02/11/2026
බලයට පැමිණීමට පෙර ජනතාව මර්ධනය කරන PTA වැනි ත්‍රස්ත පනත් වලට එරෙහිව හඩනගපු, එවැනි ත්‍රස්ත පනත් අහෝසි කිරීමට වේදිකා වල පොරොන්දු දුන් ජාතික ජනබලවේග ආණ්ඩුව අද වන විට පැවති ත්‍රස්ත පනත් වලටත් වඩා අධික ලෙස ජනතාව මර්ධනය කරන ත්‍රස්තවාදයෙන් රාජ්‍ය ආරක්ෂා කරගැනීමේ පනත (PSTA) සහ සංවිධානාත්මක අපරාද වැළැක්වීමේ පනත (POCA) යන පනත් ද්විත්වයම ගෙන ඒමට කූට සැලසුම් දියත් කරමින් සිටිනුයේ බලයට පැමිණි දා සිට ආණ්ඩුවේ පැවති වමට සිග්නල් යොදා දකුණට හැරවීමේ ප්‍රතිපත්තිය තව දුරටත් සත්‍යාපනය කරමිනි.
මෙම නව ත්‍රස්ත පනත් හරහා මහජනතාව රජයන් මගින් එල්ලවෙන අසාධාරණයන් වෙනුවෙන් හඩ නැගීම, තම ඉල්ලීම් වෙනුවෙන් හඩනැගීම, රජයට එරෙහිව අදහස් ප්‍රකාශ කිරීම, ඒ වෙනුවෙන් රජයට බල කිරීම පවා අපරාධ ක්‍රියාවන් ලෙස අර්ථ දක්වා ඇත්තේ මානව අයිතීන් පවා උල්ලංඝනය කරමිනි. එනිසා මේ හරහා ආණ්ඩුවේ නොමනා ක්‍රියා වලින් පීඩා විදින පොදු ජනතාවගේ ප්‍රශ්න, ශිෂ්‍යයන්ගෙ ප්‍රශ්න වෙනුවෙන් රජයට එරෙහිව හඩ නගන, රජයෙන් ඉල්ලිම් කරන, වෛද්‍ය පීඨ ශිෂ්‍ය ක්‍රියාකාරි කමිටුව වැනි ශිෂ්‍ය ක්‍රියාකාරී කමිටු, සහ අනෙකුත් සිවිල් සංවිධාන පවා සංවිධානාත්මක අපරාධ කණ්ඩායම් ලෙස අර්ථ දැක්වීමට පසුබිම සලසා ඇත.
ඒ වගේම මෙම ත්‍රස්ත පනත් හරහා පොලීසියට ආරක්ෂක අංශ වලට පවතිනවාටත් වඩා අසීමිත බලතල ප්‍රමාණයක් නැවත වටයකින් වැඩි කර දීම නිසා අනිසි බලයක් ආරක්ෂක අංශ වලට හිමිකර දී ඇත. හොදම නිදසුන මෙම පනතේ 20(1) වගන්තිය ප්‍රකාරව සැකකරුවෙකු මහේස්‍රාත් හමුවට ඉදිරිපත් නොකර පොලිස් රැදවුම්බාරයේ තබා ගත හැකි කාලය පැය 24 සිට පැය 72ක් දක්වා වැඩි කර දී ඇත. මේ වන විට පවතින පැය 24 තුළ පොලීසිය අතින් සිදුවන සාහසික මරණ සහ අපරාධ අපට නොසෑහෙන්න ප්‍රමාණයක් දකින්නට ලැබෙද්දි තවත් බලතල ඉහළ දමා,මෙලෙස රැදවුම් කාලයද වැඩි කිරීමෙන් තවත් කෙතරම් සාහසික අපරාධ ප්‍රමාණයක් පොලීසියෙන් සිදු වෙයිද යන්න අපට සිතා ගැනීමටවත් නොහැකිය.
මේ මෙම නව ත්‍රස්ත පනත්වල ඇති ගැටළු කිහිපයක් පමණි. ත්‍රස්තවාදය වැළක්වීමේ මුවාවෙන් NPP ආණ්ඩුව, තම ආණ්ඩුවේ නොමනා ක්‍රියාකාරකම් වලට එරෙහිව හඩ නගන, අසාධාරණයට එරෙහිව හඩනගන මහජනතාව, ශිෂ්‍යයන් ඇතුළු සිවිල් ක්‍රියාකාරින් මර්ධනය කර ආණ්ඩු විරෝධය අවම කිරීම සදහා ගෙන එනු ලබන මෙවැනි ත්‍රස්ත පනත් වලට එරෙහිව ශිෂ්‍යයන් සහ ජනතාව වෙනුවෙන් එදා සිට අද දක්වා පෙනී සිටින ඉදිරියේදීත් පෙනී සිටින ප්‍රගතිශීලී ශිෂ්‍ය ව්‍යාපාරයක් ලෙස වෛද්‍ය පීඨ ශිෂ්‍ය ක්‍රියාකාරී කමිටුව කොන්දේසි විරහිතව නැගී සිටින අතරම එවැනි ත්‍රස්ත පනත් ඉදිරිපත් කිරීමට ප්‍රථම හකුළා ගන්නා ලෙස මෙම NPP රජයට දැඩි ලෙස අවධාරණය කරන්නෙමු.
- වෛද්‍ය පීඨ ශිෂ්‍ය ක්‍රියාකාරී කමිටුව -
