Green Pastures Coaching -Noha assad

10/12/2026

09/20/2026

"لو كنت اتصلت !!!😔
لو كنت رحت في المبعاد 😣لو ماكنتش اجلت المقابله دي🥺
لو لو
لو كنت عملت حاجة تانية... كان ممكن كل حاجة حصلت تتغير

الجملة دي بتتقال في كل انواع الفقد زي ما قولنا قبل كدا حد بنحبه شغلانة راحت، علاقة خلصت، صحة، حتى حلم كنا مصممين إنه هيحصل. الفقد أشكال كتير...

وكل نوع فقد فيهم، عقلك بيعمل نفس الحاجة... بيرجع بالزمن، ويخترع سيناريو بديل: "لو الظاهرة اسمها البدائل الافتراضيه

ليه العقل بيعمل كده؟ لما حاجة تحصل وتكون برّه إيدك خالص... ده إحساس مرعب، لإنه معناه "أنا مش متحكم في حياتي." 👍
فالعقل بيلجأ لحل بديل: يخليك تلوم نفسك. اللوم

بيوهمك إنك كنت تقدر تتصرف غير كده... يعني كنت متحكم، 😟بس اخترت غلط. وده أسهل نفسيًا من إنك تقبل إن الموضوع من الأساس مكانش في إيدك.

وفيه حاجة تانية بتحصل بالتوازي... . عقلك بينسى إنه مكنش عارف وقتها، وبيقنعك إن النتيجة كانت واضحة من الأول. 🤨
فالقرار اللي اخذته ببيانات ناقصة، بيتحاكم دلوقتي وكأنك كنت شايف كل حاجة.🧐

الحل:
فبدل "ليه معملتش حاجة تانية؟"... اسأل نفسك: "أنا كنت عارف إيه وقتها🤷‍♀️؟" السؤال ده بيفرّق بين اللي كان متاح فعلاً، واللي عقلك بيتخيله دلوقتي.🙎‍♀️

بس فيه سؤال أعمق بيفضل موجود حتى لما نوقف اللوم... هل ممكن نحب حد أو حاجة فقدناها، 💔من غير ما الحب ده يفضل بيوجعنا في دا الي هنتكلم عنه في الفيديو الجاي
من سلسلة افهم مشاعرك
GreenPasturesWithNoha


Green pastures counseling@ outlook .com

09/11/2026

تخيل إنك ماشي في طريقك عادي… فجأة تشوف مكان معين او تسمع أغنية أو ريحة عطر، وتلاقي نفسك دموعك بتنزل لوحدها زي أول يوم. إحساس غريب، صح ؟!! دا مش انتكاس، ولا معناه إنك رجعت للنقطة صفر.
الحزن مش خط مستقيم بنخلصه... الحزن زي موجة البحر: تعلى، توصل لأعلى نقطة، وبعدين تهدى.
و وهنا عقلك طبيعي يتأرجح بين لحظة بتواجه فيها ألم الفقد، ولحظة بترجع فيها لحياتك. التنقل ده هو أصل التعافي والصحة النفسية.
فلما تيجي الموجة... متقاوميهاش. سمّي إحساسك، خد نفس عميق، وارجع للحظة الحالية بحواسك: المس اي حاجة جنبك، وركز في صوت حواليك عشان تهدّي جهازك العصبي.
بس بعد ما الموجة تهدى، بيفضل سؤال ثقيل بيزن في دماغك: "هو أنا السبب؟ ولو كنت عملت حاجة مختلفة... كان ممكن النتيجة تتغير؟"
ووهم السيطرة وجلد الذات ده هو المعركة الحقيقية. في الحلقة الجاية هقولك ليه عقلك بيعمل كده وازاي تتخلص من ثقل اللوم. شاركوني في التعليقات: تفتكري اللوم حماية لعقلك ولا عذاب لنفسك؟
GreenPasturesWithNoha


Green pastures counseling@ outlook .com

09/02/2026

هو يعني ايه فقد هو ممكن تكون بتفقد شخص وهو لسه قدامك ؟!

دا ممكن جدا يكون فقد بس فقد ان العلاقة اللي انتهت وأحيانًا… ما بنفقدش شخص أصلًا.
بنِفقد شغل… صديق… مكان عشنا فيه سنين… أو حتى نسخة قديمة من نفسنا كنا بنحبها.

وعشان كده، بنحس إننا مش فقدنا حاجة واحدة… إحنا فقدنا حياة كاملة كانت مرتبطة بالحاجة دي.

في علم النفس، في مصطلح بيوصف الحالة دي بالظبط: “الفقد الغامض”. وهو إن الحاجة أو الشخص يكون لسه موجود بشكل ما… بس مش بالشكل اللي كان بيدّيك بيه أمان وانتماء،

عقلك كان متعود على شكل معين للحياة… وفجأة الشكل ده اتغير.عشان كده بتلاقي نفسك تلقائيًا بتدور على رسالة مش هتيجي…
أو تعدي من مكان، فتفتكر كل حاجة حصلت فيه.
وممكن تكون كويس يوم…
ويوم تاني صورة أو أغنية ترجعلك الوجع فجأة،
فتقول لنفسك: “هو أنا لسه ما تخطيتش؟”
أنت هنا بتتعلم تعيش مع واقع جديد… واقع مفيهوش الحاجة اللي كنت متعود إنها تكون موجودة.
وعشان كده التعافي مش معناه إنك تنسى… التعافي إن الذكرى تفضل موجودة…

لكن الألم ما يفضلش هو اللي بيدير حياتك.

وفي الحلقة الجاية، هنتكلم عن حاجة بتحصل مع ناس كتير بعد الفقد:
ليه الحزن بييجي على شكل موجات؟

وليه ممكن يوم تحس إنك كويس جدًا… ويوم تاني تحس إنك انهرت من جديد؟
دا الي هنعرفه الفيديو الجاي في سلسلة افهم مشاعرك
GreenPasturesWithNoha


Green pastures counseling@ outlook .com

08/26/2026

عارفين ليه ما نزلتش فيديوهات بقالي مده
لأني كنت حزينة…
ومرة واحدة، الكلام اللي كنت بقوله للناس عن الحزن… بقيت أنا اللي بعيشه.
صاحبتي وبنتها انتقلوااثر حادث اليم
قلبي كان واجعني…
وعقلي رافض يصدق اللي حصل.

وعشان كده اختفيت شوية.
مش عشان ما عنديش كلام أقوله…
لكن عشان المرة دي، أنا كنت محتاجة أعيش إحساسي قبل ما أتكلم عنه.
وده خلاني أرجع أفتكر آخر فيديو اتكلمنا فيه عن الحزن
إن الحزن مش بس بيختلف من شخص لشخص…
ده حتى نفس الشخص ممكن يحزن بطريقة مختلفة من موقف الي موقف
…أنا ممكن أعيط لما أكون موجوعة
وإنت تسكت.
أنا ممكن أحتاج أتكلم…
وإنت تحتاج تبقى لوحدك.
ممكن شخص يبان قوي جدًا،
وهو من جواه متكسر.
وممكن شخص يضحك ويكمل حياته،وهو لسه بيتوجع.
وعشان كده…
إحنا ساعات بنظلم الناس في حزنهم،
لأننا بنحكم على اللي ظاهر…
مش على اللي جواهم.
فنقول:
“هو مش زعلان.”
“هي مكبرة الموضوع.”
“ده نسي بسرعة.”
لكن الحقيقة إحنا ما نعرفش فعلًا إيه اللي بيحصل جواهم.
لأن الحزن ملوش شكل واحد…
ومش كل حزن لازم يشبه حزننا.
GreenPasturesWithNoha


Green pastures counseling@ outlook .com

08/09/2026

غلطه كبيره بنعملها كلنا مع الحزن بنحاول نهرب منه من غير ما نعرف ان الهروب دا الي بيطول عمره
يمكن فاكر إن الحزن شعور غلط او عيب فيك لازم تتخلص منه بسرعة…
لكن الحقيقة مختلفة تمامًا.
“أول حاجة بنعملها لما نحزن، إننا بندور على طريقة نهرب منه بيها.”

لكن يا تري جربنا نسأل نفسنا هو: “الحزن بيحاول يقوللي إيه؟”

الحزن مش عدو ليك !!
الحزن بيظهر لما تخسر حاجة كانت غالية عليك.
ممكن يكون شخص… أو علاقة… أو حلم… أو حتى حياة كنت متخيلها بشكل معين.
الحزن بيقولك: “اللي فقدته كان مهم.”

زي لما تخسر حد قريب منك، وإنت حاسس إنك عايز تهدى شوية وتقعد لوحدك.”
ده مش انهيار او استسلام … ده الحزن بيقولك: خد وقتك تستوعب اللي حصل.

المشكلة مش في الحزن نفسه…
المشكلة إننا بنحاول نهرب منه .
فنشتغل زيادة… أو ننشغل بعلاقات وصحاب او بالسوشيال ميديا أو نقنع نفسنا إن “أنا كويس.”
وغالبًا… المشاعر اللي ما بناخدلهاش وقتها، بتلاقي طريقة تانية تفضل موجودة بيها.

وده مش معناه إنك تفضل غرقان في الحزن…
لكن معناه إنك تديه حقه، من غير ما يخطف حياتك.
وعشان كده، مهم نفرق بين إننا بنحزن… وإننا نسيبه يسيطر علينا

اسال نفسك واعرف إنت لما بتحزن، بتلجأ لإيه بالظبط ولا بتديله ؟!وقته؟ .وفي الحلقة الجاية هنتكلم عن الشعور اللي الناس بتتلخبط بينه وبين الحزن.
Green pastures with Noha


Green pastures counseling@ outlook .com