26/08/2026
🚨 لو اتشخصت إنك مريض سكر أو حتى "في مرحلة ما قبل السكر"..او عندك مقاومة انسولين. اقرا البوست ده مهم جدا ..
👈كل مريض بيقابلني في العيادة بعد تشخيص السكر أو مرحلة ما قبل السكر ..بكون حريصة إني أوصله المعلومات دي.. عايزة كل الناس تعرفها:
1️⃣ فيه حاجة اسمها "الاستشفاء" من السكر.. خطة علاجية قائمة على تنظيم حياتك كلها، مش أقراص ولا انسولين بس.. لو نفذتها هتحس إنك اتولدت من جديد.
و الخطة دي كل لما تنفذها بدري يبقي أفضل ..
و حتي لو بتاخد انسولين ...ف تنظيم حياتك. أكل و رياضة و علاج. كفيل يخليك تاخد اقل جرعات و تخلي سكرك مضبوط
نفسي أوصل المعلومة دي للمرضي اللي بيعتقدوا ان الأنسولين أداة تخليك تأكل سكريات و حلويات براحتك و تزود عدد الوحدات و انت بتحقن ...غلط غلط علي صحتك ..هتدخل في دائرة مقاومة الأنسولين الخارجي و بدل ما تحتاج ١٠ وحدات مثلا هتحتاج ٤٠ ..و ده غلط علي صحتك ..
2️⃣ متعتمدش على الأعراض. لو عندك تاريخ عائلي أو زيادة في الوزن، اعمل فحوصات دورية (قياس سكر صايم ، فاطر ..بعد بداية الأكلب ساعتين، و سكر تراكمي HbA1c) واطمن بنفسك.
بالمناسبة مفيش حاجه اسمها تحليل مقاومة انسولين دي افتكاسة في مصر بس. المهم التحاليل اللي كتبتها لحضرتك و بنشخص مقاومة انسولين تشخيص اكلينيكي.
3️⃣ متفرحش إنك عمال تاكل حلويات وسكر وبتخس! انا شفت الوضع ده كتير الفترة اللي فاتت...دي ظاهرة منتشرة حاليا.. النحافة دي مرضية مش صحية.. هتعرفها ان جسمك بيبان هزيل مفيش عضلات . جسمك مش عارف يستخدم الجلوكوز اللي في الدم، فبيضطر يكسّر عضلاتك عشان ياخد طاقة. يعني انت بتخس بالمرض مش بالرجيم.
4️⃣ البنكرياس بتاعك زي رصيد محدود في البنك.. متاح ليك طول العمر لو رشّدت في استهلاكه. كل ما تستهلكه بسرعة (سكريات ..حلويات..عصاير . كتير) هتخلص المخزون بسرعة ..مش هيكمل معاك باقي عمرك
بتدخل في مقاومة انسولين، بعدين مرحلة ما قبل السكر، بعدين السكر نفسه. فمتفرحش إن السكر "طلع مظبوط" وانت آكل حلويات، المشكلة مش بس في الرقم دلوقتي.
5️⃣ السكر مش مرض سكر بس.. هو مرض قلب وأوعية دموية بالدرجة الأولى. بيأثر على شبكية العين (فقدان بصر لا قدر الله)، على أعصاب وشرايين الرجل (قدم سكري وبتر)، وعلى عضلة القلب نفسها (ضعف بالقلب واحتشاءات صامتة).....فشل كلوي ...
المضاعفات دي أحنا بنشوفها كل يوم. الحق نفسك ..
الوقاية ممكنة لو التزمت بخطة متكاملة صح. نظام غذائي و رياضة و علاج مناسب. 💪
6️⃣ من منظور دكتورة قلب: أدوية الكوليسترول (الستاتين) بنستخدمها في مريض السكر كوقاية قلبية، حتى لو الكوليسترول الضار طالع مظبوط في التحاليل. مريض السكر بيتعامل معاه القلب كأنه "مريض قلب مستتر" من أول يوم تشخيص.
7️⃣ لما تكون بتظبط جرعاتك مع الدكتور وعامل جدول قياسات، كُل بنفس الطريقة (نوع وكمية) اللي هتستمر عليها فعلاً. مش معقول تلتزم أيام القياس بس، والدكتور يظبط جرعتك على أساس نظام مش هتكمل عليه.
دا من اشهر اسباب ان جرعة علاجك مش مضبطه سكرك
8️⃣ امشي.. امشي.. امشي. من أرخص وأقوى الأدوية المتاحة ليك مجانًا.
9️⃣ اقعد مع نفسك وسجّل يومك: هتكتشف مين "اللص" الحقيقي اللي بيرفعلك السكر. في ناس بتاكل تلات معالق سكر في الشاي وهي مقتنعة إنها "مش بتاكل حلو"، وناس تانية بتشرب شاي من غير سكر بس عيشتها في المخبوزات. اعرف نقطة ضعفك بالظبط وامنعها.
🔟 عايز تقلل السكر في الشاي؟ انزل بالتدريج، مش مرة واحدة، عشان مراكز التذوق تاخد وقتها ترجع لطبيعتها، وتحس بطعم نص معلقة سكر في القهوة. بس مش ناخد ١٠ سنين تدريج 😂 لاء قلل نص معلقة كل ٣ ايام مثلا .
منقول
