11/10/2026
ممكن تقضي سنوات طويلة من عمرك وإنت مقتنع إنك شخص صعب ما محبوب ما اجتماعي ما ناجح أو ما كفاية..
بس لأنك عشت فترة طويلة في بيئة ما شافت قيمتك أو وسط ناس ما عرفوا يتعاملوا مع اختلافك.. وتجيك فرصة تكتشف إنك رائع في بيئة أخرى..
ممكن تكون اتربيت في بيت كان صوتك فيه مزعج أسئلتك كتيرة مشاعرك مبالغ فيها وأخطائك بتتقابل بالانتقاد والسخرية..
فتكبر وإنت مقتنع إنك شخص إضافي وإن وجودك نفسه محتاج اعتذار..وتجيك فرصة تكتشف إنك محبوب مرح وعندك أفكار جميلة وسط ناس مختلفين..
ممكن تقضي سنوات في علاقة إنت فيها دائماً الطرف البعتذر البتنازل البخاف يتكلم عشان ما يخسر الطرف التاني..فتبدأ تصدق إنك شخص ماساهل ينال المحبة..ولازم يقدم ويجتهد عشانها وتجيك فرصة تدخل علاقة صحية تلقى فيها الاحترام الأمان والقدرة على الاختلاف بدون خوف..
ممكن تفشل في دراسة وظيفة أو مشروع وتبدأ تشك في ذكائك وقدراتك.. وتجيك فرصة تجرب مجال مختلف يناسب مهاراتك، وتكتشف إمكانيات ما كنت عارف إنها موجودة.. وتجد نفسك مميز و ناجح ..
ممكن تعيش سنوات في مكان ما حاسس فيه بالانتماء وتعتقد إنك انطوائي وما بتعرف تكون علاقات..وتجيك فرصة تلتقي ناس بتشبهك في اهتماماتك وقيمك وتكتشف إنك قادر تتواصل وتحب وتكون صداقات جميلة.. وتكتشف أنك اجتماعي وتعرف تنتمي وتنسجم ..
بس بيحصل كمان أحياناً اننا بنغادر البيئات المؤذية وبنحمل معانا الأحكام الاتعلمناها عن نفسنا داخلها..
فتكون في علاقة آمنة ولسه منتظر الرفض..
وفي مكان بيقدرك ولسه حاسي إنك ما كفاية..
وقدام فرصة جديدة ولسه مقتنع إنك حتفشل..
عشان كدا التعافي ما بس إنك تغير البيئة.. التعافي كمان إنك تراجع الصورة الاتكونت جواك عن نفسك بسببها..
اسأل نفسك..
منو أقنعك إنك ما محبوب ..؟
منو خلاك تشك في قدراتك.. ؟
ومن متين بقيت مقتنع إنك لازم تكون مثالي عشان تستحق المحبة والاحترام ..؟
هل دي حقائق عنك ولا أحكام قديمة اتكونت في ظروف ما كانت مناسبة ليك .. ؟
طبعاً أحياناً بنحتاج نغير سلوكنا نطور مهاراتنا ونتحمل مسؤولية أخطائنا..
لكن في فرق بين إنك تطور نفسك، وبين إنك تقضي عمرك بتحاول تصلح حاجات ما كانت معيوبة وهي انت فقط ..
ما تحكم على قيمتك من تجربة واحدة ولا على قدرتك على الحب من علاقة فاشلة ولا على ذكائك من نتيجة امتحان ولا على مستقبلك من فرصة ضاعت..
الحياة أوسع من التجارب المريت بيها .. وأوسع من الأشخاص العرفتهم..
ويمكن إلى الآن ما اكتشفت أجمل نسخة منك..
ورحلتك القادمة حتكون فرصة جديدة ..
