25/10/2026
❤️
Minsan, bago natin husgahan ang presyo ng isang produkto, subukan muna nating tingnan ang nasa likod nito.
Bilang isang kakanin maker, hindi lang harina, gata, asukal, at iba pang sangkap ang puhunan namin. May LPG, tubig, kuryente, packaging, oras, pagod, at pawis sa bawat produktong ginagawa. May mga araw na maaga pa lang ay nakatayo na kami sa kusina, naghahanda, nagluluto, nagbabalot, at nag-aasikaso ng mga order para maibigay ang pinakamagandang kalidad sa aming mga customer.
Hindi rin lahat ng ginagawa namin ay perpekto. May mga nasasayang na sangkap, may mga produktong hindi nagtatagumpay, at may mga pagkakataong kailangang ulitin ang proseso. Lahat ng iyon ay bahagi ng negosyong hindi nakikita ng mga taong ang natitingnan lamang ay ang presyo ng isang bilao ng kakanin.
At higit sa lahat, kailangan din naming swelduhan ang aming sarili. Hindi dahil kami ang may-ari ng negosyo ay ibig sabihin wala na kaming karapatang kumita para sa aming sariling pagod at paggawa. Ang tubo ay hindi basta perang idinadagdag lamang sa presyo. Bahagi nito ang pagpapatuloy ng negosyo, pambayad sa mga gastusin, at kabayaran sa oras at lakas na ibinuhos namin.
Kaya sana, sa susunod na makakita tayo ng produktong sa tingin natin ay mahal, subukan din nating unawain ang kuwento sa likod nito. Hindi lahat ng nakikita nating produkto ay katumbas lamang ng halaga ng mga sangkap na ginamit.
Dahil sa bawat kakaning ginagawa namin, may oras, pagod, pangarap, at responsibilidad na kasama.
