان ، بۆ خۆپاراستن لەم جۆرە خەمۆکیە گفتوگۆ کردن باشترین چارەسەرە ، دایکانی بەڕێز پێویستە دوای منداڵ بوون بەردەوام بن لەسەر پەیوەندیە کۆمەڵایەتیەکان و گفتوگۆکردن بۆ تەندروستی خۆت و کۆرپەکەت ...