08/06/2026
Në orët e para të mëngjesit, edhe sot u krye me sukses një lindje natyrale.
Pasi u fala herët, u nisa me bekimin e Zotit për të ndihmuar një foshnjë të vijë në jetë dhe një grua me dhembje të realizojë ëndrrën e saj për t’u bërë nënë për herë të parë, veçanërisht pas një periudhe sfiduese.
Qetësia, relaksi, besimi dhe përgatitja e çiftit ishin çelësi i suksesit. Rezultati i kësaj lindjeje të suksesshme ishte fryt i bashkëpunimit të ndërsjellë.
Kur pacientja dëgjon me kujdes udhëzimet, ruan besimin dhe qetësinë dhe bashkëpunon gjatë gjithë procesit, lindja zhvillohet më qetë dhe më sigurt.
Kur bashkëshorti është pranë për t’i dhënë forcë, kurajë dhe mbështetje bashkëshortes së tij, kjo është një mrekulli më vete.
Roli i bashkëshortit gjatë lindjes është i paçmueshëm. Një bashkëshort që i qëndron pranë bashkëshortes me qetësi, i jep forcë, kurajë dhe mbështetje emocionale, kontribuon dukshëm në mbarëvajtjen e procesit të lindjes.
Prania e tij nuk duhet të jetë burim presioni, por burim sigurie dhe besimi.
Kur mjeku, mamia, pacientja dhe bashkëshorti funksionojnë si një ekip, lindja shpesh bëhet një përvojë më e qetë, më e sigurt dhe më e bukur për të gjithë.
Jam mirënjohëse për besimin që më është dhënë dhe e lumtur që gjithçka përfundoi me sukses për nënën dhe foshnjën.
Mirënjohja e pacientes dhe e bashkëshortit të saj mbetet vlerësimi më i bukur për punën tonë.
Dr Samire Ademi Lutolli
