Fr. Dr. A P George

Directions Website

Fr. Dr. A P George Greetings in the Matchless Name of our Lord Jesus Christ! Fr. Dr. A. P. George was born in Arackakudy family, Vengola, Ernakulam District, Kerala.

His parents were Paily and Aliyamma. He had his education at Union Christian College, Aluva, and University Center Karyavattom, Trivandrum. He earned his PhD in Psychology from University of Kerala, Trivandrum. Clinical Psychology Post Graduate degree from Central Institute of Psychiatry, Bihar and certification as Deaddiction Counselor from United States. He was ordained as priest in Malankara Syrian Orthodox Church and served in different parishes in Kerala and United States. He worked with various projects of Guardian Angel Care Charitable Society, Kerala, India. During his stay in India, he served as the Director of Bethsada Nursing Home, Clinical Psychologist in Bethsada Mental Health Center and visiting Professor in Malankara Syrian Orthodox Theological Seminary, Mulamthuruthy, Kerala. During his stay in United States, he worked as Professor in Psychology, in the department of Social Sciences, Essex County Community College, New Jersey. Special interests are evangelization, marriage and youth counseling, social work, and writing. Wrote and published nine books of psychological and theological nature for personality development and spiritual enlightenment. His beloved wife Lysa and blessed children Sooraj, Veena, Manu, Sharon and grandchildren Eva and Ephraim are highly supportive and vital partners in his fatherg.com digital ministry. From the bottom of our heart we would like to express our appreciation and indebtedness to our web master beloved Markose George and DTP artist Leena Aliyas. They are 7/24 volunteer workers behind the screen. Thank you so much for the wonderful job you do for our web ministry. We've heard from visitors and volunteers how creative, helpful, and professional you are, and that really inspires confidence in our divine mission. We're so lucky to have you. Thank you for your gracious comments. We're grateful for the opportunity to make this digital content available to you, and pray the LORD will use it to help you in your walk with the LORD. Thank you for letting us know the things that have been most helpful to you. This really helps us know what to add, change or correct. If this mission sounds good to you, please visit us again and introduce this ministry to your friends. May the Lord bless you and make his face to shine upon you and be gracious to you and your family.

10/14/2026

എന്റെ പ്രിയനേ, ദുദായിപ്പഴം സുഗന്‌ധം വീശുന്നു!

ക്രിസ്തുവുമായുള്ള ആത്മബന്ധത്തിന്റെ പ്രതീകാത്മകമായ കാവ്യാവിഷ്കാരമാണ് ഉത്തമഗീതം.

'ദുദായിപ്പഴം സുഗന്‌ധം വീശുന്നു; നമ്മുടെ വാതില്‍ക്കല്‍ എല്ലാ വിശിഷ്‌ടഫലങ്ങളുമുണ്ട്‌. പ്രിയനേ, പഴുത്തതും ഉണങ്ങിയതുമെല്ലാം നിനക്കായി ഒരുക്കിയിരിക്കുന്നു.'
ഉത്തമഗീതം 7 : 13

മണവാളൻ ക്രിസ്തുവും മണവാട്ടി സഭയും തമ്മിലുള്ള ഊഷ്മള ബന്ധത്തിന്റെ സ്‌നിഗ്ദ്ധ ഭാവം വെളിപ്പെടുത്തുന്ന മനോഹരമായ വാക്കുകളാണ് ഇത്. നമ്മൾ ചോദിച്ചതിലും ആഗ്രഹിച്ചതിലും അതിലപ്പുറവും നമുക്ക് സമൃദ്ധിയായി നൽകിയ കർത്താവിന് ആത്മാവിന്റെ ഫലങ്ങളും വിശ്വസ്തതയും പകരം നൽകുവാനുള്ള ആഹ്വാനമാണ് ഈ വേദഭാഗം. ഈ തിരുവചനത്തിന്റെ ചില ആത്മീയ മർമ്മങ്ങളെപ്പറ്റി നമുക്ക് ചിന്തിക്കാം.

1: ക്രിസ്തുവിലുള്ള സമർപ്പിത ജീവിതം സുഗന്ധം പരത്തുന്നതാണ്.

ഉത്തമഗീതം 7:13a – “ദൂദായിപ്പഴം സുഗന്ധം വീശുന്നു...”

ക്രിസ്തു കേന്ദ്രീകൃതമായ ഒരു സമർപ്പിത ജീവിതത്തിന്റെ സുഗന്ധമാണ് മണവാട്ടി സഭ ക്രിസ്തുവിന് നൽകേണ്ടത്.
ഹൃദയപൂർവ്വം നമ്മെ ദൈവത്തിന്റെ മുമ്പിൽ സമർപ്പിക്കുന്നതിനേക്കാൾ വലിയ വഴിപാടില്ല. ഇതാണ് ദൈവം ഇഷ്ടപ്പെടുന്ന സൗരഭ്യധുപം.

'രക്‌ഷിക്കപ്പെടുന്നവരുടെയിടയിലും ശിക്‌ഷിക്കപ്പെടുന്നവരുടെയിടയിലും ഞങ്ങള്‍ ദൈവത്തിനു ക്രിസ്‌തുവിന്റെ പരിമളമാണ്‌.'
2 കോറി. 2 : 15

നമ്മിലെ ക്രിസ്തു സാന്നിധ്യത്തിന്റെ സൗരഭ്യത്താൽ കുടുംബത്തിലെയും സഭയിലെയും സമൂഹത്തിലെയും, അന്തരീക്ഷം സൗരഭ്യപൂർണ്ണമാക്കുവാൻ നമുക്ക് കഴിയും.
ദൂദായിപ്പഴം സുഗന്ധം വീശുന്നു...

2. സമർപ്പണത്തിന്റെ ഫലങ്ങളെ പ്പറ്റി ഈ വേദഭാഗത്തു മണവാട്ടി പറയുന്നത് ശ്രദ്ധേയമാണ്

7:13b – “നമ്മുടെ വാതിൽക്കൽ എല്ലാ വിശിഷ്ടഫലങ്ങളും ഉണ്ട്...” എന്നാണ് മണവാട്ടി പറയുന്നത്.
എന്തൊക്കെയാണ് പ്രിയന് വേണ്ടി നമ്മൾ ഹൃദയത്തിൽ ഒരുക്കുന്ന വിശിഷ്ട ഫലങ്ങൾ?
' അത് ആത്‌മാവിന്റെ ഫലങ്ങള്ളായ സ്‌നേഹം, ആനന്‌ദം, സമാധാനം, ക്‌ഷമ, ദയ, നന്‍മ, വിശ്വസ്‌തത,
സൗമ്യത, ആത്‌മസംയമനം എന്നിവയാണ്‌. '
ഗലാ. 5 : 22-23
അതെ, പ്രിയനു വേണ്ടി നമുക്ക് ഒരുക്കുവാൻ കഴിയുന്ന ഫലങ്ങൾ നമ്മുടെ വിശിഷ്ട സ്വഭാവവും സമസൃഷ്ടങ്ങളോടുള്ള കരുതലും ആണ്‌. സർവ്വ ലോകവും പ്രപഞ്ചവും സ്വന്തമായ ദൈവത്തിന് നമ്മുടെ പൊന്നും പണവും ആവശ്യമില്ല.

ഹൃദയത്തിലെ സ്തോത്രഫലങ്ങളോടെ മണവാളൻ ക്രിസ്തുവിനെ നമ്മൾ എതിരേൽക്കേണ്ടതാണ്. ക്രിസ്തു ബന്ധത്തിലൂടെ നമ്മിൽ വിരിയുന്ന ആത്മാവിന്റെ ഫലങ്ങൾ നമ്മളുമായി സമ്പർക്കം പുലർത്തുന്നവർക്ക് ഊഷ്മള അനുഭവവും അനുഗ്രഹവും ആയിത്തീരുന്നു.

നമ്മൾ ക്രിസ്തുവിൽ വസിക്കുമ്പോൾ ആത്മാവിന്റെ ഫലങ്ങൾ നമ്മിൽ സമൃദ്ധമായി വിരിയും.
'ഞാന്‍ മുന്തിരിച്ചെടിയും നിങ്ങള്‍ ശാഖകളുമാണ്‌. ആര്‌ 'എന്നിലും ഞാന്‍ അവനിലും വസിക്കുന്നുവോ അവന്‍ ഏറെ ഫലം പുറപ്പെടുവിക്കുന്നു.
യോഹന്നാന്‍ 15 : 5

3: പുതിയതും പഴയതുമായ എല്ലാ അനുഭവങ്ങളും പ്രിയന് മണവാട്ടി സമർപ്പിക്കുകയാണ്.

'ദുദായിപ്പഴം സുഗന്‌ധം വീശുന്നു; നമ്മുടെ വാതില്‍ക്കല്‍ എല്ലാ വിശിഷ്‌ടഫലങ്ങളുമുണ്ട്‌. പ്രിയനേ, പഴുത്തതും ഉണങ്ങിയതുമെല്ലാം നിനക്കായി ഒരുക്കിയിരിക്കുന്നു.'
ഉത്തമഗീതം 7 : 13

എന്താണ് ഈ പഴുത്തതും ഉണങ്ങിയതുമായ ഫലങ്ങൾ?

മണവാട്ടി തന്റെ മുൻകാല നേട്ടങ്ങളും ഇപ്പോഴത്തെ അനുഗ്രഹങ്ങളും, പഴയ അനുഭവങ്ങളും, പുതിയ വിജയങ്ങളും തന്റെ പ്രിയപ്പെട്ടവന് സമർപ്പിക്കുകയാണ്. ഒന്നും മറച്ചുവെക്കുന്നില്ല. അതുപോലെ, നമ്മുടെ സമയം, കഴിവുകൾ, ഭൗതിക നേട്ടങ്ങൾ , നല്ലതും വേദന നിറഞ്ഞതുമായ കഴിഞ്ഞകാല അനുഭവങ്ങളും ഓർമ്മകളും ക്രിസ്തുവിന്റെ മുമ്പാകെ സ്തോത്രത്തോടെ സമർപ്പിക്കണം. പ്രിയന്റെ മുൻപിൽ ഉള്ളവും ഉള്ളതും സമർപ്പിക്കുന്നത് ആത്മബന്ധത്തിന്റെയും വിശ്വസ്ഥതയുടെയും ലക്ഷണമാണ്.
റോമർ 12:1 - “നിങ്ങളുടെ ശരീരങ്ങളെ ജീവനുള്ള യാഗമായി സമർപ്പിക്കുവിൻ...”

ഒരു കുട്ടി താൻ വരച്ച ചിത്രം മാതാപിതാക്കൾക്ക് സ്നേഹപൂർവ്വം കൊടുക്കുമ്പോൾ എത്ര താല്പര്യത്തോടെയാണ് അവർ അത് സ്വീകരിക്കുന്നത്. ചിത്രത്തിന്റെ ആവിഷ്ക്കാര ഭംഗി കൊണ്ടല്ല, പ്രിയ കുഞ്ഞിന്റെ സ്നേഹത്തിനാണ് മാതാപിതാക്കൾ വിലകൊടുക്കുന്നത്. നമ്മുടെ കൊച്ചുകൊച്ച് സമർപ്പണങ്ങൾ ക്രിസ്തു സന്തോഷത്തോടെ, സ്നേഹത്തോടെ സ്വീകരിക്കുന്നു.

പ്രിയപ്പെട്ടവരേ, നമ്മുടെ കർത്താവ് നമുക്ക് നൽകിയ നിത്യ രക്ഷ, നിത്യജീവൻ, ഭൗതിക സൗകര്യങ്ങൾ, നിത്യതയിൽ ഒരുക്കിയിരിക്കുന്ന വിസ്മയങ്ങൾ... എന്നിവയൊക്കെ ഒക്കെ എത്ര വിലപ്പെട്ട അനുഗ്രഹങ്ങളാണ്!
പകരം നമുക്ക് എന്താണ് നൽകുവാൻ കഴിയുക?

നമ്മുടെ ആത്മശരീരമനസ്സുകളും ജീവിതവും വിശുദ്ധിയോടെ ഒരുക്കി കർത്താവിനെ സമർപ്പിക്കുന്നതാണ് ദൈവം ഇഷ്ടപ്പെടുന്ന ഏറ്റവും വലിയ വഴിപാട്.
അതിന് നമ്മുടെ സ്വഭാവം ആത്മാവിന്റെ ഫലങ്ങളാൽ സമ്പന്നമാകട്ടെ!
നമ്മുക്ക് ദൈവം നൽകിയ പുതിയതും പഴയതുമായ അനുഗ്രഹഫലങ്ങളും നമ്മെ തന്നെയും കർത്താവിന്റെ പാദത്തിൽ നമുക്ക് സമർപ്പിക്കാം.
🙏
കൃപാ നിധിയായ കർത്താവേ,
നിത്യ ജീവൻ, രക്ഷ, പാപമോചനം, നിത്യതയുടെ പ്രത്യാശ എന്നിവയെല്ലാം ഞങ്ങൾക്ക് ദാനമായി നൽകിയതിന് ഞങ്ങൾ നന്ദി പറയുന്നു. ഞങ്ങൾക്കുള്ളതെല്ലാം ഞങ്ങൾ അങ്ങേക്ക് സമർപ്പിക്കുന്നു.
ഞങ്ങളുടെ ജീവിതം അങ്ങയെ പ്രസാദിപ്പിക്കുന്ന സുഗന്ധമായിത്തീരേണമേ. ആത്മാവിന്റെ ഫലം ഞങ്ങളിൽ വിരിയുവാൻ ദൈവകൃപ അനുദിനം വ്യാപരിക്കേണമേ. അവിടുന്ന് ഞങ്ങൾക്ക് നൽകിയ അനുഗ്രഹങ്ങളും ജീവിതാനുഭവങ്ങൾ നൽകിയ ഹൃദയ മുറിവുകളും സ്തോത്രത്തോടെ വിനയപൂർവ്വം അങ്ങയുടെ പാദങ്ങളിൽ സമർപ്പിക്കുന്നു.

10/13/2026

ആചരണം, അനുസരണം, ആയിത്തീരൽ!

വിശ്വാസജീവിതത്തിൽ നാം പലപ്പോഴും ആചരണങ്ങൾക്കും അനുഷ്ഠാനങ്ങൾക്കും പ്രാധാന്യം നൽകുന്നുണ്ട്‌. പ്രാർത്ഥിക്കുന്നു, ബൈബിൾ വായിക്കുന്നു, ആരാധനയിൽ പങ്കെടുക്കുന്നു, ദൈവിക കൽപ്പനകൾ പാലിക്കാൻ ശ്രമിക്കുന്നു. ഇവയെല്ലാം നല്ലതും ആവശ്യവുമാണ്. എന്നാൽ ഇവയ്ക്കിടയിൽ നാം മറന്നുപോകാൻ സാധ്യതയുള്ള ഒരു ആത്മീയ സത്യമുണ്ട്: ദൈവം നമ്മിൽനിന്ന് ആഗ്രഹിക്കുന്നത് ചില കാര്യങ്ങൾ ചെയ്തുതീർക്കുന്ന ജീവിതം മാത്രമല്ല; അവിടുത്തെ കൃപയാൽ പുതുക്കപ്പെട്ട ഒരു ഹൃദയമാണ്. ക്രിസ്തീയ ജീവിതത്തിന്റെ ലക്ഷ്യം നല്ല കാര്യങ്ങൾ പ്രവർത്തിക്കുക മാത്രമല്ല, ക്രിസ്തുവിന്റെ സ്വഭാവത്തിൽ ആയിത്തീരുക കൂടിയാണ്.

ആചരണം പുറത്തുള്ള ജീവിതത്തെ ക്രമീകരിക്കാം; എന്നാൽ ഹൃദയത്തെ രൂപാന്തരപ്പെടുത്തുന്നത് ദൈവകൃപയാണ്. അനുസരണം ആ രൂപാന്തരത്തിന്റെ ഫലമാണ്. അതുകൊണ്ട് ആചരണത്തിൽനിന്ന് അനുസരണത്തിലേക്കും അനുസരണത്തിൽനിന്ന് ആയിത്തീരലിലേക്കുമുള്ള യാത്രയിലാണ് ലക്‌ഷ്യം വയ്‌ക്കേണ്ടത്. അത് സ്വന്തം കഴിവിലല്ല, ദൈവം നമ്മോടു കാണിക്കുന്ന സ്നേഹത്തിൽ നിന്നാണ് ആരംഭിക്കേണ്ടത്.

യോഹന്നാൻ 14:23-ൽ കർത്താവ് തന്റെ വചനം പ്രമാണിക്കുന്നവരോടുകൂടെ താനും പിതാവും വസിക്കുമെന്ന അത്ഭുതകരമായ വാഗ്ദാനം നൽകുന്നുണ്ട്‌ :
യേശു അവനോട് “എന്നെ സ്നേഹിക്കുന്നവൻ എന്റെ വചനം പ്രമാണിക്കും; എന്റെ പിതാവ് അവനെ സ്നേഹിക്കും; ഞങ്ങൾ അവന്റെ അടുക്കൽ വന്ന് അവനോടുകൂടെ വാസം ചെയ്യും.”

നമ്മെ സ്നേഹിക്കുകയും തന്റെ സാന്നിധ്യത്തിലേക്ക് ക്ഷണിക്കുകയും ചെയ്യുന്ന ദൈവത്തോടുള്ള സ്നേഹപൂർവമായ, വിനയാന്വതമായ പ്രതികരണമാണ് അനുസരണം. നാം അനുസരിക്കുന്നതുകൊണ്ടല്ല ദൈവം നമ്മെ സ്നേഹിക്കുന്നത്; അവിടുന്ന് നമ്മെ സ്നേഹിക്കുന്നതിനാൽ നാം അനുസരിക്കാൻ പഠിക്കുന്നു.

ഇതാണ് കൃപയുടെ വിപ്ലവകരമായ സത്യം. നിയമത്തെ മാത്രം നോക്കുമ്പോൾ നാം നമ്മുടെ പരാജയങ്ങൾ കാണുന്നു. എന്നാൽ ക്രൂശിൽ വെളിപ്പെട്ട കൃപയെ നോക്കുമ്പോൾ, നമ്മുടെ പരാജയങ്ങളെക്കാൾ വലിയതാണ് ദൈവത്തിന്റെ സ്നേഹമെന്ന് നാം തിരിച്ചറിയുന്നു. കൃപ നമ്മുടെ പാപത്തെ നിസ്സാരമാക്കുന്നില്ല; പാപത്തിന്റെ അടിമത്തത്തിൽനിന്ന് നമ്മെ മോചിപ്പിക്കുകയാണ് ചെയ്യുന്നത്. അനുസരിക്കാൻ കഴിയാത്ത ഹൃദയത്തെ പുതുക്കുന്നു. ദൈവം നമ്മിൽനിന്ന് ആവശ്യപ്പെടുന്ന വിശുദ്ധിയിലേക്ക് നമ്മെ നയിക്കുന്നതും അവിടുത്തെ കൃപ തന്നെയാണ്.

പലപ്പോഴും നാം വിശുദ്ധജീവിതം നയിക്കാൻ ശ്രമിക്കുന്നത് സ്വന്തം പരിശ്രമവും പ്രവർത്തികളും കൊണ്ടാണ്. കൂടുതൽ പ്രാർത്ഥിക്കണം, വികാരങ്ങളെ നിയന്ത്രിക്കണം, മറ്റുള്ളവരോട് ക്ഷമിക്കണം, ദോഷകരമായ ശീലങ്ങൾ ഉപേക്ഷിക്കണം എന്നിങ്ങനെ അനേകം നല്ല തീരുമാനങ്ങളെടുക്കുന്നു. എന്നാൽ വീണ്ടും വീണ്ടും പരാജയപ്പെടുമ്പോൾ കുറ്റബോധത്തിലേക്കോ നിരാശയിലേക്കോ വീഴുന്നു. ചിലപ്പോൾ നമ്മുടെ ആത്മീയജീവിതം മറ്റുള്ളവരുമായി താരതമ്യം ചെയ്ത് സ്വയ നീതീകരണത്തിന്റെ ആത്മീയ നിഗളത്തിനും കാരണമാകാറുണ്ട്. ചിലപ്പോൾ ബാഹ്യ ഭക്തിയുടെ പിന്നിൽ ആന്തരിക മുറിവുകളും സ്വാർത്ഥതയും മറച്ചുവയ്ക്കാറുമുണ്ട്.

എന്നാൽ ദൈവകൃപ ഈ പ്രതിസന്ധികളിൽ പുതിയ ആത്മീയ സമീപനങ്ങൾ നമുക്ക് വെളിപ്പെടുത്തിത്തരുന്നു: സ്വന്തം ബലഹീനതകളെ നിഷേധിക്കാതെ അവ ദൈവസന്നിധിയിൽ തുറന്നുവയ്ക്കുക, സ്വയം ന്യായീകരിക്കാതെ ദൈവത്തിന്റെ പാപക്ഷമ തേടുക, സ്വന്തം ശക്തിയെ ആശ്രയിക്കുന്നതിനുപകരം പരിശുദ്ധാത്മാവിന്റെ സഹായം സ്വീകരിക്കുക, വീഴുമ്പോൾ ദൈവത്തിൽ നിന്ന് ഓടിയകലാതെ അവിടുത്തെ അടുക്കലേക്ക് മടങ്ങിവരുക... എന്നിവയാണ് ദൈവ കൃപ വെളിപ്പെടുത്തി തരുന്ന സമീപനങ്ങൾ.

കൃപയുടെ ജീവിതം ഒരിക്കലും വീഴാത്തവരുടെ ജീവിതമല്ല; വീഴുമ്പോഴും ദൈവത്തിന്റെ സ്നേഹത്തിലേക്ക് മടങ്ങിവന്ന് വീണ്ടും എഴുന്നേൽക്കാൻ പഠിക്കുന്നവരുടെ ജീവിതമാണ്.

ഇവിടെ അനുസരണത്തിന്റെ അർത്ഥവും കൂടുതൽ ആഴമുള്ളതാണ്‌. ദൈവം നമ്മിൽ പ്രവർത്തിക്കുവാൻ നാം നൽകുന്ന ഹൃദയപൂർവമായ സമ്മതമാണ് അനുസരണം. 'ഇച്ഛിക്ക എന്നതും പ്രവർത്തിക്ക എന്നതും നിങ്ങളിൽ ദൈവമല്ലോ തിരുവുള്ളം ഉണ്ടായിട്ട് പ്രവർത്തിക്കുന്നത്' എന്ന്
ഫിലിപ്പിയർ 2:13 ൽ പറയുന്നതുപോലെ, ആഗ്രഹിക്കുവാനും പ്രവർത്തിക്കാനും നമ്മിൽ പ്രവർത്തിക്കുന്നത് ദൈവമാണ്. നന്മ ചെയ്യാനുള്ള ആഗ്രഹവും അതിനാവശ്യമായ ശക്തിയും ദൈവത്തിൽ നിന്നാണ് വരുന്നത്. അതിനാൽ ദൈവകൃപയുടെ പ്രവർത്തനവും മനുഷ്യന്റെ വിനയപൂർണ്ണമായ സഹകരണവും ഒത്തുചേരുമ്പോഴാണ് അനുസരണം സാധ്യമാകുന്നത്.

ഒരാളോട് ക്ഷമിക്കുമ്പോൾ നാം വെറുമൊരു കൽപ്പന പാലിക്കുകയല്ല; നമ്മോടു ക്ഷമിച്ച ക്രിസ്തുവിന് നമ്മിൽ ഇടം നൽകുകയാണ്. ആരും കാണാത്തപ്പോഴും സത്യസന്ധത പാലിക്കുമ്പോൾ നാം ഒരു നിയമം അനുസരിക്കുക മാത്രമല്ല; ദൈവത്തിന്റെ സത്യത്തെ നമ്മുടെ ജീവിതത്തിൽ പ്രതിഫലിപ്പിക്കുകയാണ്. സ്വന്തം താല്പര്യം മാറ്റിവെച്ച് മറ്റൊരാളുടെ നന്മ അന്വേഷിക്കുമ്പോൾ നാം ഒരു ത്യാഗം ചെയ്യുക മാത്രമല്ല; ക്രിസ്തുവിന്റെ സ്നേഹം നമ്മിൽ രൂപപ്പെടാൻ അനുവദിക്കുകയാണ്. ഇങ്ങനെ ആവർത്തിച്ചുള്ള ചെറിയ അനുസരണങ്ങളിലൂടെ പരിശുദ്ധാത്മാവ് നമ്മുടെ ചിന്തകളെയും ആഗ്രഹങ്ങളെയും മനോഭാവങ്ങളെയും ക്രമേണ പുതുക്കികൊണ്ടിരിക്കുന്നു.

ഇതാണ് ആയിത്തീരൽ—ക്രിസ്തുവിനെപ്പോലെ ആയിത്തീരുന്ന പ്രക്രിയ. ഇത് ഒരു ദിവസംകൊണ്ട് പൂർത്തിയാകുന്ന മാറ്റമല്ല. ചില മേഖലകളിൽ നാം വേഗത്തിൽ വളരാം; മറ്റു ചില മേഖലകളിൽ ദീർഘകാലം പോരാടേണ്ടിവരും. എന്നാൽ നമ്മുടെ പ്രത്യാശ സ്വന്തം പുരോഗതിയുടെ വേഗത്തിലല്ല, നമ്മെ കൈവിടാതെ രൂപപ്പെടുത്തുന്ന ദൈവത്തിന്റെ വിശ്വസ്തതയിലായിരിക്കണം . “നിങ്ങളിൽ നല്ല പ്രവൃത്തിയെ ആരംഭിച്ചവൻ യേശുക്രിസ്തുവിന്റെ നാൾവരെ അതിനെ തികയ്ക്കും” എന്ന ഫിലിപ്പിയർ 1:6-ലെ വാഗ്ദാനം ഈ യാത്രയിൽ നമുക്ക് ധൈര്യം നൽകുന്നു.

അതുകൊണ്ട് ലോകത്തിൽ നിന്ന് ഒളിച്ചോടുന്നതോ പുറമേ കുറ്റമറ്റവരായി കാണപ്പെടുന്നതോ അല്ല ജീവിത വിശുദ്ധി. ദൈവകൃപയാൽ ലോകത്തിന്റെ സ്വാർത്ഥതയ്ക്കും അഹങ്കാരത്തിനും പ്രതികാരത്തിനും വഴങ്ങാതെ ജീവിക്കാൻ പഠിക്കുന്നതാണ് വിശുദ്ധി. നമ്മുടെ കുടുംബത്തിൽ ക്ഷമയിലൂടെ, ജോലിസ്ഥലത്ത് സത്യസന്ധതയിലൂടെ, ബന്ധങ്ങളിൽ സ്നേഹത്തിലൂടെ, പരീക്ഷണങ്ങളിൽ വിശ്വാസത്തിലൂടെ ക്രിസ്തു നമ്മിൽ വെളിപ്പെടുമ്പോൾ, നമ്മുടെ ജീവിതം ജീവിക്കുന്ന വചനത്തിന്റെ സാക്ഷ്യമായി മാറുന്നു.

ദൈവം നമ്മെ വിളിക്കുന്നത് ആത്മീയ പ്രകടനത്തിനല്ല, ഒരു ആത്മീയ രൂപാന്തരത്തിലേക്കാണ്. അവിടുന്ന് നമ്മുടെ കൈകളുടെ പ്രവൃത്തികളെ മാത്രമല്ല, ഹൃദയത്തിന്റെ ആഴങ്ങളെയും സ്പർശിക്കാൻ ആഗ്രഹിക്കുന്നു. നാം എന്തു ചെയ്യുന്നു എന്നതിലുപരി, അവിടുത്തെ സാന്നിധ്യത്തിൽ നാം ആരായി മാറുന്നു എന്നതും പ്രധാനമാണ്. കാരണം, വിശുദ്ധജീവിതത്തിന്റെ സൗന്ദര്യം നമ്മുടെ പരിശ്രമത്തിന്റെ മഹത്വമല്ല; നമ്മിൽ രൂപംകൊള്ളുന്ന ക്രിസ്തുവിന്റെ മഹത്വമാണ്.

ഇന്ന് നമുക്ക് നമ്മുടെ ഹൃദയത്തോട് ചോദിക്കാം: ഞാൻ ദൈവത്തെ സ്നേഹിക്കുന്നതുകൊണ്ടാണോ അനുസരിക്കുന്നത്, അതോ അവിടുത്തെ അംഗീകാരം നേടാനാണോ?
എന്റെ പരാജയങ്ങൾ എന്നെ ദൈവത്തിൽനിന്ന് അകറ്റുന്നുണ്ടോ, അതോ അവിടുത്തെ കൃപയിൽ കൂടുതൽ ആശ്രയിക്കാൻ പഠിപ്പിക്കുന്നുണ്ടോ?
ഞാൻ വചനം കേൾക്കുക മാത്രമാണോ, എന്നെ തിരുത്താൻ വചനത്തിന്റെ മുൻപിൽ എന്റെ സ്വയത്തെ സറണ്ടർ ചെയ്യുന്നുണ്ടോ?
എന്റെ ജീവിതത്തിൽ ക്രിസ്തുവിന്റെ സ്വഭാവം ക്രമേണ വളർന്നു വരുന്നുണ്ടോ?
ആത്മാവിന്റെ ഫലങ്ങൾ ആണോ, ജഡത്തിന്റെ ഫലങ്ങൾ ആണോ ഞാനെന്ന ക്രിസ്ത്യാനി വൃക്ഷത്തിൽ വിരിയുന്നത്?

ആചരണം നമ്മെ തിരു വചനത്തിന്റെ മുമ്പിൽ നിർത്തുന്നു,
കൃപ നമ്മുടെ ഹൃദയത്തെ തുറക്കുന്നു,
അനുസരണം ആ കൃപയോട് പ്രതികരിക്കുന്നു, പരിശുദ്ധാത്മാവ് നമ്മെ ക്രിസ്തുവിന്റെ സ്വഭാവത്തിലേക്ക് രൂപാന്തരപ്പെടുത്തുന്നു.
ഇതാണ് വിശ്വാസത്തിന്റെ ആഴം.
ഇതാണ് വിശുദ്ധിയിലേക്കുള്ള യാത്ര...

🙏
സ്നേഹനിധിയായ പിതാവേ, അങ്ങയെ പ്രസാദിപ്പിക്കാൻ സ്വന്തം ശക്തിയിൽ മാത്രം ആശ്രയിക്കുന്ന എന്റെ മനോഭാവം അവിടുന്ന് തിരുത്തേണമേ. നിന്റെ കൃപയുടെ ആഴം തിരിച്ചറിയാൻ എന്നെ സഹായിക്കണമേ. നിന്റെ വചനം കേൾക്കുന്നതിൽ മാത്രം സംതൃപ്തനാകാതെ, അതനുസരിച്ച് ജീവിക്കാൻ എന്നെ പഠിപ്പിക്കണമേ. എന്റെ ഹൃദയത്തിലെ സ്വാർത്ഥതയും അഹങ്കാരവും ഭയവും നീക്കി, ക്രിസ്തുവിന്റെ മനോഭാവം എന്നിൽ വളർത്തണമേ. ഞാൻ വീഴുമ്പോൾ നിന്റെ സ്നേഹത്തിലേക്ക് മടങ്ങിവരാനും, ബലഹീനനാകുമ്പോൾ നിന്റെ ശക്തിയിൽ ആശ്രയിക്കാനും, ഓരോ ദിവസവും നിന്റെ കൃപയാൽ പുതുക്കപ്പെടാനും സഹായിക്കണമേ. എന്റെ ജീവിതത്തിലൂടെ ഞാൻ അല്ല, ക്രിസ്തു എന്നിൽ വെളിപ്പെടുവാൻ സഹായിക്കേണമേ. നിന്റെ വചനം എന്നിൽ ജീവിക്കുകയും ഞാൻ നിന്റെ സ്നേഹത്തിൽ വസിക്കുകയും നിന്റെ സ്വഭാവത്തിൽ ആയിത്തീരുകയും ചെയ്യുവാൻ സഹായിക്കേണമേ. ആമേൻ.
☆
-ഫാ. ഡോ. ഏ. പി. ജോർജ്
(കടപ്പാട് )

10/13/2026

മനസ്സിന്റെ സന്തോഷ ചക്രം

ജീവിതത്തിൽ നാം ചില സന്തോഷങ്ങൾക്കായി എത്രയോ കാലം കാത്തിരിക്കുന്നു! നല്ലൊരു ജോലി, മനോഹരമായ വീട്, ഉയർന്ന പദവി, സാമ്പത്തിക സുരക്ഷ, അല്ലെങ്കിൽ ഏറെ ആഗ്രഹിച്ച ഒരു നേട്ടം. ഇവ ലഭിക്കുമ്പോൾ മനസ്സ് ആനന്ദംകൊണ്ട് നിറയുന്നു. എന്നാൽ കുറച്ചുനാൾ കഴിയുമ്പോൾ ആ സന്തോഷത്തിന്റെ തീവ്രത കുറയുന്നു. ഇന്നലെ നമ്മെ അത്ഭുതപ്പെടുത്തിയ കാര്യം ഇന്ന് സാധാരണമായി മാറുന്നു. പിന്നീട് മറ്റൊരു ആഗ്രഹം നമ്മെ മുന്നോട്ടു വലിക്കുന്നു. ഈ പ്രതിഭാസത്തിനാണ് മനഃശാസ്ത്രം ‘ഹെഡോണിക് അഡാപ്റ്റേഷൻ’ (Hedonic Adaptation) എന്നു പറയുന്നത്. 'മനസ്സിന്റെ സന്തോഷ ചക്രം' എന്നും ഈ പ്രതിഭാസത്തെ വിളിക്കാം.

ജീവിതത്തിലെ മാറ്റങ്ങളോട് മനസ്സ് ക്രമേണ പൊരുത്തപ്പെടുകയും വികാരങ്ങളുടെ പതിവുനിലയിലേക്ക് മടങ്ങുകയും ചെയ്യുന്ന പ്രവണതയാണിത്. മനഃശാസ്ത്രജ്ഞർ ഇതിനെ ഒരു ട്രെഡ്മിൽ ഓട്ടത്തോട് ഉപമിക്കുന്നു: എത്ര വേഗത്തിൽ ഓടിയാലും ഒരേ സ്ഥാനത്ത് തുടരുന്നതുപോലെ, പുതിയ നേട്ടങ്ങൾ സന്തോഷം വർധിപ്പിച്ചാലും മനസ്സ് വൈകാതെ അവയുമായി പരിചയപ്പെടുന്നു; തുടർന്ന് അടുത്ത ആഗ്രഹത്തിലേക്ക് നീങ്ങുന്നു.

എന്തുകൊണ്ടാണ് ഇങ്ങനെ സംഭവിക്കുന്നത്? പുതിയ സാഹചര്യങ്ങളോട് പൊരുത്തപ്പെടാനുള്ള മനസ്സിന്റെ കഴിവ് മനുഷ്യന്റെ അതിജീവനത്തിന് സഹായകരമാണ്. വലിയ സന്തോഷങ്ങളിൽ മാത്രം കുടുങ്ങിപ്പോകാതിരിക്കാനും ദുഃഖങ്ങളിൽനിന്ന് ക്രമേണ കരകയറാനും ഈ കഴിവ് സഹായിച്ചേക്കാം. എന്നാൽ അതിന്റെ മറുവശം, നമുക്ക് ലഭിച്ച അനുഗ്രഹങ്ങളുടെ മൂല്യം മറന്ന്, ഇനിയും ലഭിക്കാത്തവയുടെ പിന്നാലെ നിരന്തരം ഓടുവാൻ പ്രേരിപ്പിക്കുന്നു എന്നതാണ്.

അപ്പോൾ സന്തോഷം നേടുന്നതിലാണോ, അതോ ലഭിച്ച സന്തോഷത്തെ തിരിച്ചറിയുന്നതിലാണോ ജീവിതത്തിന്റെ രഹസ്യം?
ജീവിതത്തിൽ സ്വപ്നം കാണുന്നതും നേട്ടങ്ങൾ കൈവരിക്കുന്നതും തെറ്റല്ല. എന്നാൽ അടുത്ത നേട്ടം ലഭിച്ചാലേ സന്തോഷിക്കൂ എന്നു കരുതുമ്പോൾ ഇന്നിന്റെ സൗന്ദര്യം നാം നഷ്ടപ്പെടുത്തുന്നു. പുതിയൊരു ഫോൺ ഏതാനും ആഴ്ചകൾക്കുശേഷം സാധാരണ ഉപകരണമാകുന്നു; സ്ഥാനക്കയറ്റം പുതിയ ഉത്തരവാദിത്വങ്ങളായി മാറുന്നു. കൂടുതൽ സ്വന്തമാക്കുന്നതുകൊണ്ടുമാത്രം ദീർഘകാല സംതൃപ്തി ഉറപ്പാക്കാനാവില്ല.

ഈ സന്തോഷ ചക്രത്തിൽനിന്ന് പുറത്തുകടക്കാൻ നന്ദിയുള്ള മനസ്സ് വളർത്തണം. ആരോഗ്യത്തിന്റെ അനുഗ്രഹം, കുടുംബത്തിന്റെ സാന്നിധ്യം, സൗഹൃദം, കുടുംബം ഒന്നിച്ചുള്ള ഒരു നേരത്തെ ഭക്ഷണം, പ്രിയപ്പെട്ടവരുടെ പുഞ്ചിരി, മറ്റൊരാൾക്കു നൽകുന്ന സഹായം—നിത്യജീവിതത്തിലെ ഇത്തരം ചെറിയ അനുഗ്രഹങ്ങളെ ബോധപൂർവം തിരിച്ചറിയണം. മറ്റുള്ളവരുമായി നിരന്തരം താരതമ്യം ചെയ്യാതെ, ബന്ധങ്ങൾക്കും അർഥവത്തായ അനുഭവങ്ങൾക്കും പ്രാധാന്യം നൽകണം. അതുപോലെ, ഇന്നത്തെ വേദന ജീവിതത്തിന്റെ അവസാന വാക്കല്ലെന്നും സ്നേഹവും പിന്തുണയും ആവശ്യമായ സഹായവും വീണ്ടെടുപ്പിന് വഴിയൊരുക്കുമെന്നും ഓർക്കണം.

സംതൃപ്തിയുടെ ആത്മീയ രഹസ്യം
ക്രിസ്തീയ വിശ്വാസം പഠിപ്പിക്കുന്നത് യഥാർഥ സന്തോഷം ഭൗതികനേട്ടങ്ങളിൽ മാത്രമല്ല, ദൈവവുമായുള്ള ആഴമായ ബന്ധത്തിലും അവിടുത്തെ അനുഗ്രഹങ്ങളെ തിരിച്ചറിയുന്നതിലുമാണെന്നാണ്. “എന്റെ കൃപ നിനക്കു മതി” (2 കൊരിന്ത്യർ 12:9) എന്ന ദൈവവചനം അപൂർണതകളുടെ നടുവിലും ദൈവകൃപയിൽ ആശ്രയിക്കാൻ നമ്മെ പഠിപ്പിക്കുന്നു. വിശുദ്ധ പൗലോസ് പറയുന്നു: “ഏതു സാഹചര്യത്തിലും സംതൃപ്തനായിരിക്കാൻ ഞാൻ പഠിച്ചിരിക്കുന്നു” (ഫിലിപ്പിയർ 4:11). ലോകം പറയുന്നത്, “കൂടുതൽ നേടിയാൽ സന്തോഷിക്കാം” എന്നാണ്; ക്രിസ്തു നമ്മെ ക്ഷണിക്കുന്നത് ദൈവസ്നേഹത്തിലും പ്രാർഥനയിലും നന്ദിയിലും സ്നേഹ സേവനത്തിലും സംതൃപ്തി കണ്ടെത്താനാണ്.

സന്തോഷം ഭാവിയിൽ നേടിയെടുക്കേണ്ട ഒരു ലക്ഷ്യം മാത്രമല്ല; ദൈവം നൽകിയ ജീവിതത്തിൽ തിരിച്ചറിയേണ്ട അനുഗ്രഹം കൂടിയാണ്. കൂടുതൽ സ്വന്തമാക്കാനുള്ള ഓട്ടം മാത്രമാകരുത് ജീവിതം; ലഭിച്ച ജീവിതത്തെ നന്ദിയോടെയും സ്നേഹത്തോടെയും കൂടുതൽ ആഴത്തിൽ അനുഭവിക്കാനുള്ള യാത്രയാകണം.
☆
-ഫാ. ഡോ. ഏ. പി. ജോർജ്
(കടപ്പാട് )

10/12/2026

ഡിവൈൻ റൂട്ടിങ്ങ്

റൂട്ടും മാപ്പുമില്ലാത്ത സുദീർഘ യാത്രയാണ് ജീവിതം. തുടക്കം നമുക്കറിയാം. പക്ഷേ ലക്ഷ്യസ്ഥാനവും വഴിയും നമുക്ക് അജ്ഞാതമാണ്. ദൈവത്തിന്റെ നിഗൂഢ പദ്ധതിയിലാണ് ജീവിതം മുന്നോട്ട് പോകുന്നത്. അത് മനസ്സിലാക്കുവാൻ മനുഷ്യന്റെ പരിമിത ബുദ്ധിക്കും നിർമ്മിത ബുദ്ധിക്കും കഴിയില്ല.

അബ്രഹാം തന്റെ ദാസനെ ഇസഹാക്കിന് തുണയെ കണ്ടെത്തുവാൻ അന്യദേശത്തേക്ക് പറഞ്ഞയച്ചു:

'ഞാന്‍ പാര്‍ക്കുന്ന ഈ നാട്ടിലെ കാനാന്യരുടെ പെണ്‍മക്കളില്‍നിന്ന്‌ എന്റെ മകനു ഭാര്യയെ തിരഞ്ഞെടുക്കയില്ലെന്ന്‌ ആകാശത്തിന്റെയും ഭൂമിയുടെയും ദൈവമായ കര്‍ത്താവിന്റെ നാമത്തില്‍ നിന്നെക്കൊണ്ടു ഞാന്‍ സത്യംചെയ്യിക്കും.
എന്റെ നാട്ടില്‍ എന്റെ ചാര്‍ച്ചക്കാരുടെയടുക്കല്‍പോയി, അവരില്‍നിന്ന്‌ എന്റെ മകന്‍ ഇസഹാക്കിനു ഭാര്യയെ കണ്ടു പിടിക്കണം.'
ഉല്‍പത്തി 24 : 3-4

എളുപ്പമുള്ള ഒരു നിയോഗമല്ല അബ്രഹാം തന്റെ ദാസനെ ഏൽപ്പിച്ചത്. കാഴ്ചയാൽ അല്ല, വിശ്വാസത്താൽ യാത്രചെയ്ത് നിവർത്തിക്കേണ്ട ഒരു നിയോഗമായിരുന്നു അത്.
ഇതുപോലെ നമ്മളെയും ദൈവം പലപ്പോഴും അറിയപ്പെടാത്ത ദേശത്തേക്കും ആളുകളുടെ അടുത്തേക്കും നിയോഗങ്ങളിലേക്കും അയക്കാറുണ്ട്. അത് നമുക്ക് അനശ്ചിതത്വവും ആശയക്കുഴപ്പവും ഉണ്ടാക്കാറുമുണ്ട്.

നാളെകളിലെ ദുരൂഹതകളെ ഓർത്ത് നമ്മൾ പ്രയാസപ്പെടേണ്ട കാര്യമില്ല. ദൈവത്തിന്റെ ഡിവൈൻ നാവിഗേഷൻ സിസ്റ്റം നമ്മെ സുരക്ഷിത സ്ഥാനത്ത് എത്തിക്കും. നമ്മൾ എവിടെ നിന്ന് തുടങ്ങണമെന്നും ഏതു വഴിയിലൂടെ, എവിടെ എത്തണമെന്നും ദൈവം പദ്ധതി ഒരുക്കിയിട്ടുണ്ട്. ദൈവത്തിൽ ആശ്രയിക്കുന്നവരെയും അനുസരിക്കുന്നവരെയും ദൈവം അനുദിനം സുരക്ഷിതമായി വഴി നടത്തും.

ഇത് അംഗീകരിക്കുവാനും ക്ഷമയോടെ ദൈവത്തിന്റെ വഴികളിലൂടെ നടക്കുവാനും ജഡീക മനസ്സ് പലപ്പോഴും തയ്യാറാകാറില്ല. ദൈവത്തിന്റെ വഴികളിലൂടെ അനുസരണത്തോടെ നടക്കുന്നതിന് യുക്തിയും കോമൺസെൻസും പലപ്പോഴും നമുക്ക് തടസ്സമാകാറുണ്ട്.

അബ്രഹാമും ലോത്തും വഴിപിരിഞ്ഞപ്പോൾ, നീരോട്ടമുള്ള വഴി ലോത്ത് തിരഞ്ഞെടുത്തു. അത് ബുദ്ധിപരമായ സെലക്ഷൻ ആയിരുന്നു എന്നാണ് ലോത്ത് കരുതിയത്. എന്നാൽ അവിടെനിന്ന് പ്രാണരക്ഷാർത്ഥം ലോത്തിന് പിന്നീട് ഓടിപ്പോകേണ്ടിവന്നു.

'ചിലപ്പോൾ ഒരു വഴി മനുഷ്യനു ചൊവ്വായി തോന്നും;
അതിന്റെ അവസാനമോ മരണവഴികൾ അത്രേ.' സദൃ. 14:12

തെരഞ്ഞെടുപ്പിലെ അപാകതകൾ മൂലം ജീവിതത്തിൽ സംഭവിച്ച ദുരന്തങ്ങളും നഷ്ടങ്ങളും ഓർത്ത് ദുഃഖിക്കുന്നവർ അനവധിയാണ്.

വഴിയൊരുക്കി വഴി നടത്തുന്ന ദൈവത്തിന്റെ ദിവ്യ പരിപാലന സമീപനങ്ങൾ വിസ്മയകരമാണ്, വിവിധങ്ങളാണ്, മനുഷ്യബുദ്ധിക്ക് അതീതമാണ്. നമുക്ക് ദിശാബോധം നൽകുവാൻ ദൈവം ഉപയോഗിക്കുന്ന നാല് ഉപാധികൾ ശ്രദ്ധിക്കാം:

1. തിരുവചനത്തിലൂടെ ദൈവം നമ്മെ വഴി നടത്താറുണ്ട്

'അങ്ങയുടെ വചനം എന്റെ പാദത്തിനു വിളക്കും പാതയില്‍ പ്രകാശവുമാണ്‌.'
സങ്കീര്‍ത്തനങ്ങള്‍ 119 : 105
ബൈബിൾ ഒരു പഴയ ബുക്ക് അല്ല. ജീവിതത്തിന്റെ 'ജിപിഎസ് മാനുവൽ' ആണ്. ദൈവം തന്റെ യജമാനനെ അറിയാത്ത ദേശത്തേക്ക് വിളിച്ച് വഴി നടത്തിയത് അബ്രഹാമിന്റെ ഈ ദാസന് അറിയാമായിരുന്നു. പതിനാലാം വാക്യത്തിലെ ഈ ദാസന്റെ പ്രാർത്ഥന അദ്ദേഹം യജമാനനിൽ നിന്ന് കേട്ടു പഠിച്ച തിരുവചനത്തിന്റെ പ്രതിധ്വനിയാണ്.

ഹൈവേയിലെ റോഡ് സൈനുകളും മാർഗ്ഗ നിർദ്ദേശങ്ങളും അനുസരിച്ച് വാഹനമോടിക്കുമ്പോൾ നമ്മൾ ലക്ഷ്യത്തിൽ എത്തും. അല്ലെങ്കിൽ വഴിതെറ്റും. ജീവിതയാത്രയ്ക്കുള്ള വിലപ്പെട്ട മാർഗനിർദേശങ്ങളാണ് തിരുവചനം. അതിൽനിന്ന് അകലുന്നവർക്ക് ദിശാബോധം നഷ്ടപ്പെടും. വഴിതെറ്റി അലയേണ്ടി വരും.

2. ദൈവം വഴി നടത്തുന്ന രണ്ടാമത്തെ സമീപനം പരിശുദ്ധാത്മാവിലൂടെയാണ്.
'സത്യത്തിന്റെ ആത്മാവ് വരുമ്പോഴോ അവൻ നിങ്ങളെ സകല സത്യത്തിലും വഴിനടത്തും. ' യോഹന്നാൻ 16:13

പരിശുദ്ധാത്മാവ് നമ്മിലെ 'റിയൽ ടൈം' നാവിഗേഷനാണ്. ആത്മാവിനെ അനുസരിച്ച് നടക്കുന്നവർക്ക് എവിടെ തിരിയണം, എങ്ങോട്ട് പോകണം എന്നൊക്കെ പരിശുദ്ധാത്മാവ് യഥാസമയം പറഞ്ഞുതരും. അബ്രഹാമിന്റെ ദാസൻ ദൈവീക ശബ്ദമൊന്നും കേട്ടതായി പറയുന്നില്ല. പക്ഷേ, വഴി നടത്തുവാൻ പ്രാർത്ഥിച്ചു കഴിഞ്ഞപ്പോൾ, വെള്ളം കോരുവാൻ റിബേക്ക വന്ന കൃത്യസമയത്ത് ആത്മാവ് അവനെ കിണറ്റിൻകരയിൽ എത്തിച്ചു.
നമ്മൾ വഴിതെറ്റിയാലും പരിശുദ്ധാത്മാവ് 'റീ റൂട്ട്' ചെയ്ത് ദൈവത്തിന്റെ വഴിയിലേക്ക് തിരിച്ചുകൊണ്ടുവരും.

3. അദൃശ്യരായ ദൈവത്തിന്റെ ദൂതന്മാരാണ് വഴി നടത്തുന്ന ദൈവത്തിന്റെ മൂന്നാമത്തെ വിസ്മയ സംവിധാനം.

'നിന്റെ വഴികളില്‍ നിന്നെ കാത്തുപാലിക്കാന്‍അവിടുന്നു തന്റെ ദൂതന്‍മാരോടു കല്‍പിക്കും.
നിന്റെ പാദം കല്ലില്‍ തട്ടാതിരിക്കാന്‍ അവര്‍ നിന്നെ കൈകളില്‍ വഹിച്ചുകൊള്ളും.'
സങ്കീര്‍ത്തനങ്ങള്‍ 91 : 11-12

നമ്മുടെ ജീവിതപാതയിലെ തടസ്സങ്ങൾ നീക്കുവാനും സുരക്ഷിതത്വം ഉറപ്പാക്കാനും അഭ്യുദയകാംക്ഷികളെ ഒരുക്കുവാനും അദൃശ്യ ദൂതന്മാരെ ദൈവം സജ്ജീകരിക്കും.

അബ്രഹാം തന്റെ ദാസനോട് പറഞ്ഞു:
'എന്റെ പിതാവിന്റെ വീട്ടില്‍നിന്നും ചാര്‍ച്ചക്കാരില്‍നിന്നും എന്നെ പുറത്തുകൊണ്ടുവന്നവനും, എന്നോടു സംസാരിച്ചവനും, നിന്റെ സന്തതികള്‍ക്ക്‌ ഈ ഭൂമി ഞാന്‍ തരുമെന്നു വാഗ്‌ദാനം ചെയ്‌തവനുമായ, ആകാശത്തിന്റെ ദൈവമായ കര്‍ത്താവ്‌ തന്റെ ദൂതനെ നിനക്കു മുമ്പേഅയയ്‌ക്കും; നീ അവിടെനിന്ന്‌ എന്റെ മകന്‌ ഒരു ഭാര്യയെ കണ്ടെണ്ടത്തുകയും ചെയ്യും.'
ഉല്‍പത്തി 24 : 7

തന്റെ ജീവിതത്തിൽ ദൈവം അത്ഭുതകരമായി വഴി നടത്തിയ ജീവിതാനുഭവങ്ങളുടെ സാക്ഷ്യമാണ് അബ്രഹാം ദാസനോട് പറഞ്ഞത്.

റോഡിലെ തടസ്സങ്ങൾ നീക്കി, ട്രാഫിക് പോലീസ് യാത്ര സുഗമമാക്കുന്നതുപോലെ ദൈവീക പദ്ധതി പ്രകാരം മുന്നോട്ടുപോകുന്നവരുടെ മാർഗ്ഗ തടസ്സങ്ങളെ നീക്കുവാൻ സ്വർഗീയ ദൂതരെ ദൈവം അയയ്ക്കും. തന്റെ പ്രിയപ്പെട്ട മക്കളുടെ വഴിമുടക്കുന്ന നിഷേധ ശക്തികളെയും പ്രതിസന്ധികളെയും മനുഷ്യരെയും സ്വർഗീയ സൈന്യം തട്ടിമാറ്റും. പ്രതിരോധിക്കും.

4. ജീവിതാനുഭവങ്ങളിലൂടെ നേർവഴി നടത്തുന്നതാണ് ദൈവത്തിന്റെ നാലാമത്തെ സമീപനം:

'ദൈവത്തെ സ്‌നേഹിക്കുന്നവര്‍ക്ക്‌, അവിടുത്തെ പദ്‌ധതിയനുസരിച്ചു വിളിക്കപ്പെട്ടവര്‍ക്ക്‌, അവിടുന്നു സകലവും നന്‍മയ്‌ക്കായി പരിണമിപ്പിക്കുന്നുവെന്നു നമുക്കറിയാമല്ലോ.'
റോമാ 8 : 28

ജീവിതത്തിലെ 'റാന്റം ഇവൻസ്' എന്ന് നമ്മൾ കരുതുന്ന സംഭവങ്ങൾ ദൈവത്തിന്റെ 'ഡിവൈൻ റൂട്ടിങ്ങിന്റെ' ഭാഗമാണ്.
യാദൃശ്ചികമായി കണ്ടുമുട്ടുന്നവർ, അപ്രതീക്ഷിതമായ താമസം, അടഞ്ഞ വാതിലുകൾ... തുടങ്ങിയവ ഒക്കെ ജീവിതയാത്രയിലെ നേർവഴിക്കായി ദൈവം ഒരുക്കുന്ന താൽക്കാലിക സംഭവങ്ങളാണ്.
കൃത്യസമയത്ത് വെള്ളം കോരുവാൻ റിബേക്കയെയും ശമര്യക്കാരിയെയും കിണറ്റിൻകരയിൽ എത്തിച്ചത് ദൈവത്തിന്റെ ഈ ദിവ്യ പദ്ധതിയുടെ ഭാഗമാണ്.

ട്രെയിനിന്റെ പ്രയാണത്തിൽ ഒരു ട്രാക്ക് മാറ്റമാണ് വ്യത്യസ്ത ടെസ്റ്റിനേഷനിൽ യാത്രക്കാരെ എത്തിക്കുന്നത്. അതുപോലെ ചില ജീവിതാനുഭവങ്ങളിലൂടെ ദൈവം നമ്മുടെ ട്രാക്കും റൂട്ടും മാറ്റും. ഉദാഹരണം ഒന്ന്, ദമസ്ക്കോസിന്റെ പടിവാതുക്കൽ വീണുപോയ ശൗൽ.

അതുകൊണ്ട് ജീവിതയാത്രയിൽ ജഡീക മനസ്സിന്റെ ജല്പനങ്ങൾക്കും ഇൻഡ്യുഷനും പുറകെ ഓടാതിരിക്കാൻ നമ്മൾ വളരെ ശ്രദ്ധിക്കണം. ദൈവം വഴി കാണിക്കുന്നതിനു വേണ്ടി പ്രാർത്ഥനയോടെ ധ്യാനപൂർവ്വം കാത്തിരിക്കണം.

'കര്‍ത്താവില്‍ പൂര്‍ണഹൃദയത്തോടെവിശ്വാസമര്‍പ്പിക്കുക;സ്വന്തം ബുദ്‌ധിയെ ആശ്രയിക്കുകയുമരുത്‌.
നിന്റെ എല്ലാ പ്രവൃത്തികളുംദൈവവിചാരത്തോടെയാകട്ടെ;അവിടുന്ന്‌ നിനക്ക്‌ വഴി തെളിച്ചുതരും,'
സുഭാഷിതങ്ങള്‍ 3 : 5-6

നമ്മുടെ ബുദ്ധിക്ക് പരിമിതികളുണ്ട്. നാളെകളിലെ ഗതിവിഗതികളെ അറിയുവാനുള്ള കഴിവ് നമുക്കില്ല. നമ്മുടെ ജീവിതയാത്രയുടെ ഫൈനൽ ഡെസ്റ്റിനേഷൻ വരെ കാണുന്ന ദൈവത്തിൽ ശുഭാപ്തി വിശ്വാസത്തോടെ മനസ്സുറപ്പിക്കണം. അബ്രഹാമിന്റെ ദാസൻ ആദ്യം കണ്ടു മുട്ടിയ സ്ത്രീയെ കണ്ടെത്തുകയായിരുന്നില്ല, പ്രാർത്ഥിച്ച് കാത്തിരുന്ന് ദൈവത്തിന്റെ സ്ഥിരീകരണത്തിൽ എത്തിച്ചേരുകയാണ് ചെയ്തത്.

തിരുവചനത്തിലെ സംഭവങ്ങൾക്കിടയിൽ അല്പസമയം മാത്രം വന്നു പോകുന്ന, അബ്രഹാമിന്റെ ഈ ദാസൻ, യജമാനനോടുള്ള വിശ്വസ്തതയിലും ദൈവ നടത്തിപ്പിള്ള വിശ്വാസത്തിലും പ്രാർത്ഥനാ സ്വഭാവത്തിലും ദൈവസമർപ്പണത്തിന്റെ ഉത്തമ മാതൃകയായ ലെജൻഡ് ആണ്.

ദൈവത്തിന്റെ ഡിവൈൻ നാവിഗേഷനിൽ വിശ്വസിക്കുകയും ആശ്രയിക്കുകയും ചെയ്യുന്നതിന് പകരം, നമ്മുടെ 'സെൻസ് ഓഫ് ഡയറക്ഷനിൽ' ആശ്രയിച്ചാൽ ലക്ഷ്യം തെറ്റുമെന്ന മുന്നറിയിപ്പും ഈ സംഭവത്തിൽ നിന്നും വായിച്ചെടുക്കാവുന്നതാണ്.

ദൈവത്തിന്റെ ദിവ്യ പരിപാലനത്തിലൂടെ നടക്കുന്നവർ ഒരിക്കലും ലക്ഷ്യം തെറ്റില്ല. തിരുവചനം, പരിശുദ്ധാത്മാവ്, ദൂതന്മാർ, ജീവിതാനുഭവങ്ങൾ, അഭ്യുദയകാംക്ഷികൾ തുടങ്ങിയ ഉപാധികളിലൂടെ ദൈവം തന്റെ സമർപ്പിത ഭക്തരെ സുരക്ഷിതമായി വഴി നടത്തും. അവനിൽ വിശ്വസിക്കുകയും ആശ്രയിക്കുകയും പ്രാർത്ഥനയോടെ കാത്തിരിക്കുകയും ചെയ്യുന്നവരെ ദൈവത്തിന്റെ അപ്പോയിന്റ്ഡ് ഡെസ്റ്റിനേഷനിൽ സുരക്ഷിതമായി എത്തിക്കും. ദൈവത്തിന് സ്തോത്രം!
☆
-ഫാ. ഡോ. ഏ. പി. ജോർജ്
(കടപ്പാട് )

🔅

10/10/2026

Enjoy the videos and music you love, upload original content, and share it all with friends, family, and the world on YouTube.

10/09/2026

ക്രിസ്തുവിന്റെ സ്‌നേഹ കടാക്ഷം

മഹത്തായ സ്നേഹത്തിന്റെയും ക്ഷമയുടെയും വീണ്ടെടുപ്പിന്റെയും കഥ പറയുന്ന ഹൃദയസ്പർശിയായ അനേകം രംഗങ്ങൾ സുവിശേഷങ്ങളിലുണ്ട്. അതിലൊന്ന് പത്രോസ് യേശുവിനെ തള്ളിപ്പറയുന്ന രംഗമാണ്. കോഴി കൂവിയപ്പോൾ കർത്താവ് തിരിഞ്ഞ് പത്രോസിനെ നോക്കി (ലൂക്കോസ് 22:61). എന്തായിരിക്കാം ആ നോട്ടത്തിന്റെ അർത്ഥം? തീർച്ചയായും അത് പ്രതികാരവും കുറ്റപ്പെടുത്തലും ശാപവും ആയിരുന്നില്ല. മറിച്ച്, പറഞ്ഞറിയിക്കാനാവാത്ത കരുണയുടെയും പ്രത്യാശയുടെയും കൃപാ കടാക്ഷം ആയിരുന്നു.

"പത്രോസേ, നീ വീണുപോയി, പക്ഷേ നിന്നെ എഴുന്നേൽപ്പിക്കാൻ ഞാൻ കൂടെയുണ്ട്; ഇതൊരു ചെറിയ വീഴ്ച മാത്രമാണ്, ഞാൻ നിന്നെ വീണ്ടെടുക്കും, യഥാസ്ഥാനപ്പെടുത്തും " എന്ന ദൈവസ്നേഹത്തിന്റെ നിശബ്ദ ആശയവിനിമയമായിരുന്നു ആ നോട്ടം. ഭയത്തിലും നിരാശയിലും തകർന്നുപോയ പത്രോസിനെ പശ്ചാത്താപത്തിന്റെ കണ്ണുനീരിലേക്ക് നയിച്ചതും പിന്നീട് സഭയുടെ നെടുംതൂണായി മാറ്റിയതും കർത്താവിന്റെ വിസ്മയ സ്നേഹത്തിന്റെ ആ നോട്ടമാണ്.

ഇതിന് സമാനമായ മറ്റൊരു രംഗം ഉയിർത്തെഴുന്നേല്പിനു ശേഷം തിബെര്യാസ് കടൽത്തീരത്ത് കാണുന്നുണ്ട്. ക്രൂശീകരണ സമയത്ത് ഭയന്ന് പിന്തിരിഞ്ഞോടിയ ശിഷ്യന്മാർ, തങ്ങളുടെ പഴയ ഉപജീവനമാർഗ്ഗമായ മത്സ്യബന്ധനത്തിലേക്ക് തിരികെ പോയി. എന്നാൽ യേശു അവരെ തേടിയെത്തി. ശത്രുക്കൾ തന്റെമേൽ കൈവച്ചപ്പോൾ തന്നെ ഉപേക്ഷിച്ചോടിയതിന് കർത്താവ് അവരെ വിമർശിച്ചില്ല. പകരം, സ്നേഹത്തിന്റെ തീക്കനലൊരുക്കി, അവർക്കായി ഭക്ഷണം തയ്യാറാക്കിവെച്ച് അവൻ അവരെ വിളിച്ചു: "സ്നേഹിതരെ, വന്നു പ്രഭാതഭക്ഷണം കഴിക്കുക" (യോഹന്നാൻ 21:12). കുറ്റബോധത്താൽ തലകുനിച്ചുനിന്നവരോട് പരിഭവത്തിന്റെ ഒരു വാക്കുപോലും പറയാതെ, അവരെ ചേർത്തുപിടിച്ച ക്രിസ്തുവിനെയാണ് അവിടെ കാണുന്നത്.

ഈ സംഭവങ്ങൾ ഇന്ന് നമ്മോട് സംസാരിക്കുന്ന ചില ആത്മിയ മർമ്മങ്ങളുണ്ട്. നമ്മുടെ ജീവിതയാത്രയിൽ വീണുപോകുന്നവരും വഴിതെറ്റുന്നവരുമായ അനേകരെ നാം കണ്ടുമുട്ടാറുണ്ട്. ചിലപ്പോൾ നമ്മെ തുറന്നെതിർക്കുന്നവരോ, വേദനിപ്പിക്കുന്ന ശത്രുക്കളോ ആകാം അവർ. അത്തരം സാഹചര്യങ്ങളിൽ നമ്മുടെ പ്രതികരണം എന്തായിരിക്കണം? അവരോട് പ്രതികാരം ചെയ്യാനും അവരെ വാക്കുകൾ കൊണ്ട് മുറിവേൽപ്പിക്കാനും ക്രിസ്തുവിനെ യഥാർത്ഥമായി അറിഞ്ഞവർക്ക്‌ സാധിക്കില്ല. പകരം, യേശുക്രിസ്തുവിന്റെ ക്ഷമയും കരുണയും പ്രകടിപ്പിക്കുമ്പോഴാണ്, 'ക്രിസ്തു ഉള്ളിലുള്ള' ക്രിസ്ത്യാനികളാകുന്നത്.

ക്രിസ്തീയ വിശ്വാസത്തിന്റെ യഥാർത്ഥ വെല്ലുവിളി അടങ്ങിയിരിക്കുന്നത് ഇവിടെയാണ്. നമ്മെ സ്നേഹിക്കുന്നവരെ തിരികെ സ്നേഹിക്കുന്നതിലല്ല, നമ്മോട് പോരാടുന്നവരോടും നമ്മെ നിരന്തരം വേട്ടയാടുന്നവരോടും നിരുപാധിക സ്നേഹം (Unconditional love) പ്രകടിപ്പിക്കുന്നതിലാണ് നമ്മുടെ ആത്മീയത മാറ്റുരയ്ക്കപ്പെടുന്നത്. നമുക്കെതിരെ ശത്രുതയോടെ പ്രവർത്തിച്ചവരുടെ വീഴ്ചയിലും തകർച്ചയിലും സന്തോഷിക്കാതെ, അവരെ ചേർത്തുപിടിച്ച് പ്രോത്സാഹിപ്പിക്കാനും ഉയർത്തിക്കൊണ്ടുവരാനും നാം തയ്യാറാകുമ്പോൾ നമ്മൾ ക്രിസ്തുവോളം വളരുകയാണ്.

'ഇവരോട് ക്ഷമിക്കണമേ' എന്ന കർത്താവിന്റെ ക്രൂശിലെ പ്രാർത്ഥന ലോകം ഇതുവരെ കേട്ടിട്ടുള്ള സകല പ്രാർത്ഥനകളെക്കാളും സമുന്നതവും ഉദാത്തവും ആണ്‌. ശത്രുക്കളോട് നിരുപാധികം ക്ഷമിക്കുവാൻ തയ്യാറില്ലാത്തവർ, 'ഞങ്ങളുടെ കടക്കാരോട് ഞങ്ങൾ ക്ഷമിച്ചത് പോലെ' എന്ന പ്രാർത്ഥന അനവരതം ആവർത്തിക്കുമ്പോൾ ക്രൂശിലെ സ്നേഹം മുറിവേൽക്കുകയാണോ?

ശത്രുതയെ സ്നേഹം കൊണ്ടും, വിമർശനങ്ങളെ പ്രോത്സാഹനം കൊണ്ടും നേരിടാൻ നമുക്ക് കഴിയുമ്പോഴാണ് നമ്മൾ കുരിശിന്റെ വഴിയേ കുരിശു ചുമന്നു നടക്കുന്ന നസറായന്റെ ശിക്ഷ്യന്മാരാകുന്നത്.
വേദനിപ്പിച്ചവരോട് ഹൃദയപൂർവ്വം ക്ഷമിച്ച്, അവരെയും ചേർത്തുപിടിക്കാൻ കഴിയുമ്പോഴാണ് നാം യഥാർത്ഥത്തിൽ ക്രിസ്തുവിന്റെ അനുയായികളായി മാറുന്നത്. നമ്മുടെ അഹങ്കാരചിന്തകളെ അതിജീവിച്ച്, ക്രിസ്തീയ ക്ഷമയുടെയും സ്നേഹത്തിന്റെയും വെല്ലുവിളികൾ ഏറ്റെടുക്കുന്നതിൽ ഞാനും നിങ്ങളും പരാജയപ്പെടുമ്പോൾ, പത്രോസിനെ തിരിഞ്ഞു നോക്കിയ കർത്താവ് ഇന്നും നമ്മെയും നോക്കുന്നുണ്ട്.
☆
-ഫാ. ഡോ. ഏ. പി. ജോർജ്
(കടപ്പാട് )

10/08/2026

വല നിറയുന്നുണ്ടോ?

രാത്രി മുഴുവൻ അധ്വാനിച്ചിട്ടും ഒരു മീൻപോലും ലഭിക്കാത്ത മുക്കുവന്മാർ! അവരുടെ അധ്വാനത്തിന് കുറവുണ്ടായിരുന്നില്ല. അനുഭവത്തിനും കുറവുണ്ടായിരുന്നില്ല. കടലിൽ മീനുകൾ ഇല്ലാതിരുന്നതുമല്ല പ്രശ്നം. എന്നാൽ യേശു അവരുടെ വള്ളത്തിൽ പ്രവേശിച്ചപ്പോൾ, പരാജയത്തിന്റെ രാത്രിക്കുശേഷം അനുഗ്രഹത്തിന്റെ പ്രഭാതം ഉദിച്ചു. വല നിറയെ മീനുകൾ ലഭിച്ചു!
'സംസാരിച്ചു തീർന്നപ്പോൾ അവൻ ശിമോനോട്: “ആഴത്തിലേക്കു നീക്കി മീൻപിടിത്തത്തിനു വല ഇറക്കുവിൻ” എന്നു പറഞ്ഞു.' ലുക്കോസ് 5:4

ഈ സംഭവം വലിയ ആത്മീയ സത്യത്തിലേക്ക് നയിക്കുന്നു: അധ്വാനിക്കുന്നതുകൊണ്ടു മാത്രമായില്ല, നമ്മുടെ അധ്വാനത്തിൽ ക്രിസ്തുവിന്റെ സാന്നിധ്യവും മാർഗനിർദേശവും ഉണ്ടാകണം. മനുഷ്യരെ പിടിക്കുവാൻ ഹൃദയങ്ങളിലേക്ക് സുവിശേഷത്തിന്റെ വല വീശുന്നവർക്കുള്ള വിലപ്പെട്ട സന്ദേശമാണ് നമ്മുടെ കർത്താവിന്റെ കല്പന:
'ആഴത്തിലേക്കു നീക്കി വല ഇറക്കുവിൻ'

1. സുവിശേഷ പ്രവർത്തനവും ഇടയത്വ ശുശ്രുഷയും ഒരു ജോലി മാത്രമല്ല; ആത്മാക്കൾക്കളെ നേടുവാനുള്ള ദൗത്യവുമാണ്!
പ്രസംഗങ്ങൾ എത്ര നടത്തി എന്നതല്ല, എത്ര ഹൃദയങ്ങളിൽ ക്രിസ്തുവിനുവേണ്ടിയുള്ള വിശപ്പും ദാഹവും ഉണർത്താൻ കഴിഞ്ഞു എന്നതാണ് മിനിസ്ട്രിയുടെ പ്രസക്തി. ആരാധനകളിൽ പങ്കെടുക്കുന്നവരുടെ എണ്ണം മാത്രമല്ല, ക്രിസ്തുവിനോടു കൂടുതൽ അടുക്കുന്ന ജീവിതങ്ങളാണ് നമ്മുടെ ശുശ്രൂഷയുടെ യഥാർഥ ഫലം. വചനത്തിന്റെ ആഴത്തിലേക്ക് ഇറങ്ങുക; പ്രാർത്ഥനയുടെ ശക്തിയിൽ മുന്നേറുക; സ്നേഹത്തിലൂടെ മനുഷ്യരെ ക്രിസ്തുവിലേക്ക് നയിക്കുക... എന്നതൊക്കെ മനുഷ്യരെ പിടിക്കുന്നതിന്റെ വഴികളാണ്.

1. മാതാപിതാക്കളേ, നിങ്ങളുടെ ആദ്യത്തെ മിഷൻ ഫീൽഡ് നിങ്ങളുടെ വീടാണ്!
മക്കൾക്ക് ഭക്ഷണവും വസ്ത്രവും വിദ്യാഭ്യാസവും നൽകുന്നതിൽ മാത്രം മാതാപിതാക്കളുടെ ഉത്തരവാദിത്വം അവസാനിക്കുന്നില്ല. അവരുടെ ഹൃദയങ്ങളിൽ വിശ്വാസത്തിന്റെ വിത്തു വിതയ്ക്കുകയും പ്രാർത്ഥനയുടെ ശീലം വളർത്തുകയും ക്ഷമിക്കാനും പങ്കുവെക്കാനും സ്നേഹിക്കാനും പഠിപ്പിക്കുകയും വേണം. ഉപദേശിക്കുന്നതിനെക്കാൾ ശക്തമാണ് മാതാപിതാക്കളുടെ ജീവിതസാക്ഷ്യം. നിങ്ങളുടെ മക്കൾ നിങ്ങളുടെ വാക്കുകളിൽ മാത്രമല്ല, നിങ്ങളുടെ ജീവിതത്തിൽ യേശുവിനെ കാണുമ്പോഴാണ് വല നിറയുന്നത്.

1. ആരോഗ്യപ്രവർത്തകരേ, രോഗിയുടെ ശരീരം മാത്രമല്ല, ഹൃദയവും പരിചരിക്കുവാൻ വിളിക്കപ്പെട്ടവരാണ് നിങ്ങൾ.
മെഡിക്കൽ, പാരാ മെഡിക്കൽ ടീം മനുഷ്യരുടെ വേദനയുടെ ആഴങ്ങളിലേക്ക് ഇറങ്ങുന്നവരാണ്. മരുന്ന് ശരീരത്തെ സുഖപ്പെടുത്തുമ്പോൾ, കരുണ നിറഞ്ഞ വാക്കുകൾ ഭയപ്പെടുന്ന ഹൃദയത്തിന് ആശ്വാസം നൽകുന്നു. ഓരോ രോഗിയുടെയും ഡയഗ്നോസിന് അപ്പുറം ദൈവത്തിന്റെ പ്രതിച്ഛായ കാണണം. രോഗിയുടെ വിശ്വാസത്തെയും തിരഞ്ഞെടുപ്പുകളെയും മാനിച്ചുകൊണ്ട് സ്നേഹത്തോടെയും മാന്യതയോടെയും സേവിക്കണം. ചിലപ്പോൾ നിങ്ങളുടെ ഒരു പുഞ്ചിരി, ശ്രദ്ധാപൂർവമായ കേൾവി, കരുതലുള്ള സ്പർശം—ഇവയിലൂടെ ക്രിസ്തുവിന്റെ സ്നേഹം അവർക്ക് അനുഭവമാകും.

1. അധ്യാപകർ അറിവിനൊപ്പം ജീവിതവും പകർന്നു നൽകേണ്ടവരാണ്.

പാഠപുസ്തകങ്ങളിലെ അറിവുകൊണ്ട് മാത്രം നല്ല മനുഷ്യരെ സൃഷ്ടിക്കാനാവില്ല. നീതി, സത്യസന്ധത, കരുണ, ഉത്തരവാദിത്വം എന്നിവയും കുട്ടികളെ പഠിപ്പിക്കണം. പഠനത്തിൽ പിന്നാക്കം നിൽക്കുന്ന കുട്ടിയെയും കഴിവുകൾ തിരിച്ചറിയപ്പെടാത്ത വിദ്യാർഥിയെയും അവഗണിക്കരുത്. ഒരു അധ്യാപകന്റെ പ്രോത്സാഹനം ഒരു കുട്ടിയുടെ ഭാവിയെ മാറ്റിമറിച്ചേക്കാം. ഓരോ വിദ്യാർഥിയിലും വളരാൻ കാത്തിരിക്കുന്ന ഒരു സാധ്യതയുണ്ട്. അതിനെ തിരിച്ചറിയുന്നതും പരിപോഷിപ്പിക്കുന്നതും അധ്യാപകന്റെ വിശുദ്ധമായ ഉത്തരവാദിത്വമാണ്, ആത്മക്കളെ നേടുന്ന വഴികളാണ്.

1. സാമൂഹ്യ പ്രവർത്തകരേ, സമൂഹത്തിന്റെ ആഴങ്ങളിലേക്ക് ഇറങ്ങി വലയിറക്കുവാൻ മറക്കരുത് .
ദാരിദ്ര്യം, ഏകാന്തത, അവഗണന, ലഹരിയുടെ അടിമത്തം, കുടുംബത്തകർച്ച, അനീതി—ഇവയുടെ നടുവിൽ പ്രത്യാശയ്ക്കായി കാത്തിരിക്കുന്ന അനേകം ജീവിതങ്ങളുണ്ട്. അകലെയിരുന്ന് പ്രശ്നങ്ങളെക്കുറിച്ച് സംസാരിക്കുന്നതിൽ മാത്രം സംതൃപ്തരാകരുത്. മനുഷ്യരുടെ യഥാർഥ ആവശ്യങ്ങളിലേക്ക് ഇറങ്ങിച്ചെല്ലണം. സഹായം നൽകുമ്പോൾ അവരുടെ അന്തസ്സും സ്വാതന്ത്ര്യവും സംരക്ഷിക്കപ്പെടണം. ദാനധർമ്മം മാത്രമല്ല, നീതിയും മാന്യമായ ജീവിതസാഹചര്യങ്ങളും ഉറപ്പാക്കാനുള്ള പരിശ്രമവും ആവശ്യമാണ്. അപ്പോഴാണ് സ്‌നേഹ വലകൾ നിറയുന്നത്.

1. രക്ഷാപ്രവർത്തകരേ, പ്രതിസന്ധിയുടെ നടുവിൽ പ്രത്യാശയുടെ സാക്ഷികളാണ്‌ നിങ്ങൾ!
അപകടങ്ങളിലും പ്രകൃതിദുരന്തങ്ങളിലും ജീവൻ അപകടത്തിലാകുന്ന സാഹചര്യങ്ങളിലും നിങ്ങൾ മറ്റുള്ളവരുടെ രക്ഷയ്ക്കായി ഓടിയെത്തുന്നു. മനുഷ്യജീവന്റെ മൂല്യം വിളിച്ചറിയിക്കുന്നതാണ് നിങ്ങളുടെ ധൈര്യവും ത്യാഗവും. സഹോദരർക്കുവേണ്ടി ജീവൻ ബലിയർപ്പിക്കുന്ന നിങ്ങളുടെ സ്നേഹത്തേക്കാൾ വലിയതൊന്നും ഈ ലോകത്തിൽ ഇല്ലെന്നാണ് കർത്താവ് പറഞ്ഞത്. സുരക്ഷാനിർദേശങ്ങൾ പാലിച്ചും പരിശീലനത്തോടെയും പ്രവർത്തിക്കുക. സഹായം ആവശ്യമുള്ളവരെ വിവേചനമില്ലാതെ പരിചരിക്കുക. പ്രതിസന്ധിയുടെ ഇരുട്ടിൽ നിങ്ങളുടെ സാന്നിധ്യം ഒരാൾക്ക് ക്രിസ്തുവിലേക്കുള്ള പുതിയ പ്രത്യാശയായേക്കാം.

1. വല വീശുകയാണോ, വല ഉണക്കുകയാണോ?
എന്നാണ് എല്ലാവരോടും ദൈവം ചോദിക്കുന്നത്.

നമുക്ക് അനുഭവ ജ്ഞാനം ഉണ്ടാകാം, കഴിവുണ്ടാകാം, സംവിധാനങ്ങളുണ്ടാകാം, വർഷങ്ങളുടെ സേവനപാരമ്പര്യമുണ്ടാകാം. എന്നിട്ടും മനുഷ്യർ നമ്മിലൂടെ ക്രിസ്തുവിന്റെ സ്നേഹം അനുഭവിക്കുന്നില്ലെങ്കിൽ, നമ്മുടെ പ്രവർത്തനരീതിയെ ആത്മപരിശോധനയ്ക്ക് വിധേയമാക്കേണ്ടതുണ്ട്.

യേശു പത്രോസിനോട് കരയ്ക്കരികിൽ വല നന്നാക്കിക്കൊണ്ടിരിക്കാനല്ല പറഞ്ഞത്; “ആഴത്തിലേക്ക് നീക്കി വല ഇറക്കുക” എന്നാണ് ആഹ്വാനം ചെയ്തത്.

ആരാലും ശ്രദ്ധിക്കപ്പെടാത്തവരുടെ അടുത്തേക്ക് പോകുക. പ്രത്യാശ നഷ്ടപ്പെട്ടവരെ കേൾക്കുക. വഴി തെറ്റിപ്പോയവരെ അപമാനിക്കാതെ തിരികെ വരാൻ സഹായിക്കുക. ദുഃഖിക്കുന്നവരോടൊപ്പം കരയുക. വീണുപോയവരെ ഉയർത്തുക. നമ്മുടെ ശുശ്രൂഷയിൽ മനുഷ്യരുടെ ഹൃദയങ്ങളെ സ്പർശിക്കാൻ ക്രിസ്തുവിന് ഇടം നൽകുക.

യേശു അരുളിച്ചെയ്തു: “ഞാനോ ഭൂമിയിൽനിന്ന് ഉയർത്തപ്പെട്ടാൽ എല്ലാവരെയും എങ്കലേക്ക് ആകർഷിക്കും” (യോഹന്നാൻ 12:32)
നമ്മുടെ ലക്ഷ്യം ആളുകളെ ഒരു സ്ഥാപനത്തിലേക്ക് ആകർഷിക്കുക മാത്രമല്ല, ക്രിസ്തുവിന്റെ സ്നേഹത്തിലേക്കും സത്യത്തിലേക്കും പുതിയ ജീവിതത്തിലേക്കും നയിക്കുകയാണ്.

ഞാൻ ചെയ്യുന്ന സേവനത്തിൽ ക്രിസ്തുവിന്റെ സാന്നിധ്യമുണ്ടോ? എന്റെ അടുത്തേക്ക് വരുന്നവർക്ക് എന്റെ കഴിവുകൾ മാത്രമാണോ അനുഭവപ്പെടുന്നത്, അതോ ക്രിസ്തുവിന്റെ സ്നേഹവും കരുണയും അനുഭവ പ്പെടുന്നുണ്ടോ ? വലയിറക്കുന്നവർ വിമർശനാത്മകമായി ചിന്തിക്കേണ്ട പ്രധാനപ്പെട്ട കാര്യങ്ങളാണ് ഇതൊക്കെ.

രാത്രി മുഴുവൻ അധ്വാനിച്ചിട്ടും ഫലമില്ലാതിരുന്ന പത്രോസിനോട് യേശു വീണ്ടും വല ഇറക്കാൻ ആവശ്യപ്പെട്ടു. അതുപോലെ, നിയോഗങ്ങളിൽ നിരാശരായി പിൻവാങ്ങരുത്. പ്രാർത്ഥനയോടെ, വിശ്വാസത്തോടെ, പുതിയ കാഴ്ചപ്പാടോടെ വീണ്ടും വീണ്ടും വലയിറക്കണം. വിളിച്ചവൻ വിശ്വസ്തനാണ്. മിനിസ്ട്രിയിൽ നിരാശയും നിസ്സഹായതയും നിഷേധമനോഭാവങ്ങളും നേരിടുമ്പോൾ ഒന്ന് വിളിച്ചാൽ മതി, കർത്താവു പടകിൽ വരും. വല നിറയ്ക്കുവാൻ സഹായിക്കും.

നമ്മൾ വല വീശുന്നവർ മാത്രമാണ്. ഫലം നൽകുന്നത് ദൈവമാണ്. നമ്മുടെ അധ്വാനം സ്നേഹത്തിലും വിശ്വാസത്തിലും തുടർന്നുകൊണ്ടിരിക്കണം. ക്രിസ്തുവിന്റെ സാന്നിധ്യത്തിൽ, ഒരിക്കലും പ്രത്യാശ കൈവിടാതെ, മനുഷ്യരെ നേടുന്നവരായി നമുക്ക് മുന്നേറാം.

“വിശപ്പുള്ളവനു നിന്റെ അപ്പം നുറുക്കിക്കൊടുക്കുന്നതും അലഞ്ഞു നടക്കുന്ന സാധുക്കളെ നിന്റെ വീട്ടിൽ ചേർത്തുകൊള്ളുന്നതും നഗ്നനെ കണ്ടാൽ അവനെ ഉടുപ്പിക്കുന്നതും നിന്റെ മാംസരക്തങ്ങളായിരിക്കുന്നവർക്കു നിന്നെത്തന്നെ മറയ്ക്കാതെയിരിക്കുന്നതും അല്ലയോ? അപ്പോൾ നിന്റെ വെളിച്ചം ഉഷസ്സുപോലെ പ്രകാശിക്കും; നിന്റെ മുറിവുകൾക്കു വേഗത്തിൽ പൊറുതിവരും; നിന്റെ നീതി നിനക്കു മുമ്പായി നടക്കും; യഹോവയുടെ മഹത്ത്വം നിന്റെ പിമ്പട ആയിരിക്കും.” — യെശയ്യാവ് 58:7–8
🙏
കർത്താവായ യേശുവേ, മനുഷ്യരെ സ്നേഹത്തോടെ സമീപിക്കാനും അവരുടെ വേദനകൾ തിരിച്ചറിയാനും ഞങ്ങളുടെ ശുശ്രൂഷകളിൽ നിന്റെ സാന്നിധ്യവും മാർഗനിർദേശവും അനുഭവിക്കാനും ഞങ്ങളെ സഹായിക്കണമേ. ഞങ്ങളുടെ അധ്വാനം നിന്റെ മഹത്വത്തിനും അനേകരുടെ നന്മയ്ക്കും കാരണമാകട്ടെ. ആമേൻ.
☆
-ഫാ. ഡോ. ഏ. പി. ജോർജ്
(കടപ്പാട് )

Address

Washington D.C., DC

Website

, ,

Alerts

Be the first to know and let us send you an email when Fr. Dr. A P George posts news and promotions. Your email address will not be used for any other purpose, and you can unsubscribe at any time.

Shortcuts

Sponsored

Share

Category