Psychologist Anwar Malik

Psychologist Anwar Malik هنا..تبدأ رحلتك نحو التوازن النفسى���

26/07/2026

‏بعض الألعاب الإلكترونية قد تساعد في تخفيف أعراض الاكتئاب ، والقلق ، وتحسين الانتباه لدى بعض المراهقين المصابين باضطراب فرط الحركة وتشتت الانتباه (ADHD).

‏من أبرز الألعاب التي أظهرت فائدة في الدراسات ..

‏1- الاكتئاب 👈 SPARX.
‏2- اضطراب فرط الحركة وتشتت الانتباه (ADHD) 👈 EndeavorRx.
‏ - القلق 👈 MindLight وPersonal Zen

الفرق بين حجمك و المسؤليات ال عليك :
15/06/2026

الفرق بين حجمك و المسؤليات ال عليك :

الـ ADHD عند الستات مش دايما بيبان زي الرجالةفي جوانب مختلفة لأعراض الـ ADHD (اضطراب نقص الانتباه مع فرط النشاط) عند الس...
14/06/2026

الـ ADHD عند الستات مش دايما بيبان زي الرجالة

في جوانب مختلفة لأعراض الـ ADHD (اضطراب نقص الانتباه مع فرط النشاط) عند السيدات

زي محاولة إخفاء المشاكل والضغط العصبي، الاندفاع العاطفي، النسيان والتشتت، والإرهاق المستمر. الأعراض دي غالباً بتبان داخلية ومش واضحة للناس زي فرط الحركة عند الرجالة، وده اللي بيخلي التشخيص عند البنات أصعب

ولكن، فيه نقطة مهمة جداً لازم ناخد بالنا منها…وجود الأعراض دي عندك مش معناه بالضرورة إنك مصابة بالـ ADHD.

مش كل حد حس بتشتت أو ضغط أو نسيان يبقى يشخص نفسه بنفسه، لأن الأعراض دي مشتركة بين اضطرابات واختلافات نفسية كتيرة جداً، وممكن تكون مجرد ناتجة عن ضغوط الحياة العادية.

التشخيص الذاتي بناء على بوستات السوشيال ميديا خطأ كبير وممكن يوجهك في طريق مش صح.

عشان نتأكد بشكل علمي وسليم، الخطوة الوحيدة الصح هي اللجوء للمتخصصين

زيارة الطبيب النفسي المختص لإجراء الاختبارات والمقاييس العلمية المعتمدة للوصول لتشخيص دقيق.وللمساعدة في وضع خطة التعامل العلاجي والسلوكي المناسبة لطبيعة حياتك.

صحتك النفسية تستاهل إنك تدوري على المعلومة الصح من مكانها الصح، وبلاش تسرع في إطلاق الأحكام والتشخيصات على نفسك.

فهمك لنفسك اول خطوه ..واتأكدي ان اضطراب فرط الحركه وتشتت الانتباه مش سجن ..هو تحدي كبير ومرهق ولكن ممكن اكتساب مهارات كتير للتعايش معاه وتحسين جوده حياتك علي حسب درجته وتأثيره عليكي

كارين هورناي: المرأة التي وقفت أمام فرويد وقالت "الإنسان أكبر من غرائزه"لما بنتكلم عن أعلام علم النفس، غالبًا أول اسم بي...
08/06/2026

كارين هورناي: المرأة التي وقفت أمام فرويد وقالت "الإنسان أكبر من غرائزه"

لما بنتكلم عن أعلام علم النفس، غالبًا أول اسم بيجي في دماغنا هو فرويد. الراجل اللي غيّر شكل علم النفس كله، واللي قدم أفكار عن اللاوعي والأحلام والصراعات النفسية. لكن في وسط الهيمنة الكبيرة لأفكاره، ظهرت عالمة نفس قوية جدًا اسمها كارين هورناي، وكانت من أوائل الناس اللي قالوا: "استنوا شوية... مش كل حاجة في النفس البشرية تتفسر بالجنس أو الغرائز."

كارين هورناي تعتبر من أهم الشخصيات اللي ساهمت في تطوير التحليل النفسي، وفي نفس الوقت كانت من أبرز المنتقدين لبعض أفكار فرويد.

مين هي كارين هورناي؟

كارين هورناي كانت طبيبة ومحللة نفسية ألمانية، اتولدت سنة 1885.

طفولتها نفسها كانت مليانة صراعات نفسية. أبوها كان صارم جدًا ومتسلط، وأمها كانت أقرب لها لكنها كانت علاقتها بيها معقدة برضو.

التجارب دي خلتها تهتم بفهم الإنسان من منظور أعمق.

في البداية كانت من أتباع فرويد، ودرست التحليل النفسي بشكل مكثف، لكن مع الوقت بدأت تلاحظ إن فيه حاجات كتير في نظريات فرويد مش بتفسر الواقع اللي بتشوفه مع المرضى.

ومن هنا بدأت رحلتها الخاصة.

المشكلة الأساسية مع فرويد

فرويد كان شايف إن أغلب مشكلات الإنسان أصلها صراعات غريزية وجنسية.

وكان مقتنع إن تكوين الشخصية بيتحدد بدرجة كبيرة من خلال الدوافع البيولوجية.

أما كارين هورناي فكان عندها اعتراض مهم جدًا.

كانت بتقول:

"إزاي نفسر اختلاف الناس بين مجتمع ومجتمع لو كل حاجة سببها الغرائز؟"

لو الغرائز هي السبب الوحيد، كان المفروض الناس كلها تبقى شبه بعض.

لكن الواقع بيقول إن الثقافة والتربية والعلاقات الأسرية ليهم تأثير ضخم.

ومن هنا بدأت تنقل التركيز من:

البيولوجيا → إلى البيئة الاجتماعية

القلق الأساسي (Basic Anxiety)

ودي تعتبر أهم فكرة عند كارين هورناي.

كانت شايفة إن أصل أغلب المشكلات النفسية مش الغرائز الجنسية.

لكن:

الشعور بعدم الأمان

الطفل لما يحس إنه:

غير محبوب

مرفوض

مهمل

مهدد

مش مفهوم

بيبدأ يتكون جواه إحساس عميق بالخوف.

الخوف ده أطلقت عليه:

القلق الأساسي

الطفل بيبقى حاسس إنه لوحده في عالم كبير ومخيف.

ومع الوقت بيبدأ يبني طرق مختلفة عشان يحمي نفسه من الإحساس ده.

العداء الأساسي

هنا هورناي لاحظت حاجة ذكية جدًا.

الطفل اللي بيتعرض للإهمال أو القسوة بيغضب.

وده طبيعي.

لكن المشكلة إنه مش قادر يعبر عن غضبه تجاه أبوه أو أمه.

لأنه محتاجهم.

فيبدأ يكتم الغضب.

الغضب المكبوت ده أسمته:

العداء الأساسي

ومع الوقت يتحول القلق والغضب المكبوت لمشكلات نفسية مختلفة.

الاحتياجات العصابية

هنا بدأت هورناي تشرح إزاي الإنسان بيتعامل مع القلق.

قالت إن بعض الناس بيطوروا احتياجات مبالغ فيها.

زي مثلًا:

الحاجة الشديدة للحب

الشخص يبقى عايز كل الناس تحبه.

أي رفض بسيط ينهاره.

أي انتقاد يحسسه إنه مرفوض تمامًا.

الحاجة للموافقة

يبقى طول الوقت بيدور على رضا الآخرين.

ميقدرش يقول "لا".

يخاف يزعل أي حد.

يعيش حياته كلها علشان الناس.

الحاجة للقوة

شخص تاني يتعامل مع القلق بطريقة مختلفة.

يقرر إنه لازم يبقى الأقوى.

الأغنى.

الأكثر نفوذًا.

لأنه حاسس من جواه بالضعف.

الحاجة للكمال

يبقى طول الوقت بيجري وراء المثالية.

وأي خطأ صغير يحسسه بالفشل.

هورناي وصفت عشر احتياجات عصابية رئيسية، وكانت شايفة إنها كلها محاولات للهروب من القلق الأساسي.

الطرق الثلاث للتعامل مع الناس

واحدة من أشهر أفكارها على الإطلاق.

قالت إن الناس غالبًا بتتعامل مع القلق بثلاث استراتيجيات.

أولًا: التحرك نحو الناس

Moving Toward People

وده الشخص اللي بيحاول يحتمي بالآخرين.

يبقى لطيف زيادة.

متعاون زيادة.

موافق على كل حاجة.

خايف من الرفض.

شعاره الداخلي:

"لو الناس حبتني هبقى آمن."

ثانيًا: التحرك ضد الناس

Moving Against People

وده العكس تمامًا.

يشوف الحياة معركة.

ويحاول يسيطر على الجميع.

يبقى تنافسي جدًا.

هجومي أحيانًا.

شعاره:

"لو بقيت قوي محدش هيقدر يجرحني."

ثالثًا: الابتعاد عن الناس

Moving Away From People

هنا الشخص ينسحب.

يبعد.

يعزل نفسه.

يعتمد على نفسه فقط.

شعاره:

"لو محدش قرب مني محدش هيؤذيني."

المشكلة إن الأشخاص الأسوياء يقدروا يستخدموا التلات طرق بمرونة.

لكن الشخص المضطرب يتمسك بطريقة واحدة فقط.

مفهوم الذات عند هورناي

هورناي كانت شايفة إن كل إنسان عنده:

الذات الحقيقية

ودي الشخص اللي إحنا عليه فعلًا.

بمشاعرنا الحقيقية.

وقدراتنا الحقيقية.

واحتياجاتنا الحقيقية.

لكن بسبب الضغوط النفسية يبدأ الإنسان يبني:

الذات المثالية

نسخة خيالية من نفسه.

لازم تكون كاملة.

لازم تكون ناجحة دائمًا.

لازم تكون محبوبة من الجميع.

لازم تكون بلا أخطاء.

وهنا تبدأ المعاناة.

لأن الإنسان يفضل طول عمره يحاول يوصل لشخص غير موجود أصلًا.

طغيان كلمة "يجب"

من أجمل أفكار هورناي.

كانت شايفة إن الإنسان العصابي بيعيش تحت حكم كلمة:

"لازم"

لازم أبقى مثالي.

لازم محدش يرفضني.

لازم أنجح دائمًا.

لازم أكون قوي.

لازم أكون محبوب.

كل ما زادت كلمة "لازم" زاد الضغط النفسي.

وزاد الإحساس بالفشل.

لأن الكمال غير موجود أصلًا.

نظرة هورناي للمرأة

هنا كانت ثورية جدًا.

فرويد كان بيقول إن البنات بيعانوا من حاجة اسمها:

"حسد القضيب"

وإن البنت تشعر بالنقص لأنها ليست ذكرًا.

هورناي رفضت الفكرة دي بشدة.

وقالت إن مشاعر النقص اللي بتظهر عند بعض النساء سببها المجتمع والتمييز الاجتماعي.

مش سببها التكوين البيولوجي.

وكانت من أوائل الأصوات اللي فتحت الباب لعلم النفس النسوي.

العلاج النفسي عند هورناي

كان هدف العلاج عندها:

مش إن الشخص يبقى مثالي.

لكن إنه يرجع لنفسه الحقيقية.

يفهم احتياجاته الحقيقية.

يعرف مصدر قلقه.

يبطل يعيش وفق توقعات الناس.

ويبدأ يعيش بشكل أكثر أصالة.

ليه أفكار هورناي مهمة لحد النهارده؟

لأنها كانت من أوائل الناس اللي قالت إن:

البيئة مهمة.

العلاقات مهمة.

الأسرة مهمة.

الإحساس بالأمان مهم.

الحب والقبول مهمين.

قبل ما الأفكار دي تبقى من أساسيات العلاج النفسي الحديث.

كارين هورناي غيرت اتجاه مهم في علم النفس.

بدل ما تسأل:

"ما هي الغرائز التي تحرك الإنسان؟"

كانت تسأل:

"كيف أثرت علاقاته وخبراته على شعوره بالأمان؟"

وبدل ما تركز على الإنسان باعتباره أسيرًا لماضيه وغرائزه، ركزت على الإنسان باعتباره كائنًا يحاول طوال حياته أن يجد الأمان والقبول والانتماء.

ولعل أعظم رسالة تركتها لنا هي أن كثيرًا من السلوكيات التي تبدو غريبة أو مبالغًا فيها ليست دليلًا على ضعف الإنسان، بل هي محاولات قديمة لحماية نفسه من قلق عميق تعلّمه منذ سنواته الأولى.

سيب الصورة دي لحظة، وتعالى نتكلم عن أخطر شيء فيها.العلم اليوم يتحدث بجدية عن الوراثة فوق الجينية، عن الكيفية التي يمكن أ...
23/05/2026

سيب الصورة دي لحظة، وتعالى نتكلم عن أخطر شيء فيها.

العلم اليوم يتحدث بجدية عن الوراثة فوق الجينية، عن الكيفية التي يمكن أن تغير بها الصدمات طريقة عمل بعض الجينات دون أن تغير الجينات نفسها.
كأن التجربة تترك هامشًا صغيرًا مكتوبًا على الجسد: انتبه، العالم ليس آمنًا بالكامل.

لكن هنا تحديدًا يبدأ سوء الفهم.

الناس تسمع هذا الكلام، فتتصور أننا محكومون بيولوجيًا، وأن الإنسان مجرد امتداد حتمي لآلام من سبقوه.
وهذا غير صحيح على الإطلاق.

نحن لا نورث الصدمة كقَدَر.
ولا تنتقل المعاناة كحكم نهائي.
ما قد ينتقل هو الاستعداد، الحساسية، فرط التيقظ، ميل الجهاز العصبي للتأهب أو الخوف.
أما المصير، فلا يُورَّث.

وهذا فارق هائل.

لأن الإنسان ليس جيناته فقط.
الإنسان أيضًا خبراته الجديدة، وعلاقاته، ووعيه، والطريقة التي أُحِبَّ بها أو أُهمِل، والطريقة التي تعلم بها أن يرى نفسه والعالم.

حتى الدماغ نفسه ليس بناءً جامدًا.
إنه يتغير باستمرار.
العلاقات الآمنة تغيره.
الحب الناضج يغيره.
العلاج النفسي يغيره.

بعض الناس ينقلون جراحهم دون أن يشعروا.
الأب الذي لم يُحتوَ، قد يربي أبناءه بالخوف.
والأم التي عاشت عمرها في القلق، قد تورِث التوتر حتى وهي تحاول الحب.
الألم غير المعالَج نادرًا ما يبقى ساكنًا، هو غالبًا يبحث عن طريق جديد ليُعاد إنتاجه.

لكن أكثر ما يلمسني في الأمر، أن هناك أشخاصًا يقررون بوعي كامل أن تتوقف السلسلة عندهم.

أن تكون أول شخص في عائلتك يعتذر بدل أن يصرخ، ويحتوي بدل أن يُخيف، ويناقش بدل أن ينفجر، فهذه ليست مجرد محاولة للتغيير.
هذه مواجهة شجاعة مع تاريخ كامل من الصدمات غير المعالجة عبرت عبر أجيالٍ كاملة.

كسر الحلقة لا يعني أنك لم تتأذى.
بل يعني أنك تأذيت، ثم رفضت أن تجعل الآخرين يدفعون ثمن جراحك.

وهنا يصبح التعافي فعلًا أخلاقيًا أيضًا، لا مجرد رحلة شخصية.
لأنك حين تتعافى، أنت لا تنقذ نفسك وحدك، بل تغير شيئًا في المستقبل نفسه.
تُنقذ أطفالك.

وربما تكون إحدى أنبل صور النضج الإنساني: أن يحمل الإنسان ألمه بوعي شجاع ومسؤولية كاملة، دون أن يسلمه كإرثٍ لمن يحب.

أكتر سؤال بتسأله من وقت ما رجعت من العباسية هو: « مكنتيش خايفة منهم؟ » ​والحقيقة أنا لازم أجاوب، لأني قبل ما أروح كنت بس...
10/05/2026

أكتر سؤال بتسأله من وقت ما رجعت من العباسية هو: « مكنتيش خايفة منهم؟ »
​والحقيقة أنا لازم أجاوب، لأني قبل ما أروح كنت بسأل نفسي نفس السؤال « هل ممكن يأذوني؟ ».. كنت محبوسة في نفس التساؤل اللي المجتمع حابسهم فيها.. لكن لما نزلت وشوفت بنفسي لقيت إجابات مختلفة تمامًا!

​لقيت ناس "حقيقيين" ، ناس بتدور في عيوننا على أي أثر للإنسانية اللي العالم بره سحبها منهم.
هما مكنوش بيتعاملوا بلطف على قد ما هما كانوا بيتعاملوا بلهفة، وكأننا "طوق نجاة" رجع يربطهم بالحياة وبالإعتراف بوجودهم.

​النقطة الفارقة بالنسبالي كانت في "التقدير" اللي هما قدموهولنا.
لما سمعنا قصصهم؛ كلهم بلا استثناء اتكلموا عن قسوة العالم بره المستشفى، عن أذى أقرب الناس ليهم، وعلى لسانهم جملة بتتكرر بوجع: "الناس بره وحشة وكلامهم وحش".

​وقتها أدركت المفارقة.. إحنا اللي خايفين منهم، وهمَّ اللي موجوعين مننا.. أدركت إن هما بيحترموا جدًا اللي بيحترم وجعهم وبيردوا ده بأمان، لأنهم ببساطة محتاجين اللي يحسسهم إنهم لسه بشر.

​فكانت الإجابة وقتها:
إن الخوف الحقيقي مش منهم، الخوف هو إننا نفضل شايفينهم بعيون الأفلام، ونحرمهم من حقهم في إننا نفهمهم ونحس بوجعهم.

وبس كده....

العلاج السلوكي المعرفي للاكتئاب من أكتر الاتجاهات العلاجية اللي غيرت مفهومنا عن الاكتئاب نفسه.لأنه ببساطة ما بيبصش للاكت...
10/05/2026

العلاج السلوكي المعرفي للاكتئاب من أكتر الاتجاهات العلاجية اللي غيرت مفهومنا عن الاكتئاب نفسه.
لأنه ببساطة ما بيبصش للاكتئاب على إنه مجرد “حزن شديد” وخلاص…
لكن بيشوفه كحالة بيكون فيها الإنسان محاصر بطريقة تفكير معينة، ومشاعر معينة، وسلوكيات بتغذي بعض بشكل مستمر لحد ما الشخص يحس إنه غرقان ومش قادر يطلع.
الفكرة الأساسية في العلاج السلوكي المعرفي إن الإنسان مش بيتأثر بالأحداث بس…
لكن بالطريقة اللي بيفسر بيها الأحداث دي.
يعني ممكن اتنين يعدوا بنفس الموقف، لكن كل واحد يتأثر بشكل مختلف تمامًا حسب أفكاره الداخلية.
واحد ممكن يحصل معاه فشل في شغل أو علاقة ويقول: “أكيد أنا فاشل ومليش لازمة.”
وشخص تاني يقول: “التجربة صعبة… بس ممكن أتعلم منها.”
نفس الحدث…
لكن الفرق في طريقة التفكير بيخلق فرق ضخم جدًا في المشاعر والتعامل مع الحياة.
الشخص المكتئب غالبًا بيكون عنده نمط تفكير قاسي جدًا تجاه نفسه.
عقله طول الوقت بيصدر أحكام: “أنا قليل.”
“أنا عبء.”
“محدش بيحبني.”
“عمري ما هتحسن.”
والمشكلة إن مع الوقت الإنسان ما بقاش يشوف دي مجرد أفكار…
لأ، بيشوفها حقائق.
وده اللي العلاج المعرفي السلوكي بيشتغل عليه.
إنه يساعد الشخص يلاحظ أفكاره بدل ما يندمج معاها بشكل كامل.
لأن أوقات كتير جدًا الإنسان بيصدق كل حاجة عقله يقولها بدون ما يناقشها.
لو حد تجاهله مرة…
العقل يترجم: “أكيد بيكرهني.”
لو غلط في حاجة بسيطة: “أنا فاشل.”
لو تعب نفسيًا: “أنا ضعيف.”
وبالتدريج تتكون صورة كاملة سودا عن الذات والحياة.
العلاج هنا مش بيقول للإنسان: “فكر بإيجابية.”
لأن دي جملة سطحية جدًا مع شخص مكتئب.
الشخص المكتئب مش ناقصه نصايح…
هو أصلًا غرقان جوه عقل بيهاجمه طول الوقت.
لكن اللي بيحصل داخل العلاج إن المعالج يساعد الشخص يفهم: الفكرة دي جاية منين؟
هل هي دقيقة فعلًا؟
هل فيها مبالغة؟
هل فيها تعميم؟
هل الشخص بيحكم على نفسه من موقف واحد؟
ودي حاجة مهمة جدًا لأن الاكتئاب بيخلي الإنسان يشوف نفسه من أسوأ زاوية ممكنة.
حتى الذكريات الحلوة أوقات ما تبقاش قادرة توصله.
حتى النجاح يقلل منه.
حتى الحب يشك فيه.
ومن الحاجات المهمة جدًا في العلاج السلوكي المعرفي إنه بيركز على العلاقة بين: الفكر
والمشاعر
والسلوك.
ودي دائرة مرتبطة ببعض جدًا.
يعني مثلًا: شخص فكر: “أنا فاشل.”
هيحس بإحباط وحزن.
وبعدين ينسحب ويبطل يحاول.
ولما ينسحب حياته فعلًا تبدأ تتأثر بالسلب…
فيقتنع أكتر إنه فاشل.
وهكذا تدخل الدائرة في بعض.
العلاج بيحاول يكسر الدائرة دي خطوة خطوة.
مش بس بالأفكار…
لكن كمان بالسلوك.
لأن الشخص المكتئب غالبًا بيفقد الرغبة في كل حاجة: الخروج
الكلام
الشغل
الأكل
الهوايات
حتى الحاجات اللي كانت بتريحه.
وكل ما ينسحب أكتر… الاكتئاب يزيد أكتر.
عشان كده فيه جزء مهم جدًا اسمه “التنشيط السلوكي”.
إن الشخص يبدأ يعمل خطوات بسيطة حتى لو معندوش رغبة.
ودي نقطة صعبة جدًا على ناس كتير.
لأن العقل المكتئب يقنع الإنسان إنه لازم الأول يحس بطاقة عشان يتحرك.
لكن الحقيقة النفسية العميقة إن أوقات كتير الحركة هي اللي بتخلق الطاقة.
يعني ممكن شخص يحس إنه مش قادر يقوم من السرير…
لكن بعد ما ياخد خطوة صغيرة جدًا زي إنه يتمشى عشر دقايق أو يرتب مكانه… يبدأ يشعر بتحسن بسيط.
والتحسن البسيط ده مهم جدًا.
لأنه بيكسر إحساس العجز.
ومن أكتر الحاجات اللي بيشرحها العلاج المعرفي السلوكي بشكل عميق فكرة “التشوهات المعرفية”.
ودي أخطاء في التفكير بيعملها العقل بشكل تلقائي.
زي: التفكير الأبيض والأسود
يا إما كامل يا إما فاشل.
أو التعميم: مرة فشلت → يبقى عمري كله فشل.
أو قراءة الأفكار: “أكيد الناس شايفاني غبي.”
أو جلد الذات: أي مشكلة تحصل يبقى أنا السبب.
والتشوهات دي لو فضلت سنين بدون وعي… بتتحول لصوت داخلي مؤذي جدًا.
ومع الوقت الإنسان يتعامل مع نفسه بقسوة أكتر من أي حد تاني.
وفيه نقطة مهمة جدًا:
الاكتئاب أحيانًا بيكون مرتبط بتجارب قديمة جدًا.
طفل طول عمره بيتعرض للنقد…
أو الإهمال…
أو المقارنة…
أو عدم الأمان…
غالبًا هيكبر وهو شايل جواه معتقدات مؤلمة عن نفسه.
يمكن يبقى ناجح جدًا من بره…
لكن من جواه مقتنع إنه مش كفاية.
وهنا العلاج ما بيبقاش مجرد تعديل أفكار سطحية.
دي رحلة لإعادة بناء العلاقة مع النفس.
إن الإنسان يبدأ يشوف نفسه بشكل أكثر رحمة وواقعية.
يتعلم إن الغلط لا يعني إنه فاشل.
وإن الرفض لا يعني إنه بلا قيمة.
وإن التعب النفسي لا يعني إنه ضعيف.
ومن أجمل الحاجات في العلاج السلوكي المعرفي إنه بيعلم الإنسان مهارات يعيش بيها بعد العلاج كمان.
يعني الهدف مش إن المعالج يبقى منقذ.
لكن إن الشخص نفسه يتعلم: يفهم أفكاره
ينظم مشاعره
يلاحظ أنماطه
ويتعامل مع نفسه بوعي أكبر.
وده اللي بيخلي العلاج السلوكي المعرفي من أكثر الأساليب العلاجية قوة وانتشارًا في علاج الاكتئاب.
لأنه مش بيعتمد على الكلام النظري فقط…
لكن على التغيير التدريجي الواقعي اللي بيحصل داخل حياة الإنسان نفسها.
الاكتئاب مش ضعف شخصية.
ومش دلع.
ومش قلة إيمان زي ما البعض بيصور.
الاكتئاب ألم نفسي حقيقي جدًا.
والإنسان المكتئب غالبًا بيكون مستنزف من الداخل بشكل الناس ما بتشوفوش.
وعشان كده العلاج النفسي الحقيقي مهم.
لأنه أحيانًا بينقذ الإنسان من الحرب اللي شغالة جواه كل يوم… بدون ما حد يحس.

ادخلو شات جي بي تي واكتبو اللي في اول كومنت ووريني صوركم 😍 أنا طلعلي دي
06/05/2026

ادخلو شات جي بي تي واكتبو اللي في اول كومنت ووريني صوركم 😍 أنا طلعلي دي

درجات السلام الداخلي هي رحلة تدريجية ينتقل فيها الإنسان من الفوضى والضغط إلى الطمأنينة والاتزان.مش حالة ثابتة بنوصل لها ...
02/05/2026

درجات السلام الداخلي هي رحلة تدريجية ينتقل فيها الإنسان من الفوضى والضغط إلى الطمأنينة والاتزان.
مش حالة ثابتة بنوصل لها مرة واحدة… لكنها خطوات صغيرة نبنيها كل يوم داخلنا.
بتبدأ من تقليل التوتر، ثم تقبل ما لا يمكن تغييره، وبعدها التصالح مع النفس، ووضع حدود صحية، إلى أن نصل لهدوء داخلي يجعلنا أقل تأثرًا بما يحدث حولنا.
الفكرة ببساطة:
السلام الداخلي لا يعني أن حياتك بلا مشاكل… بل يعني أن مشاكلك لم تعد تسرق سلامك.
كل درجة أعلى تمنحك وعيًا أهدى، وردود فعل أنضج، وقدرة أكبر على حماية طاقتك.
ومش المطلوب تبقى مثالي أو دائم الهدوء… المطلوب إنك تعود لنفسك كل مرة، وتختار الراحة بدل الصراع 🌿✨

02/05/2026

يستفيد المرضى بشكل هائل من مجرد تجربة أن يُرى ويُفهم بالكامل ، لذا من المهم لنا أن نقدّر كيف يختبر مرضانا الماضي والحاضر والمستقبل ♥️

• إرفن يالوم

Address

Hurghada

Website

Alerts

Be the first to know and let us send you an email when Psychologist Anwar Malik posts news and promotions. Your email address will not be used for any other purpose, and you can unsubscribe at any time.

Shortcuts

Share

Category