27/07/2026
IMHO UK அமைப்பின் கல்வி உதவியால் கிளி/சிவபாதகலையகம் அதக பாடசாலை க.பொ.த. சாதாரண தரப் பரீட்சையில் சிறந்த பெறுபேறுகள்
கிளிநொச்சி மாவட்டம், பொன்னகர் பகுதியில் அமைந்துள்ள கிளி/சிவபாதகலையகம் அதக பாடசாலை (KN/Sivapathakalaiyakam G.T.M.S), 2025 (2026) ஆம் ஆண்டுக்கான க.பொ.த. சாதாரண தரப் பரீட்சையில் குறிப்பிடத்தக்க பெறுபேறுகளைப் பதிவு செய்து கல்வித்துறையில் புதிய சாதனையை நிகழ்த்தியுள்ளது.
பாடசாலையின் கற்றல்-கற்பித்தல் நடவடிக்கைகளை நவீனமயமாக்கும் நோக்கில் IMHO UK அமைப்பினால் மடிக்கணினி (Laptop), பல்லூடக ஒளிக்காட்டி (Projector) மற்றும் ஒலிபெருக்கி (Speaker) உள்ளிட்ட கல்வி உபகரணங்கள் அன்பளிப்பாக வழங்கப்பட்டிருந்தன. இவ்வுதவிகள் மாணவர்களின் கல்வித் தரத்தை மேம்படுத்துவதிலும், தொழில்நுட்ப அடிப்படையிலான கற்றல் சூழலை உருவாக்குவதிலும் முக்கிய பங்களிப்பை வழங்கியுள்ளதாக பாடசாலை நிர்வாகம் தெரிவித்துள்ளது.
இவ்வாண்டு நடைபெற்ற க.பொ.த. சாதாரண தரப் பரீட்சையில், 36 மாணவர்கள் பரீட்சைக்கு தோற்றிய நிலையில், 21 மாணவர்கள் சித்தி பெற்று 58.3% மொத்த சித்தி வீதத்தை பதிவு செய்துள்ளனர். மேலும், 16 மாணவர்கள் அனைத்து பாடங்களிலும் தேர்ச்சி பெற்று 44.4% என்ற சிறப்பான பெறுபேற்றையும் பெற்றுள்ளனர்.
இச்சிறப்பான கல்விச் சாதனைக்கு அர்ப்பணிப்புடன் உழைத்த மாணவர்கள், ஆசிரியர்கள், அதிபர், பெற்றோர் மற்றும் பாடசாலை சமூகத்தினருக்கு பாடசாலை நிர்வாகம் தனது மனமார்ந்த பாராட்டுகளையும் நன்றிகளையும் தெரிவித்துள்ளது. மேலும், பாடசாலையின் கல்வி வளர்ச்சிக்கு தொடர்ச்சியான ஆதரவை வழங்கி வரும் IMHO UK அமைப்பிற்கும் பாடசாலை சமூகத்தினர் தங்களது மனமார்ந்த நன்றியை தெரிவித்துள்ளனர்.
