16/12/2025
Me sukses u përmbyll diplomimi në Mjekësi Sportive, pas përfundimit të një programi trajnimi njëvjeçar, i zhvilluar në kuadër të UEFA-s, i organizuar nga Federata Shqiptare e Futbollit (FSHF) në bashkëpunim me Shoqatën e Mjekëve Sportivë dhe Fizioterapistëve.
Ky program u drejtua nga Dr. Gianluca Stesina, mjek sportiv i mirënjohur ndërkombëtarisht, ish-mjek i klubeve elitare si Juventus FC, Torino FC dhe institucione të tjera prestigjioze të futbollit evropian. Ishte një kënaqësi dhe privilegj i veçantë të jem pjesë e këtij trajnimi nën udhëheqjen e një profesionisti me përvojë të jashtëzakonshme në mjekësinë sportive të nivelit të lartë.
Programi kontribuoi ndjeshëm në avancimin e njohurive teorike dhe praktike në fushën e parandalimit dhe menaxhimit të lëndimeve, rehabilitimit bashkëkohor të sportistëve, si dhe në thellimin e njohurive në antidoping, nutricion sportiv dhe praktikat bashkëkohore që lidhen me performancën dhe shëndetin e sportistëve, në përputhje me standardet ndërkombëtare.
Këto njohuri dhe kompetenca do të aplikohen drejtpërdrejt në praktikën profesionale në FIZIOPLUS Physiotherapy Center, me qëllim ofrimin e shërbimeve të specializuara, të bazuara në evidencë shkencore dhe standarde të larta profesionale për sportistë dhe pacientë.
Falënderim Federatës Shqiptare të Futbollit, organizatorëve dhe gjithë stafit akademik për realizimin e këtij programi me rëndësi të veçantë profesionale.
