الدكتور أحمد عليان عيد Dr. Ahmed Alian Eid

06/06/2026

يسعد صباحكم بكل خير

فائدة مهمة

تقنية التعزيز الإيجابي من أهم التقنيات المستخدمة بالعلاج السلوكي،

وفكرتها بسيطة جدًا:
لما الطفل يعمل سلوك منيح، بنقدمله مكافأة أو تشجيع مباشرة بعد السلوك، عشان يتحفز ويكرر نفس التصرف مرة ثانية. ومع الوقت، بصير هالسلوك عادة ثابتة عنده.

مثال على هيك، إذا كان الطفل عنده فرط حركة وتشتت انتباه، وكل مرة بقعد يراجع دروسه لمدة 15 دقيقة بدون ما يتشتت، ممكن نعطيه نجمة، أو نحكيله: "أحسنت، شاطر"، أو نعطيه وقت إضافي للعب. ومع التكرار، الطفل بصير يفهم إنه التركيز والسلوك المرتب إله نتيجة إيجابية وبيخليه يحصل على تشجيع ومكافأة.

هاي التقنية بتعتمد على نظام المكافأة بالدماغ، لأن الدماغ بطبيعته بحب يكرر السلوك اللي مرتبط بمشاعر إيجابية زي الفرح والرضا.

عشان هيك، كلمات بسيطة مثل "أحسنت" أو "أنا فخور فيك" ممكن يكون إلها تأثير كبير بتعديل السلوك.

التعزيز الإيجابي بنستخدمه بعلاج كثير من المشكلات النفسية والسلوكية، مثل
تشتت الانتباه،
وضعف الدافعية،
والقلق،
وصعوبات التعلم،
واضطرابات السلوك عند الأطفال.
وكمان ممكن نستخدمه مع الكبار لتطوير عادات جديدة، مثل تنظيم الوقت أو التحكم بالانفعالات.

ولحتى ينجح التعزيز الإيجابي، *لازم تكون المكافأة مباشرة بعد السلوك المطلوب، ولازم تكون محببة للشخص.* كمان لازم يكون السلوك المطلوب واضح ومحدد، ويتم تطبيق التقنية بشكل مستمر، لحد ما يصير السلوك الإيجابي عادة ثابتة ومستقرة.

✍️ *د. أحمد عليان عيد*
**أخصائي واستشاري الصحة النفسية - غزة**

05/11/2026

رقم (745)
*"لأنك مش لحالك… كلمة بتطمن وقلب بيرتاح"*

✍️ *د. أحمد عليان عيد*
**أخصائي واستشاري الصحة النفسية - غزة**

العنوان:
*لما تغيب الهمّة… كيف الإحباط بقتل القرار وبيكسر النفس؟*

أحيانًا المشكلة مش بالفكرة…
ولا بالقرار…
ولا حتى بالهدف…

المشكلة الحقيقية إنك تكون بدك تتحرك،
بس حواليك ناس:
* مترددة
* محبطة
* بتأجل
* أو ما عندها استعداد تتحمل

هنا وللأسف الإحباط ما بصير مجرد شعور…
بصير عبء نفسي ثقيل.

*والسؤال المهم كيف الإحباط بيبدأ؟*

باختصار لما الإنسان يكون عنده رغبة يعمل شيء حقيقي،
ويلاقي: قلة جدية
ضعف تنفيذ
كلام كثير بدون فعل
أو ناس تنسحب عند أول ضغط

*بيبدأ يحس: “ليش أتعب؟”*
*“شو الفايدة؟”*
*“أنا لحالي؟”*

ومع الوقت، هاي المشاعر إذا تراكمت…
بتأثر نفسيًا بشكل كبير.

*الإحباط مش بس مزاج سيء…*
*الإحباط المتكرر ممكن يعمل:*

* استنزاف نفسي

* ضعف دافع

* شك بالذات

* توتر وعصبية

* فقدان الشغف

* أو حتى انسحاب كامل

يعني الإنسان ما بيتعب بس من الظروف…
أحيانًا بيتعب من غياب الناس اللي تشيل معه.

*ليش وجود الأشخاص الأقوياء مهم نفسيًا؟*

لأن الإنسان بطبيعته بيتأثر بالبيئة.

لما تكون مع ناس:
* جاهزة
* ملتزمة
* بتتحمل
* وعندها روح إنجاز

*بتحس بطاقة أمل وقوة*

أما لما تكون مع ناس: كلها تشاؤم
تراجع
وأعذار…

حتى القوي ممكن يضعف.

*الشيء المفيد كيف نحمي نفسنا من الإحباط؟*

1. اختَر مين حولك
مش كل الناس لازم تكمل معها.
قرّب من أصحاب الفعل… مش بس الكلام.

2. لا تربط قيمتك بتقصير الآخرين
إذا غيرك قصّر…
هذا لا يعني توقف.

3. خليك واقعي
مش كل الناس رح تكون بنفس همّتك،
بس وجود بعض الناس الصح… بيفرق.

4. ارجع لهدفك
ليش بدأت؟
شو رسالتك؟
شو اللي بدك توصله؟
لما تتذكر الهدف،
بتخف سيطرة الإحباط.

إحنا اليوم وخاصة بقطاع غزة تحت ضغط كبير.
وأي مشروع، مبادرة، أو فكرة…
ممكن تتعب مش بس من الظروف المعقدة،
لكن من الإحباط الداخلي وخاصة عند الشباب.

*عشان هيك، الصحة النفسية اليوم مش بس راحة…*
هي قدرة على الاستمرار رغم التعب.

رسالة ختامية إلك

إذا حسّيت بالإحباط…
هذا لا يعني إنك ضعيف.
يمكن يعني إنك كنت تحاول أكثر من كثير ناس.

بس انتبه…
لا تسمح للإحباط يحوّلك لشخص توقف.

دور على الناس الصح
خفف أثر السلبية
وخلّي قوتك النفسية أقوى من خيبة اللحظة.

لأن بعض القرارات الكبيرة…
بتبدأ بشخص واحد ما استسلم.

*دمتم بخير ودفء نفسي دائم*
#د.أحمد_عليان_عيد

04/18/2026

رقم (742)
*"لأنك مش لحالك… كلمة بتطمن وقلب بيرتاح"*

✍️ *د. أحمد عليان عيد*
**أخصائي واستشاري الصحة النفسية - غزة**

العنوان:
*ليش العمل التطوعي طريق راحة نفسية… وقرب من ربنا؟*

كثير منا بهالوقت الصعب اللي بنعيشه،
بيسأل:
ليش أتطوع؟
ليش أساعد غيري وأنا نفسي محتاج؟

بس الحقيقة الأعمق:
التطوع مش بس عطاء للناس…
هو عطاء لنفسك قبل أي حد.

*أولًا: ليش التطوع مهم إنسانيًا؟*

لأننا بشر،
وبنحتاج بعض.
لما تساعد غيرك:
بتخفف ألمه
وبتخفف عن حالك كمان
وبتحس إنك مش عاجز
العطاء بيرجّع للإنسان إحساسه بالقيمة،
خصوصًا في وقت بيحس فيه إنه ضعيف أو محاصر.

*ثانيًا: شو علاقته بالإسلام؟*

ديننا من البداية حثّ على الخير،
وعلّمنا إن أفضل الناس هم اللي بينفعوا غيرهم.
النبي ﷺ قال:
*"أحب الناس إلى الله أنفعهم للناس"*
وقال كمان:
*"والله في عون العبد ما كان العبد في عون أخيه"*

يعني كل مساعدة بتقدمها،
هي مش بس للناس…
هي علاقة بينك وبين ربنا.
حتى أبسط الأشياء:
* كلمة طيبة
* مساعدة صغيرة
* وقفة جنب حدا محتاج
* حفل ترفيهي للاطفال
* توعية وتثقيف
* وقوفك مع فريقك حتى لو ماعملت شيء
كلها محسوبة… وكلها إلها أثر كبير.

*ثالثًا: الفائدة النفسية للتطوع*
من خلال خبرتنا،
الإنسان لما يعطي، بيحس بـ:
* راحة نفسية
* هدوء داخلي
* تقليل القلق والتوتر
* إحساس بالمعنى
* قوة بدل العجز
* التطوع نوع من العلاج النفسي…
بس بطريقة إنسانية وبسيطة وبدون مايكون في استغلال للطاقة.

في واقعنا الحالي بقطاع غزة
إحنا اليوم بنعيش ألم كبير.
خسارة، خوف، ضغط…
بس رغم كل هذا،
لما شاب يساعد، أو يواسي، أو يشارك…
هو مش بس بيساعد غيره فقط،
هو بيحافظ على إنسانيته.
واللي بيحافظ على إنسانيته بهيك وقت…
هذا إنسان قوي وأجره كبير عند ربنا.

*ختاماً رسالة إلك*
إذا حسّيت إنك تعبان… جرّب تعطي.
مش لأنك كامل،
لكن لأن العطاء بيداوي.
وإذا ساعدت حدا،
تذكر إن ربنا شايفك،
ومش رح يضيع تعبك.
خلي نيتك صافية،
وعملك بسيط،
وأثرك كبير.

*دمتم بخير ودفء نفسي دائم*
#د.أحمد_عليان_عيد

12/11/2025

رسالة لأهلنا وأحبابنا في قطاع غزة…
اليوم الشباب معكم في


مبادرة الشباب اللي قرروا يكونوا واقفين جنب أهلهم باللي بيقدروا عليه.
يمكن ما نملك إمكانيات كبيرة، ولا أدوات ميدانية…
بس اللي عنا أهم:
صوتنا، كلمتنا، إحساسنا، وتعاطفنا الحقيقي مع الناس.

إحنا دورنا نكون صوت ووقفِة مع أهلنا…
قلوبنا معكم بكل لحظة.

مبادرتنا دعم معنوي ونفسي، كلمة بترفع معنويات، رسالة بتخفّف توتر، دعوة من القلب توصل لحدا محتاج يسمع إنه مش لوحده.

وإن شاء الله الكل يضل بخير وسلامة…
وإن شاء الله نقدر نكمّل مشوارنا كشباب قادرين يصنعوا أثر حتى بأبسط الطرق.

مؤسسة مبادرة الجيل الفلسطيني الموحد
د. أحمد عليان عيد








ٍ_على_النازحين

12/10/2025