23/07/2026
Liewe Vrou,🌻
Ek is dankbaar vir elke talent en passie wat ek gekry het en steeds ontdek. Maar ek het nog nie 'n passie vir wasgoed ontdek nie. Tog moet dit gedoen word. Dit is een van daardie dinge wat jy nie kan ignoreer nie, want as jy dit doen, raak die probleem net groter.
So wroeg ek weer dié week deur hope wasgoed. Kyk, elke stap daarvan het sy eie vlakke. Jy moet eers al die vuil wasgoed bymekaar kry, dan moet jy dit sorteer. Daarna kyk jy alles deur vir goed wat in sakke agtergebly het, kolle en ander verrassings. Dan sorteer jy volgens kleur. Prys die Here – nie volgens geur nie!
Nadat jou getroue wit of silwer kombuisassistent haar deel gedoen het, durf jy die natuur aan om alles buite te hang. Soms is dit op sigself 'n uitdaging en verg dit behoorlike beplanning, want alles moet inpas en sommige stukkies hoort eenvoudig nie op die draad nie.
Nadat die natuur haar bydrae gelewer het, begin die sorteer en vou. Party stukkies benodig ekstra liefde onder die getroue warm yster, ander kan jy sommer net met mening regskud.
Dan begin die vouwerk. Hier ontdek jy jou perfeksionistiese kant. Elkeen van ons het mos ons eie manier – die een wat jy glo die regte een is – en so werk jy deur die bondels.
Nou word alles netjies op elkeen se bed neergesit, en elke huislid is verantwoordelik om dit "netjies" weg te bêre. Teen dié tyd voel jy soos die wetsgeleerdes in die Bybel. Niemand kan nou vir jou iets vertel oor skoon wasgoed en hoe om daar uit te kom nie. En behoede die siel wat nie die "meesterstuk" met respek en deernis hanteer nie!
Dan begin die wegsit. Dit lyk soos netjies gepoleerde soldate wat in 'n ry staan. Jy moet hulle net op die regte plek plaas, in lyn met hul diens.
So besef ek deur my week se wasgoeddiens dat ons lewe ook maar so lyk.
Ons het almal 'n "hoop" wat soos 'n berg voor ons lê. Iets waarvoor ons eenvoudig nie kans sien nie. Maar daardie hoop kort net 'n bietjie uitsorteer en deurwerk, totdat jy ook 'n ry soldate het wat reg staan om jou by jou doelwit uit te bring.
Wat is jou hoop waarvoor jy nie kans sien nie?
Gesondheid? Finansies? Vriendskappe? Familiekwessies? Of dalk is dit net 'n deurmekaar kas.
Maar daardie **hoop wat ons laat lê**, begin later **'n reuk afgee**. Dit hou ons vas. Dit steel ons moed en weerhou ons daarvan om by ons doel uit te kom.
Ons groei nie in gemak nie.
Ek het dié week iets kosbaars gelees:
**"Die grootste vriend van gemak is ouderdom."**
Moenie gemaklik raak met die hoop wat jy voor jou uitskuif nie. Begin uitsorteer. Werk daardeur. Baklei jou pad oop, totdat jy ook jou ry soldate het wat saam met jou op pad is na jou doelwitte.
Geseënde dag vir jou.
